अंकारा : टर्कीका राष्ट्रपति रिसेप तैयप एर्दोगानले रूसी एस–४०० क्षेप्यास्त्र प्रतिरक्षा प्रणाली सन् २०२० को अप्रिलदेखि जडान गरिने बताएका छन् । अमेरिकाले रूसी हतियार खरिदप्रति विमति राख्दै अमेरिकाले टर्कीलाई अत्याधुनिक अमेरिकी लडाकु विमान एफ–३५ बिक्री नगर्ने जनाइसकेको छ ।
राजधानी अंकारामा राष्ट्रपतिको दल न्याय तथा विकास पार्टी (एकेपी) को भेलामा सम्बोधन गर्दै राष्ट्रपति एर्देगानले सन् २०२० को अप्रिलमा रूसी हतियार जडान प्रक्रिया आरम्भ हुने जानकारी दिएका छन् । रूसले उक्त क्षेप्यास्त्र प्रतिरक्षा प्रणाली यसै महिना टर्की पठाइसकेको छ । रूसी हतियार खरिद गरेको विरोधमा अमेरिकाले बहुप्रतीक्षित एफ–३५ विमान बिक्री गर्ने योजना रद्द गरेको छ ।
अमेरिकाले आफ्ना लडाकु विमानमा प्रयोग गरेको अति संवेदनशील प्रविधि र सूचना चोरी हुने आशंका व्यक्त गरेको छ । राष्ट्रपति एर्दोगानले सम्बोधनका क्रममा अमेरिकी निर्णयप्रति लक्षित गर्दै भने, ‘तपाईंहरू एफ–३५ दिनु हुन्न ? धेरै राम्रो, तर यसबाट उत्पन्न हुनसक्ने संकट निवारण गर्ने उपाय हामीसँग पनि छ र हामी अरू देशलाई गुहार्न बाध्य हुनेछौं ।’
उनले बोइङ कम्पनीको अर्बौं डलरको आदेश रद्द गर्न आफूहरू पनि बाध्य हुने चेतावनी दिए । उनले गत महिना जापानमा सम्पन्न जी२० सम्मेलनका क्रममा अमेरिकी राष्ट्रपति डोनल्ड ट्रम्पसमक्ष आफूले यस विषयलाई गम्भीरतापूर्वक राखेको पनि बताएका थिए । टर्की र अमेरिकाबीच यसै साता भएको बैठकमा उत्तरी सिरियामा मध्यवर्ती क्षेत्र निर्माण गर्ने विषयमा छलफल भएको थियो । बैठकमा टर्की र कुर्दिस फौजबीच थप लडाइँ रोक्ने बारेमा छलफल केन्द्रित भएको थियो । –रासस÷एएफपी
४४ प्रहरी पक्राउ
टर्कीको प्रहरीले सन् २०१६ को असफल राज्य विद्रोहमा सघाएको आरोपमा शनिवार देशभरबाट ४४ प्रहरी अधिकारीलाई नियन्त्रणमा लिएको छ ।
टर्कीका धर्मगुरु फेतुल्ला गुलेनको सञ्जालको सहयोगमा गरिएको भनी टर्की सरकारले आरोप लगाउँदै आएको सन् २०१६ को जुलाई १५ मा भएको उक्त उक्त विद्रोहमा २५० जनाको ज्यान गएको थियो । प्रहरीले शनिबार एकै समयमा ३० प्रान्तमा शुरु गरेको अभियानमा ६४ जना शंकास्पद अधिकारीलाई खोजी गरिएको र ४४ जना फेला परेको सरकारी अधिकारीलाई उद्धृत गरी टर्कीको अनादोलु समाचार संस्थाले जनाएको छ ।
प्रतिक्रिया दिनुहोस !
