गोरखा : गोरखाको गण्डकी गाउँपालिकाभित्र प्रवेश गर्ने सबै पुलमा निगरानी टोली खटाइएको छ। कोरोना संक्रमणको सम्भावित जोखिम न्यूनिकरण गर्ने उद्देश्यले गाउँपालिका भित्रिने त्रिशूली र बूढीगण्डकी नदीका १४ ठाउँमा तीन जनाका दरले टोली परिचालन गरेको गाउँपालिकाका अध्यक्ष होमबहादुर रानाले जानकारी दिए।
एकजना जनप्रतिनिधि, स्वास्थ्यकर्मी र शिक्षक खटाइएको उनको भनाइ छ। ‘गत सोमबारदेखि टोली खटाएका हौं’, अध्यक्ष रानाले भने, ‘टोली बिहान छ बजेदेखि साँझ छ बजेसम्म खटिनेछन्। उनीहरुले को को गाउँपालिकामा प्रवेश गरे, कहाँबाट आए, किन आए, कहाँ जान्छन् ? उनीहरुको स्वास्थ्य अवस्था कस्तो छ ? भनेर विस्तृत विवरण संकलन गर्नेछन्।’ संक्रमण फैलन नदिन विभिन्न सचेतनामुलक जानकारी गराउने उनले बताए।
वडा नम्बर १ को बुटार, २ को गोर्दी, ३ को भैसीगौडा र ४ को फुजेलस्थित झोलुङ्गे पुलमा टोली परिचालन गरिएको छ। त्यस्तै वडा नम्बर ५ को दर्वुङघाट तथा ६ को फिस्लिङ, हिक्लुङ र कौदीखोलामा रहेको पुलमा पनि टोली खटाइएको रानाले जानकारी दिए। त्यस्तै वडा नम्बर ७ को इटार, ज्यामिरेघाट, धवादीघाट र अमटे, वडा नम्बर ८ को चरौदी, चाइनाघाट र सिउरेनीटारको बाँदरेमा गरी १४ ठाउँमा टोली सक्रिय भएको उनको भनाइ छ।
गाउँपालिकामा समन्वय नगरी घर आउने र लुकेर बस्ने प्रवृत्ति बढेकाले यसलाई नियन्त्रण गर्न टोली परिचालन गरेको अध्यक्ष रानाले बताए। गण्डकी गाउँपालिकाको सीमानामा चितवनको इच्छाकामना गाउँपालिका, धादिङको बेनिघाट रोराङ गाउँपालिका र ज्वालामुखी र गोरखाको शहीद लखन गाउँपालिका रहेका छन्।
प्रतिक्रिया दिनुहोस !
