पोखरा : पर्यटकीय सहर पोखरामा रहेका र घर फर्कन चाहाने पर्यटकलाई सुरक्षाकर्मी र पर्यटन व्यवसायीको विभिन्न संघ संस्थाको पहलमा पर्यटक बस र जहाजबाट काठमाडौं पठाउने कार्य भइरहेको छ।यसै क्रममा बिहीबार विभिन्न देशका १ सय १० पर्यटकलाई काठमाडौं पठाइएको छ ।
नेदरल्याण्ड, जर्मन, फ्रान्स, अमेरिका, बेलायत, मलेसिया, जापान, अष्टेलियालगायतका देशका पर्यटकलाई बिहीबार २ वटा ठूला पर्यटक बस र ३ वटा साना पर्यटकीय कोस्टर बसमा काठमाडौं पठाइएको पर्यटन प्रहरी कार्यालय पोखराका प्रमुख गणेश खनालले जानकारी दिए ।
लकडाउन भएको अवधिको बिहीबारसम्म चार्टड फ्लाइट र पर्यटक बसमा गरी विभिन्न देशका ७ सय ४० जना पर्यटकलाई पोखराबाट काठमाडौं पठाइ सकिएको उनले बताए । पोखरामा अझै पनि १ सय ५० देखि २ सय पर्यटक रहेको पर्यटन प्रहरी कार्यालय पोखराका प्रमुख खनालले सुनाए । कति पर्यटक त पोखरामै बस्न चाही रहेका छन् । अन्नपूर्ण, धौलागिरी क्षेत्रको पदयात्रा गएर फर्केका र पोखरामै रहेका पर्यटकलाई उनिहरुकै चाहाना अनुसार घर फर्कन काठमाडौं जाने व्यवस्था मिलाइएको पोखरा पर्यटन परिषदका अध्यक्ष चिरञ्जिवी पोखरेलले जानकारी दिए ।
पर्यटन प्रहरी कार्यालय पोखरा, पोखरा पर्यटन परिषद, नाटा, नेपाल पर्यटन बोर्डलगायतको सहकार्यमा पोखरामा रहेका र पदयात्राबाट फर्केका पर्यटकलाई कोरोना भाइरसको विश्वब्यापी जोखिमपछि सरकारले दुई साता लगाएको लकडाउनको बेलामा उद्धार गरी काठमाडौं पठाइएको हो ।
विश्वव्यापी फैलिएको कोरोना संक्रमणको जोखिमलाई नियन्त्रण गर्न नेपाल दश दिनदेखि लकडाउनमा छ । पदयात्रा क्षेत्रमा पर्यटकसँगै गएका पर्यटन गाइड, सहयोगी मजदुरलाई पनि पर्यटकसँगै काठमाडौं जाने व्यवस्था मिलाइएको पोखरा पर्यटन परिषदका अध्यक्ष चिरजिञ्जवी पोखरेलले जानकारी दिए । 
पोखरामा रहेका पर्यटकलाई काठमाडौं जानुअघि ज्वरो नाप्दै सुरक्षाकर्मी । तस्बिर : अन्नपूर्ण
प्रतिक्रिया दिनुहोस !
