पोखरा : पोखराको अपर सेती नदीमा अन्तर्राष्ट्रियस्तरको दि क्यासांग च्यालेन्ज प्रतियोगिताको तयारी गरिएको छ । नेपाल एशोसियसन अफ र्याफिट्ङ एजेन्सी (नारा) गण्डकी प्रदेश पोखराको आयोजनामा पोखरामा कार्तिक ८ र ९ गते अन्तर्राष्ट्रिय स्तरको प्रतियोगिता हुन लागेको हो ।
प्रतियोगितामा साइक्लिङ, रनिङ र कायाकिङ प्रतिस्पर्धा गरिने आयोजक नारा गण्डकी प्रदेशका अध्यक्ष विरेन्द्र लामाले जानकारी दिए । आफ प्रतियोगिताअन्तर्गत रनिङ र साइक्लिङ प्रतिस्पर्धा पनि हुनेछ।
अष्ट्रेलियाकी अन्तर्राष्ट्रिय कायकिङ खेलाडी क्यासन्ड्रको सम्झनामा नेपालमै पहिलो पटक यस्तो प्रतियोगिता भएको हो । २०१८ को नोभोम्बर २९ गते पोखराको हेमजास्थित सेती नदीमा कायकिङ गर्ने क्रममा उनी दुर्घट्नामा परी मृत्यु भएको थियो ।
पोखराको लेकसाइडदेखि सुरु हुने प्रतिस्पर्धामा याम्दी दोभान सम्म ७ दशमलब ५ किलोमिटर दुरीमा साइक्लिङ गर्नुपर्नेछ । त्यसपछि याम्दी दोभानदेखि मर्दीखोला दोभानसम्मको ६ दशमलब ५ किलोमिटर दुरीमा रनिङ गरी मर्दी खोला दोभानदेखि सेती नदीमा याम्दी दोभान सम्म ८ किलोमिटर दुरी रिभर रेस कायाकिङ गर्नुपर्ने छ।
प्रतियोगिता पुरुष र महिला गरी दुई विधामा हुने छ । दि क्यासांग च्यालेन्ज प्रतियोगिताको फुल प्रतियोगिताको पुरुष र महिला दुवै विद्यामा प्रथम हुनेले १ लाख पुरस्कार पुरस्कार पाउनेछन्। यसैगरी दोश्रो हुनेले ५० हजार र तेश्रो हुनेले २५ हजार प्राप्त गर्नेछन् ।
दि क्यासांग च्यालेन्ज प्रतियोगिताको हाफ प्रतियोगिता (साइक्लिङ र रनिङ) विधामा सहभागीतर्फ प्रथम हुनेले ३० हजार, दोश्रो हुनेले २० हजार र तेश्रो हुनेले १० हजार नगद प्राप्त गर्ने प्रतियोगिताका टेक्निकल को अर्डिनेटर नाराका निवर्तमान केन्द्रिय अध्यक्ष निमबहादुर मगरले जानकारी दिए ।
दुई दिनसम्म चल्ने प्रतियोगितामा नेपालसँगै क्यानडा, भारत, अष्ट्रेलिया, इङ्गयाण्ड, वेलायत, अर्जेन्टिना, अष्ट्रिया, फ्रान्स, जर्मनी, स्वीजरल्याण्ड, न्युजील्याण्ड, जापान, नेपाललगायतका देशबाट करिब २ सयजनाको सहभागीता रहने नेपाल एशोसियसन अफ र्याफिट्ङ एजेन्सी (नारा) गण्डकी प्रदेशका सदस्य मिलन तिवारीले जानकारी दिए।
पोखरालाई साहसिक पर्यटकीय गन्तव्यको रुपमा विकास गर्ने यो इभेन्टले महत्वपूर्ण भूमिका खेल्ने आयोजकका विश्वास छ । गत वर्ष कायाकिङ गर्ने क्रममा अष्ट्रेलियन २३ वर्षीया कासांगको निधन भएपछि उनको परिवारले स्थापना गरेको कोषबाट यो प्रतियोगिता पहिलो पटक आयोजना गरिएको हो । उनका बाबा आमाले प्रतियोगितालाई सहयोग समेत गरेका छन्।
प्रतिक्रिया दिनुहोस !
