दोलखा : पछिल्लो एकमहिना यता मात्र दोलखाको साढे १२ सय हेक्टर वन क्षेत्रमा आगलागी भएको पाइएको छ । चालु आर्थिक वर्षको चैत महिनादेखि हालसम्म जिल्लाको ५२वटा वनको १२ सय ६१ हेक्टर क्षेत्रफलमा आगलागी भएको पाइएको हो ।
जिल्लाका ती वन क्षेत्रहरुमा मानवीय असावधानी, गैरजिम्मेवारीपन र लापरवाहीको कारण आगलागी भएको सम्वद्ध कार्यालयले जनाएका छन् । वनक्षेत्रमा आगलागी हुने क्रम नरोकिएको कारण क्षतिको यकिन तथ्याङ्क आइनसकेको बताइएको छ ।
जिल्लाको विभिन्न ९ वटा स्थानीय तहका गरी ४७ वटा सामुदायिक वन र ५ वटा कबुलियती वन क्षेत्रमा आगलागी भएको डिभिजन वन कार्यालय दोलखाको तथ्याङ्क छ । आगलागीको कारण वनक्षेत्रमा रहेका बिरुवा, काठ, पशुपंक्षी तथा जनावारमा ठूलो क्षति पुगेको बताइएको छ ।आगलागीको कारण मानवीय क्षति नभए पनि पिउने पानीको पाइप, केही पर्यटकीयस्थलमा क्षति पुगेको वन कार्यालयले जनाएको छ ।
आगलागी नियन्त्रणमा आ–आफ्नो क्षेत्रमा नियन्त्रणका लागि पहल गर्नुपर्ने, सम्भव नभए वन कार्यालय, सुरक्षा निकायलाई खबर गर्न डिभिजन वन कार्यालय दोलखाका प्रमुख शिव सापकोटाले आग्रह गरेका छन् ।
जिल्लाको १७ क्षेत्रमा लागेको आगोमध्ये ९ वटा क्षेत्रमा अझै पूर्णरुपले नियन्त्रणमा आउन सकेको छैन । जिल्लाको ४३८ वटा वनमध्ये ५७ वटा वनमा आगलागी भएको तथ्याङ्क छ ।
प्रतिक्रिया दिनुहोस !
