पोखरा : राष्ट्रियसभा सदस्य निर्वाचनअन्तर्गत गण्डकी प्रदेशको राजधानी पोखरामा मतदान सुरु भएको छ। गण्डकी प्रदेशमा राष्ट्रियसभा सदस्यमा महिला र अन्य गरी दुई पदका लागि निर्वाचन हुँदै छ ।
राष्ट्रियसभामा प्रदेशसभा सदस्य र स्थानीय तहका प्रमुख-उपप्रमुखले मतदान गर्दैछन् । उनीहरुको मतभार भने फरह हुन्छ । राष्ट्रियसभा निर्वाचनमा प्रदेशसभा सदस्यको मतभार ४८ र स्थानीय तहका प्रमुख र उपप्रमुखको मतभार १८ तोकिएको छ । गण्डकी प्रदेशका मुख्यमन्त्री पृथ्वीसुब्बा गुरुङले मतदान गरेका छन् ।
बहुमतीय प्रक्रियाबाट निर्वाचन हुने भएकोले नेपाल कम्युनिस्ट पार्टी (नेकपा) का उम्मेदवारको जीत पक्काजस्तै छ । यहाँ नेकपाले गोरखाका नारायणकाजी श्रेष्ठ र तनहुँकी भगवती न्यौपानेलाई उम्मेदवार बनाएको छ ।
पार्टी प्रवक्ता समेत रहेका श्रेष्ठ २०७४ को प्रतिनिधि सभा निर्वाचनमा समाजवादी पार्टीका संयोजक डा. बाबुराम भट्टराईसँग पराजित भएका थिए । प्रमुख प्रतिपक्ष दल नेपाली कांग्रेसबाट स्याङ्जाका सूर्यप्रसाद रेग्मी र म्याग्दीका विमला गौचन उम्मेदवार हुन्। 
प्रतिक्रिया दिनुहोस !
