पहिरो प्रभावित क्षेत्रमा हेलिकप्टर उडेको उड्यै, राहत सदरमुकाममै थन्कियो
साउन २, २०७७ शुक्रबार ११:४:०
बेनी : मुख्यमन्त्रीसहित प्रदेशका मन्त्रीहरु राहत लिएर आउने खबरले मालिका गाउपालिका–७ बिमका पहिरो पीडित बिहीबार बिहानैदेखि केही खुसी हुँदै उनीहरुको प्रतीक्षामा थिए । आकाशमा सेनाको हेलिकप्टर देखेपछि बाइन्दफाँटको मालिका आधारभूत विद्यालयमा बसेका पहिरो पीडित र स्थानीयबासी मुख्यमन्त्री पृथ्वीसुब्बा गुरुङ, सामाजिक विकास मन्त्री नरदेवी पुन र भौतिक पूर्वाधार मन्त्री रामशरण बस्नेतको स्वागतको तयारीमा जुटे ।
आफ्ना गुनासा, समस्या सुनाउला र केही राहत सामग्री पनि पाउला भन्ने पहिरो पीडितको आशा निराशामा बदलियो । उनीहरुको पीडा सुन्न र सहायता गर्न बिममा हेलिकप्टरबाट कोही झरेनन्। ‘बेनीबाट हेलिकप्टरबाट खाद्यान्न, लत्ताकपडा, खानेपानीको पाइप लगायतका सामग्री ल्याउने भनेर नाम टिपाएका थियौ,’ बाइन्दफाँटका खिमन जुग्जालीले भने ‘सामग्री र मन्त्री कोही पनि नआएपछि निराश भयौँ ।’
पहिरोले घर भत्काएपछि बिमका विभिन्न ठाउँका ६२ परिवारका २८४ जना बसेको मालिका आधारभूत विद्यालयको अस्थायी शिविरमा बसिरहेका छन् । शिविरमा खाद्यान्न, लत्ताकपडा, सरसफाई र खानेपानीको अभाव छ । दैनिकजसो हेलिकप्टर उडेपनि अति आवश्यक राहत सामग्री नपाएको बिमका पहिरो पीडित राजमान दर्जीले बताए ।
पहिरो प्रभावित बस्तीको निरीक्षण गर्न मराङ पुगेका मुख्यमन्त्री पृथ्वीसुब्बा गुरुङ र मन्त्रीहरु । तस्बिर: रेशम छन्त्यालको फेसबुकबाट
‘हेलिकप्टरमा आउने ठूलाबडाले पर्यटक जसरी आकाशबाटै हामीलाई परेको विपदको रमिता हेरर फर्किन्छन,’ उनले भने ‘खानेकुरा र बसोबासको समस्याका बारेमा कसैलाई वास्ता भएन् ।’ बिमको दुले, तल्लो गाउँ र नौरुमा गत शुक्रबार बिहानको पहिरोले ८ जनाको मृत्यु भएको थियो । एक जना घाइते भएका थिए ।
हेलिकप्टरमा आउनेहरुले धवलागिरी गाउँपालिकाको मराङ र शिवाङमा मात्र पुगेर विभेदपूर्ण व्यवहार गरेको बिमका पहिरो पीडितको गुनासो छ । मुख्य मन्त्री र मन्त्रीहरु आउने सेनाको हेलिकप्टरमा बेनीबाट राहत सामग्री पठाउन संघीय सांसद भूपेन्द्र थापा र प्रमुख जिल्ला अधिकारी ज्ञाननाथ ढकालले तयारी गरेका थिए ।
मन्त्रीहरु पिडितसँगको कुराकानी र स्थलगत निरीक्षण गर्ने खाली समयमा हेलिकप्टरबाट बेनीबाट बाइन्दफाँट, आरबाङ, राम्चे, शिवाङ र धारापानीमा राहत सामग्री पठाउन अर्थुङ्गेस्थित ब्यारेकमा सामान लगेर राखिएको थियो । 
मराङको राम्चेका पहिरो पिडित । तस्बिर : रेशम छन्त्यालको फेसबुकबाट
‘सडक अवरुद्ध भएका कारणल तत्कालै अतिआवश्यक सामान हेलिकप्टरबाट पठाउन तयारी गरेका थियौ,’ प्रजिअ ढकालले भने ‘सामान ढुवानी नगरी सेनाको हेलिकप्टर फर्कियो । दिनभरि माननीय (भूपेन्द्र थापा), डिएसपी साप र म ब्यारेकमा कुरेर बस्यौ । हाम्रो मेहनत खेर गयो ।’ बेनीमा सामान भएर पनि पीडितलाई पु¥याउन नसक्दा दुखित भएका उनले बताए।
मुख्य मन्त्री गुरुङले पहिरो पीडितको दीर्घकालिन बसोबास व्यवस्थापनको योजना ल्याउने आश्वासन दिए । बिहीबार मात्र होइन दैनिकजसो पहिरो प्रभावित क्षेत्रमा सेना र निजी प्रभु एयरको हेलिकप्टर उडेको छ । शनिबार पहिरोमा फसेका र घाइतेको उद्धार गरेर अस्पताल ल्याउन हेलिकप्टर प्रयोग भएको थियो । एकाघ बिरामीलाई उद्धार गर्ने बाहेक धेरै जसोले हेलिकप्टर चढेर राहत दिने बाहनामा पहिरो प्रभावित बस्तीको निरीक्षण मात्रै गरिरहेका छन् ।
अनावश्यक र असम्बन्धित मानिसहरु हेलिकप्टर चडेर पहिरो प्रभावित क्षेत्रमा जाने होडबाजीले राहत सामग्री ढुवानी प्रभावित भएको छ । भौगोलिक रुपमा विकट र दुर्गम क्षेत्रमा अवस्थित पहिरोबाट अति प्रभावित बिम, मराङ, ताकम र देविस्थान जोड्ने सडक, विद्युत र सञ्चार सेवा अवरुद्ध छन् ।
सडक नभएकै कारण दाताले पिडितका लागि दिएको राहत सामग्री बेनीको जिसस भवनको गोदाममा थन्किएको प्रतिनिधिसभा सदस्य भुपेन्द्र थापाले जानकारी दिए । धेरै जना एकै ठाउँमा बसेका र बसोबास व्यवस्थित छैन । खानेपानी आयोजनामा क्षति पुगेका कारणले दुषित पानीका कारण लाग्ने रोगको जोखिम छ ।
पहिरोका कारण धवलागिरी गाउपालिका–६ मराङको कल्लेनी, दमका, राम्चे र रिखामा १९ जनाको मृत्यु भएको थियो । पहिरोमा पुरिएका कल्लेनीका दुई जना अझै बेपत्ता छन् । मराङका ७२ घरमा पूर्ण क्षति हुँदा ५१५ जना विस्थापित भएका छन् । पहिरोबाट घरबास गुमाएका र जोखिममा परेकालार्य सामुदायिक विद्यालयमा राखिएको छ ।
सामाजिक विकास मन्त्री नरदेवी पुनले समन्वयमा कमजोरी हुँदा बेनीबाट बिहीबार पहिरो प्रभावित क्षेत्रमा राहत सामग्री ढुवानी गर्न नसकेको स्वीकार गरिन् । आन्तरिक मामिला तथा कानुन मन्त्रालयले सेनाको हेलिकप्टरलाई एक पटक मात्र उडान गर्न सिफारिस गरेकाले चाहेर पनि सामग्री लैजान नसकेका पुनले बताइन् ।
शुक्रबार हेलिकप्टर मगाएर ढुवानी गर्न पहल गर्ने उनले बताइन् ।
पहिरो पिडितको व्यवस्थापनलाई सहजा बनाउन दरवाङदेखि ताकम हुदै मुना र बिम हुदै मराङ जोड्ने सडक मर्मतका लागि जिल्ला समन्वय समितिले एक करोड बजेट बिनियोजन गरेको छ ।
प्रतिक्रिया दिनुहोस !
