तानसेन : हालै सीमा नाकाबाट पाल्पा भित्रिएका सबै नागरिकको कोरोना परीक्षणको नमुना संकलन रोकिएको छ । देशव्यापी रुपमा भारतीय सीमा नाकाबाट भित्रिएका व्यक्तिमा कोरोना सक्रमण देखिइरहेको समयमा पाल्पामा भने किट अभावको कारण परीक्षण गर्न छोडिएको हो ।
प्रदेश सरकारले नै लक्षण देखिएका व्यक्तिको मात्र नमुना परीक्षण गर्न अनुरोध गरेपछि भारतबाट जिल्ला भित्रिएका नागरिकको परिक्षण रोकिएको हो । अहिले पाल्पा आइरहेका सयौं नागरिक विनापरीक्षण गाउँ गाउँको क्वारेन्टाइनमा पठाइएको छ । शनिबारसम्म पाल्पामा १ हजार ४४ जना भारतीय नाकाबाट प्रवेश गरेकोमा २ सय ३५ जनाको मात्र स्वाब संकलन गरिएको र ८ सय ९ जना विनापरीक्षण क्वारेन्टाइनमा पठाइएको हो ।
प्रदेश सरकारले अस्पातालमा आएका शंकास्पद बिरामी, क्वारेन्टाइनमा बसी सक्रमणको लक्षण देखिएका र सक्रमित व्यक्तिको कन्ट्रयाक ट्रेसिङ्गको सुचीमा परेका व्यक्तिको मात्र स्वाब संकलन गरी पठाउने निर्देशन अनुसार काम भएको प्रजिअ सुवेदीले बताए ।
भारतबाट आएका सबै नागरिकको अनिवार्य परीक्षण नहुने भएपछि क्वारेन्टाइन क्षेत्र वरपर र परिवारसम्म त्रास बढेको छ । शंकास्पद व्यक्तिको परीक्षण नगर्दा समुदायमा भयावह स्थिति आउन सक्ने पालिकाका अध्यक्षहरूले चिन्ता व्यक्त गरेका छन् । पाल्पामा हालसम्म्म २७१ स्वाब परीक्षणका लागि पठाए पनि १६० वटा परीक्षण भएको र १११ वटा रिपोट आउन बाँकी रहेको छ ।
अत्याश्यक व्यक्तिको लागि केही मात्रामा पिसिआर किट रहेको जिल्ला स्वास्थ्य कार्यालय पाल्पाले जनाएको छ । पिसिआर किट प्रदेश तथा केन्द्र सरकारसँग माग गरिरहेको कार्यालयले जनाएको छ । स्वास्थ्यकर्मी, सुरक्षाकर्मी, जनप्रतिनिधि, दैनिक कामकाजामा खटिएका कर्मचारी र पत्रकारहरुको पिसिआर परिक्षण हुन सकेको छैन ।
प्रतिक्रिया दिनुहोस !
