म्याग्दीको पहिरो प्रभावित ठाउँमा हेलिकोप्टरबाट सुरक्षाकर्मी लगिँदै
असार २७, २०७७ शनिबार ८:५२:०
बेनी : स्थलमार्गबाट सुरक्षाकर्मी पुग्न नसकेपछि शुक्रबार बिहान पहिरो गएको म्याग्दीको धवलागिरी–६ मराङ र मालिका–७ बिममा शनिबार हेलिकोप्टरबाट सुरक्षाकर्मी लैजाने तयारी भएको छ ।
भौगोलिक विकटता र प्रतिकूल मौसमका कारण पहिरोमा बेपत्ता भएकाहरुको २४ घण्टासम्म पनि सुरक्षाकर्मी पुगेर खोजी सुरु हुन सकेको छैन । पहिरोमा फसेकाहरु उद्धारको पर्खाइमा छन् । स्थलमार्गबाट जान सम्भव नभएपछि सेनाको हेलीकप्टरबाट सुरक्षाकर्मीलाई पहिरो प्रभावित ठाउँमा पुर्याउने तयारी भएको सिडिओ ज्ञाननाथ ढकालले बताए । ‘शुक्रबार दुई पटक गएको हेलिकोप्टर मौसमको खराबीका कारण भिजिबिलिटि नभएर फिर्ता भयो,’ उनले भने ‘दरवाङ पुगेको सुरक्षाकर्मीको टोली स्थलमार्ग र अर्थुङ्गे ब्यारेकबाट शनिबार बिहान हेलिकोप्टरबाट सुरक्षाकर्मी पठाउन लागिएको छ ।’
गण्डकी प्रदेशका मुख्यमन्त्री पृथ्वीसुब्बा गुरुङको टोलीसमेत शनिबार पहिरो प्रभावित क्षेत्रमा जाने कार्यक्रम छ । गएराति वर्षा नभएको र बिहानसम्म बादल लागेको स्थानीयबासीले बताएका छन् ।
मराङका वडा अध्यक्ष राजाराम सुवेदीले जनप्रतिनिधि, स्थानीयबासी, युवा क्लब र आमा समूहका प्रतिनिधिले पहिरोमा फसेकाको उद्धार र बेपत्ताको खोजी गरिरहेको बताए । चारैतिर पहिरोले घेरिएको कल्लेनीका ५० जनाभन्दा बढीलाई गाउँपालिकाको अगुवाइमा उद्धार गरेर धारापानी र ताकम लगिएको छ ।
घण्टीवाङका पहिरोपीडित १३ परिवार आरवाङको जनविकास आधारभूत विद्यालयको भवनमा बसेका छन् । पहिरोमा पुरिएर मराङको कल्लेनीमा ३, राम्चेमा १०, रिखमा ७, ठूलोगाउँमा १ र कुम्रिमा १ जना बेपत्ता भएका थिए ।
कल्लेनीका १८ वर्षीय प्रकाश केसी र ठूलोगाउँका ६२ वर्षीय तुलबहादुर केसीको शव भेटिएको स्थानीयले जानकारी गराएका वडा अध्यक्ष सुवेदीले बताए । बिमको तल्लोगाउँका ५, दुलेका २ र नौरुका १ जनाको खोजी भइरहेको छ । स्थानीयसँग उद्धार सामग्रीको अभाव छ ।
रघुगंगा गाउपालिका–६ ठाडाखानीको लापु खोलाले बगाएर ५० वर्षीय नलीमान छन्त्यालको मृत्यु भएको छ । मालिका गाउपालिका–६ को दुखु खोलाले बगाएर स्थानीय ४० वर्षीय गिता रोकालाई बेपत्ता बनाएको छ । खोला तर्ने क्रममा बेपत्ता भएकी रोकाको खोजी जारी छ ।
पहिरो र बाढीले धवलागिरी र मालिका गाउँपालिका जोड्ने दाङखोलाको अस्थिाई मोटरेबल पुल, बेनी–जोमसोम सडकको राहुघाट बेलिब्रिज, बिमको शिवरात्री स्थित ट्रस पुल बगाएको छ । ताकम स्वास्थ्य चौकीको पुरानो भवन, मंगलाघाट प्रहरी बिटको भवन, नौमानेको शिव आधारभूत र ताकम माविको भवन भत्किएको छ ।
रघुगंगा–३ राहुघाटका करिब २५ घर विस्थापित भएका छन् । पहिरोको जोखिममा परेका धवलागिरी गाउपालिका–७ काफलडाडाका ६ परिवारलाई सुरक्षित स्थानमा सारिएको स्थानीय लोकेश गर्बुजाले बताए । मालिका–५ देविस्थानका पहिरोको जोखिमयुक्त ठाउँका बासिन्दालाई पनि स्थानान्तरण गरिएको छ ।
राहुघाटमा पाइप बगाएपछि सदरमुकाम बेनी बजारमा पुम्दीखोलाको पानी आपूर्ति बन्द भएको छ । यसैगरी सदरमुकाम बेनीदेखि ग्रामिण क्षेत्र जोड्ने सबै सडक र पश्चिमी क्षेत्रमा विद्युत सेवा अवरुद्ध भएको छ ।
प्रतिक्रिया दिनुहोस !
