पोखरा : कोरोना भाइरसका कारण पोखराको प्रसिद्ध फेवातालमा आइतवारदेखि डुंगा चल्न छाडेका छन् । फेवा डुंगा ब्यवसायी समितिको आइतबार बिहान बसेको बैठकले कोरोना भाइरसको जोखिमलाई हेरेर फेवातालमा डुंगा चलाउन रोक्ने निर्णय गरेको हो ।
कोरोना भाइरसको सक्रमण हुन सक्ने अवस्थालाई मध्यनजर गर्दै सरकारले २५ जना भन्दा धेरै भेला नहुन र सतकर्ता अपनाउन अनुरोध गरिरहेको अवस्थामा समितिको बैठकले आइतवारदेखि डुंगा सञ्चालन नगर्ने निर्णय गरेको फेवा डुंगा व्यवसायी समितिका अध्यक्ष बुद्धिबहादुर नेपालीले जानकारी दिए । कोरोनाको प्रभाव र अवस्था हेरेर पछि डुंगा सञ्चालन गर्ने गरी अनिश्चिकालका लागि डुंगा सञ्चालनमा रोक लगाइएको उनले बताए ।
फेवातालको ८ डुंगा घाटमा कुल ७ सय डुंगा रहेको समितिका सहसचिव रुद्ध भुजेलले जानकारी दिए । सबैभन्दा धेरै फेवातालको बिचमा रहेको तालबाराही मन्दिर जाने बाराही घाटमा ३ सय ५६ डुंगा छन् । शनिबार भारतीय र आन्तरिक पर्यटक डुंगा सयर गर्न धेरै आएकोले पनि कोरोना जोखिम हुन सक्ने भएकोले यो निर्णयमा पुगेएको भुजेलले सुनाए ।
ब्यवसाय नै ठुलो कुरो होइन । ज्यान रहे ब्यवसाय त हुँदै गर्ने भएकोले विश्वभर फैलिएको कोरोनाबाट पहिले ज्यान जोगाउनु पर्ने अवस्था आएकोले यस्तो निर्णय गर्नु परेको समितिका अध्यक्ष नेपालीले बताए । यसरी फेवातालमा डुंगा नै चलाउन रोक्नु पर्ने अवस्था पहिलोपटक आएको पनि उनले बताए ।
फेवातालमा ६ सय जनाले दैनिक डुंगा चलाएर जीवन निवार्हा गर्ने गरेको अध्यक्ष नेपालीले बताए । सिजनमा बाराही घाटका सबै ३ सय ५६ डुंगाले पालो पाउने र अफसिजन असार साउनमा भने पर्यटक कम आउने भएकोले रोल ढिलो आउने पनि उनले जानकारी दिए ।
कोरोना भाइरसका कारण ब्यस्त रहने पोखराको लेकसाइड क्षेत्र, अन्नपूर्ण पदयात्रा क्षेत्र, प्याराग्लाइडिङ गर्ने पर्यटकले रंगीने पोखराको सराङ्कोटको आकाश सुनसान देखिएको छ । बिहानै उठ्ने बित्तिकै सूर्योदयको अवलोकन गर्न र सुनौलो हिमाल हेर्न पुग्ने सराङ्कोट पनि अहिले बिहान सुनसान हुन थालेको छ ।
प्रतिक्रिया दिनुहोस !
