रुपन्देही : रुपन्देहीको तिलोत्तमा नगरपालिकाले अब हप्ताको ३ दिन मात्र तरकारी र खाद्यान्नका लागि पसल खोल्न दिने भएको छ । नगरपालिकाले एक सूचना प्रक्राशित गरी सोमबार, बुधबार र शुक्रबार तीन घण्टाको दरले पसल खोल्न भनेको छ ।
यी दिनमा बिहान ६ बजेदेखि ९ बजेसम्म मात्र पसल खोल्न पाइने र सामाजिक दुरी कायम गरेर सुरक्षित तरिकाले खरिद बिक्री गर्नुपर्ने नगरपालिकाका प्रमुख प्रशासकीय अधिकृत माधवप्रसाद शर्माद्वारा जारी सूचनामा उल्लेख छ । यसअघि तिलोत्तमामा हप्ताको सातै दिन दिउँसो १२ बजेदेखि २ बजेसम्म खाद्यान्न पसल खुल्ला गरिएको थियो । पसल जाने बहानामा मानिस अनावश्यक तरिकाले हिँडडुल गर्न थालेपछि तीन दिनको मात्र समय छुट्याइएको तिलोत्तमा नगरपालिकाका प्रवक्ता सुरेन्द्र श्रीले बताए । ‘एक किलो सामान ल्याउने बहानामा अनावश्यक बाहिर निस्कने डुल्ने, गाडी घोडा लिएर हिँडेको देखियो । यसले समस्या पार्यो’, उनले भने, ‘दूधको समय बिहान ७ बजेदेखि ९ बजेसम्म यथावत छ । त्यही समयमा नगरबासीले खाद्यान्न किन्छन् । दूध पनि किन्छन् भनेर यो निर्णय गरिएको हो ।’
त्यसै गरी नगरपालिकाले नगरभित्रैकै स्थानीय कृषि उपज मात्र उपभोग गर्न सुचित गरेको छ । नगरक्षेत्रमै तरकारी र दूधको उत्पादन पर्याप्त भएकाले अन्य स्थानबाट आएको तरकारी, फलफूल र दूधजन्य पदार्थ नल्याउन र बिक्री वितरण नगराउन भनिएको प्रवक्ता सुरेन्द्र श्रीले बताए । ‘तिलोत्तमाका लागि नगरकै तरकारी पर्याप्त छ’, उनले भने, ‘स्थानीय तरकारी भनेर अन्यत्रबाट तरकारी आउने क्रम भइरहेको थियो । त्यसले जोखिम बढ्छ भनेर पूर्णतया रोक्ने निर्णय भएको हो ।’ किसानको उत्पादनको लागि नगरपालिकाले सहजीकरण गर्ने प्रवक्ता श्रीले बताए ।
त्यसै गरी तिलोत्तमा नगरपालिकाले अन्य स्थानीय तहबाट श्रमिक ल्याउन नपाउने निर्णय पनि गरेको छ । यस्तै तिलोत्तमा नगरपालिकाले कक्षा १ देखि ९ सम्मको वार्षिक परीक्षको नतिजा पनि अर्को सूचना नभएसम्मको लागि रोकेको छ ।
प्रतिक्रिया दिनुहोस !
