पहिरोले चिराचिरा गाउँ, छियाछिया मन (फोटो/भिडियाे)

बेनी  : म्याग्दीको धवलागिरी र मालिका गाउँपालिकाका चारवटा वडा गत शुक्रबारको पहिरोले छियाछिया बनाएको छ । पहिरोमा परेर २८ जनाको मृत्यु भएको छ भने तीनजना अझै वेपत्ता छन् । 

पहिरोमा परेर धवलागिरी गाउँपालिका-६ मराङमा १९, मालिका-७ बिमका ८ र रघुगंगा-६ ठाडाखानीका १ जनाको मृत्यु भएको डिएसपी किरनजंग कुँवरले बताए । मराङको राम्चे, कल्लेनी, रिख, ठूलोगाउँ र कुम्रिलगायतका बस्तीमा दर्जनौं ठाउँमा पहिरो गएको छ । 

मालिका-७ बिमको तल्लोगाउँ, दुले र नौरुमा पनि पहिरो गएको छ । धवलागिरी गाउँपालिका-७ धारापानी, ताकम, आटेबिर र कालफलाडामा पहिरोको जोखिमका कारण दुई सय बढी परिवार विस्थापित भएका अध्यक्ष थमसरा पुनले बताइन् । 

मालिका-५ देविस्थानको जुग्जा, रुन्मा, पन्थोक, घरिथोक, गर्जरामा करिब ९० घर विस्थापित भएका छन् । विस्थापितहरुलाई पालिका, सुरक्षा निकाय, क्लव र आमा समूहको पहलमा विद्यालय, खाली घर तथा सामुदायिक भवनमा राखिएको सिडिओ ज्ञाननाथ ढकालले बताए । 

वेपत्ताको खोजी करिब सकिएकाले राहत र पुनस्थापना तथा व्यवस्थापनमा लागिएको उनले बताए । पहिरोले एक गाउँदेखि अर्को गाउँ जोड्ने सडक र घोरेटोबाटो बगाएकाले आवतजावत ठप्प छ । 

सडक र घोरेटोबाटो नभएकाले राहत तथा उद्दारको काममा कठिनाई भएको छ । शनिबार मात्र पैदल र हेलिकप्टरबाट सेना, शसस्त्र र नेपाल प्रहरीको टोली घटनास्लमा पुगेका थिए । ६० जना भन्दा सुरक्षाकर्मी अहिले पनि घटनास्थलमा छन् । स्वयमसेवकले पनि उद्धारमा खटिएका छन्।

प्रहरीका अनुसार पहिरोको जोखिममा रहेका धवलागिरी गाउँपालिकाका ५९०, मालिकाका १९६, रघुगंगाका ८५ र बेनी नगरपालिकाका २५ जनालाई सुरक्षित ठाउँमा सारिएको छ । विस्थापितलाई खानपान र सुरक्षित बसोबासको व्यवस्थापन गर्नुपर्ने देखिएको उद्दारमा खटिएको परोपकारी संस्था ओमकुमारी शान्ति कोषका अध्यक्ष राजेश शाक्यले बताए । 

जोखिमयुक्त ठाउँमा रहेका बासिन्दालाई सुरक्षित ठाउँ खोजेर व्यवस्थापन गर्ने तयारी भएको धवलागिरी गाउँपालिकाका उपाध्यक्ष रेशम छन्त्यालले बताए । पहिरोले सामुदायिक विद्यालय, स्वास्थ्य संस्थाको भवनमा समेत क्षत्ति गरेको छ । 

पहिरोमा परेर घाइते भएका दुई जना गर्भवतीसहित १३ जनालाई हेलिकोप्टरले उद्धार गरेर बेनी, पोखरा र काठमाडौं उपचारका लागि लगिएको छ ।  ओमकुमारी शान्ति कोष र जिसि ग्रुपका अध्यक्ष नारायण जिसीको पहलमा घाइतेको उद्धार भएको हो । म्याग्दी प्रवासी नेपाली संघ (मोना), मिलन म्याग्दी, गुड नेवर्स इन्टरनेसनल, संगम र कदम म्याग्दीले राहतका सामग्री जुटाउन समन्वय गरेका छन् ।