पहिरोले जलविद्युत आयोजनाको संरचना बगाउँदा मगरदाङ अन्धकारमा
साउन ५, २०७७ सोमबार १३:९:०
बेनी : पहिरो लघुजलविद्युत परियोजनाको संरचना बगाएपछि म्याग्दीको मालिका गाउँपालिका - ५ को मगरदाङ अन्धकार बनेको छ । २५ किलोवाट क्षमताको मगरदाङ-डाडागाउ-आशाटोल लघुजलविद्युत परियोजनाको बाँध, नहर र विद्युतगृह गत असार २५ गते दाङखोलामा आएको बाढीले बगाएको थियो । परियोजनाको सबै संरचना बाढी र पहिरोले बगाएपछि १२५ घरधुरी अन्धकारमा बस्नुपरेको परियोजनाका अध्यक्ष कुलप्रसाद घर्तीले बताए ।
'उपभोक्ताले नगद संकलन र श्रमदान गरेर बनाएको परियोजनाको सबै संरचनाको नामनिशाना नरहने गरि पहिरोपछि आएको बाढीले बगाएको छ,' उनले भने, 'विद्युत नहुँदा अध्यारोमा रात कटाउनुपर्ने बाध्यता छ ।'
मोबाइलको ब्याट्रि चार्ज गर्न नपाएर सञ्चार सेवाबाट बञ्चित भएका छन् । रेडियो सुन्न, टेलिभिजन हेर्न पाएका छैनन् । उज्यालोका लागि मट्टितेलको टुकिको साहरा लिनुपरेको छ । एक करोड दुई लाख खर्चेर परियोजना निर्माण भएको थियो । परियोजना बनाउन सरकारी निकायबाट दुई लाख मात्र सहयोग प्राप्त भएको थियो ।
आफ्नो श्रम, पसिना र नगद खर्चीएर बनाएको परियोजना बगाउँदा मगरदाङबासी चिन्तित भएका छन् । परियोजनाको विद्युत प्रयोग गरेर सञ्चालन गरिएका घरेलु तथा साना उद्योगहरु पनि बन्द भएका छन् ।
परियोजना बन्द भएपछि उज्यालोका लागि जेनेटर खरिद गरेपनि सडक अवरुद्ध भएका कारण ढुवानी गरेर गाउँसम्म लैजान सकेका छैनन् । उपभोक्ताहरुले छ लाख २० रुपैयाँमा हजारमा १० हर्सपावर क्षमताको डिजेलबाट चल्ने जेनेरेटर खरिद गरेका थिए ।
बेनी-दरवाङ र दरवाङ-देविस्थान सडक अवरुद्ध भएका कारण जेनेरेटर बेनीबाट लैजान नसकेका हुन् । हेलिकप्टरबाट जेनेरेटर ढुवानीको ब्यवस्था मिलाइदिन आग्रह गरेका छन् । देविस्थानको पन्थोकमा रहेको गौडाखोला जलविद्युत परियोजनामा पनि बाढी पहिरोले क्षत्ति पुर्याएको छ ।
भौगोलिक रुपमा विकट क्षेत्रमा पर्ने देविस्थानको केही भागमा मात्र केन्द्रिय प्रशारण लाइनको विद्युत सुबिधा विस्तार भएको छ । पहिरोको जोखिमका कारण देविस्थानको जुग्जा, पन्थोक, मगरदाङ, ताम्ला, गर्जरा क्षेत्रका ९० घरधुरी विस्थापित भएका वडा सदस्य डिलबहादुर पुनले बताए । विस्थापितहरुलाई खाली घर, सामुदायिक भवन र विद्यालयमा राखिएको छ । झोलुङ्गे पुल र सडक पहिरोले बगाएकाले आवत जावतमा समस्या भएको छ ।
प्रतिक्रिया दिनुहोस !
