पोखरा : गण्डकीमा सहर बजारबाहिरका अत्यावश्यक निर्माण व्यवसाय सुचारु गर्ने निर्णय भएको छ । मुख्यमन्त्री पृथ्वीसुब्बा गुरुङ संयोजकत्वको विपद् व्यवस्थापन समितिले यस्तो निर्णय गरेको हो ।
खानेपानी, ढल, सिँचाइ, पुल, कल्भर्ट, सडक, विद्युत पोल र खहरे नियन्त्रणको काम सुरु गर्ने समितिको निर्णय छ । ‘ढुंगागिटी, बालुवा, माटो, तारजाली, रड, सिमेन्ट, जस्तापाता, इन्धन र बिटुमिनजस्ता सामान तथा मेसिनरी औजार ढुवानी व्यवस्था गर्ने’, निर्णयमा भनिएको छ, ‘निर्माण सामग्रीको ढुवानी सकेसम्म रातिको समय र समय तोकी उपयुक्त समयमा गर्ने व्यवस्था मिलाइने छ ।’
त्यस्तो निर्माण क्षेत्रमा काम गर्ने मजदुर लगायतको फोटोसहितको विवरण राख्ने निर्णय समितिले गरेको छ । स्थानीय बस्तीलाई असर नपर्ने गरी जनशक्तिलाई साढे १ मिटरको दुरी कायम गरी निर्माणस्थल वा निर्माणस्थल नजिक राख्ने व्यवस्था मिलाइने भएको छ । निर्माण क्षेत्रमा अनधिकृत व्यक्तिको प्रवेश नदिने समितिले जनाएको छ । संक्रामक रोग फैलन नदिन सबै स्वास्थ्य सुरक्षा उपाय अपनाउने पनि भनिएको छ । निर्माण सामग्री ढुवानी गर्ने साधन अन्तबाट प्रवेश गर्दा प्रत्येकपटक डिस्इन्फेक्सन गर्ने समितिको निर्णयमा उल्लेख छ ।
निर्माण क्षेत्रका लागि आवश्यक सामान उपलब्ध गराउन जिल्ला प्रशासनको समन्वयमा सम्बन्धित पसल खुलाइने समितिको निर्णय छ । कृषिसँग सम्बन्धित मल, बिउ बिजनका पसल खोल्ने र तिनको ओसारपसार पनि सहज बनाउने समितिको निर्णय छ । यस्ता पसल र उद्योग कलकारखाना र निर्माण क्षेत्रको अनुगमन सरकारी अधिकारीले गर्ने छन् । सरकारले तोकेको मापदण्ड पूरा भए नभएको अनुगमन अधिकारीहरुले गर्नेछन् ।
खाद्यान्न र त्यससँग सम्बन्धी उद्योग कलकारखाना चलाउन दिने र चलाउँदा पनि जनशक्तिलाई सामाजिक दुरी कायम गर्नुपर्ने समितिले उल्लेख गरेको छ । गण्डकीमा कोभिड १९ संक्रमित २ जना निको भएर घर फर्किइसकेका छन् । यहाँ ५ हजारजनाभन्दा बढीको ¥यापिड परीक्षणसमेत भइसकेको छ । संक्रमण मुक्तिजस्तैको अवस्थालाई ख्याल गर्दै गण्डकी प्रदेश सरकारले लकडाउनको स्वरुप परिवर्तन गर्ने योजना यसअघि नै बनाएको थियो । उद्योग कलकारखाना खोल्न सहज बनाउने प्रदेश सरकारको नीति अनुसार पोखराका केही उद्योगहरु खुलिसकेका छन् ।
प्रतिक्रिया दिनुहोस !
