कोरोना संक्रमित युवतीसँगै आएका तनहुँका एकजना सरकारको सम्पर्कमा

दमौली : फ्रान्सबाट जहाजमाआएकी कोरोना संक्रमित युवतीसँगै आएका तनहुँका एक युवा सरकारको सम्पर्कमा पुगेका छन् । भीमाद २ घरभइ पोखरा बस्दै आएका ती व्यक्ति हाल घरमै रहेको बुझिएको छ । तनहुँका प्रहरी उपरीक्षक विनोद शिलवालले व्यक्तिको विवरणसहितको जानकारी सरकारी निकायमा पठाएको र उनी सम्पर्कमा रहेको बताए । 

विदेशबाट आएका ९८ जना 'होम क्वारेन्टाइन' मा 

दुई साताको अवधिमा भीमाद नगरपालिकामा विदेशबाट ९८ जना आएका पाइएको छ । कोरोनाको सम्भावित जोखिमबाट बच्नका लागि उनीहरु सबैलाई होम क्वारेन्टाइनमा राखिएको र नियमित स्वास्थ्य अवस्था जाँचिएको स्वास्थ्य अधिकारीले जनाएका छन् । 

तनहुँमा कोरोनासम्बन्धी मामिला हेर्ने स्वास्थ्य कार्यालयका अधिकारी शंकरबाबु अधिकारीले सबैजनाको तथ्यांक राखिएको र स्वास्थ्य अवस्थाबारे नियमित जानकारी लिइएको बताए । 'उनीहरु अहिले घरमै छन्,' उनले भने, 'हामी सम्पर्कमा छौं ।'

शुक्लागण्डकीमा ७ लाई होम क्वारेन्टाइन
शुक्लागण्डकीस्थित जीपी कोइराला स्वासप्रश्वास केन्द्रमा खाडी मुलुक तथा भारतहुँदै आएका सात यात्रुले सम्पर्क गरेका छन् । उनीहरुको सामान्य स्वास्थ्य परीक्षण गरिएको र अवस्था सामान्य रहेकाले बाहिर नगइ घरमा नै बस्नका लागि अनुरोध साथ पठाइएको केन्द्रका प्रमुख डा. रामकुमार श्रेष्ठले बताए । 'अवस्था सामान्य रहेकाले घरमै रहन भनेका छौं,' उनले भने, 'नियमित सम्पर्कमा राखेका छौं ।'

व्यासमा पनि सेल्फ क्वारेन्टाइन
बंगलादेशबाट आएकी एक चिकित्सा विद्यार्थी एक कलेज भवनमा बसेकी छन् । यसैगरी विभिन्न खाडी मूलुकबाट आएका चारजनालाई घरमै बस्नका लागि अनुरोध गरिएको व्यास १ का वडाध्यक्ष खरसिं दरैले बताए । 'उनीहरुको अवस्था सामान्य छ,' उनले भने, 'घरबाहिर नजानका लागि सचेत गराएका छौं ।'

सबै पत्रपत्रिका बन्द

तनहुँका विभिन्न भागबाट निस्कने पत्रपत्रिका बन्द भएका छन् । दमौलीबाट निस्कने सातसहित जिल्लाका आठ दैनिकले प्रकाशन बन्द गरेका छन् । बजार बन्दको अवस्थामा सञ्चारकर्मीको र कर्मचारीको सुरक्षाका लागि पत्रिका बन्द गरिएको पत्रकारहरुको भनाइ छ ।