पोखरा : पोखरा महानगरपालिकाले फेवातालमा माछा मारेर गुजारा चलाउँदै आएका जलारी समुदायलाई राहात स्वरुप फेवातालको जलकुम्भी झार झिक्ने काम दिएको छ । लकडाउनको कारण माछाले बजार नपाएपछि महानगरपालिकाले राहात स्वरुप काम दिएको हो ।
वैशाख १८ गतेदेखि जलारी समुदायले फेवातालको सिमसार क्षेत्रमा फैलिएको जलकुम्भी झार झिक्न थालेका छन् । माछा मारेरै गुजारा चलाउने जलारी समुदाय करिब एक महिना माछा बिक्री गर्न नपाएपछि यसअघि पोखरा महानगरपालिका वडा नम्बर १८ का वडा अध्यक्ष रणबहादुर थापा र जलारी समुदायकै अग्रजसहितको छलफल र सल्लाहामा राहात आवश्यक परेका ५५ घर परिवारलाई चामल, दाल, नुन, तेल लगायतका अत्यावश्यक खाद्यान्न वितरण गरिएको थियो ।
स्थानीय गोमा थापाको पहलमा बेल्जियमबाट आएको सहयोगबाट २५ बोरा चामल जलारी समुदायलाई वितरण गरिएको उनले सुनाए ।
कोरोना सक्रमण नियन्त्रण गर्न सरकारले चैत ११ गतेदेखि लकडाउन लगाएको छ । सामान्य अवस्थामा प्रति दिन २ सय किलो सम्म माछा मारेर बिक्री हुनेमा लकडाउनमा माछा नै बिक्री नभएको फेवा मत्स सहकारीका अध्यक्ष इन्द्र जलारीले बताए । ‘राहत होइन माछाको बजार ब्यवस्थापनमा सघाउन माग गरेका थियौं’, उनले भने । महानगरपालिकाले यस्तो अवस्थामा जलुकम्भी झार झिक्ने काम दिएकोमा उनले खुसी व्यक्त गरे ।
कारोना सक्रमण नियन्त्रण गर्न सरकारले लकडाउन लगाएकाले माछा नबिकेर जीवन धान्न सकस परेको अवस्थामा जलकुम्भी झार फाल्ने काम दिएकोमा जलारी समुदाय खुसी छन् । दैनिक ४ घण्टा जलकुम्भी झार झिकेको ३ सय ५० रुपैयाँ दरले महानगरपालिकाले काम दिएको फेवा मत्स्य सहकारीका पूर्व अध्यक्ष ज्ञानबहादुर जलारीले सुनाए ।
प्रत्येक घरबाट एकजना पर्ने गरी जलकुम्भी झार निकाल्ने काममा लागेको र अति दयनीय अवस्थाका परिवारलाई तीनजनासम्मले रोजगार पाएको उनले बताए । फेवाताल किनरमा ९३ घर परिवार जलारी समुदाय छन् । उनिहरुको पेशा नै माछामार्ने हो । वैशाख १५ गते देखि जलारी समुदायले एक दिन बिराई माछा मार्न थालेका छन् । पहिले दैनिक दुई सय किलो सम्म माछा बिक्री हुनेमा अहिले भने दैनिक ६० देखि ८० किलो माछा बिक्री हुन थालेको उनले सुनाए ।
प्रतिक्रिया दिनुहोस !
