वासिङटन: विश्वकै प्रतिष्ठित मानिने पुलित्जर पुरस्कार भारतीय मूलकी अमेरिकी पत्रकार मेघा राजगोपालनले पाएकी छन् ।
हिरासत शिविरमा रहेका चिनियाँ मुस्लिम उइघुर र अन्य अल्पसंख्यक जातिहरुबारे 'बजफीड न्यूज'मा प्रकाशन गरेको खोजीमूलक समाचारका लागि उनले पुरस्कार जितेकी हुन् ।
पत्रकारिता क्षेत्रमा उत्कृष्ट कामका लागि अमेरिकाको न्यूयोर्कस्थित कोलम्बिया यूनिभर्सिटीबाट दिइने यस पुरस्कारको १०५ औँ संस्करण हो ।
गत वर्ष अफ्रिकन अमेरिकी नागरिक जर्ज फ्लोइडको हत्यामाथि गैर पत्रकार किशोरी डर्नेल्ला फ्राजीरले तयार पारेको डकुमेन्ट्रीका लागि पुलित्जर पुरस्कार प्रदान गरिएको थियो । फ्लोइडको हत्याको क्रममा डर्नेल्लाले आफ्नो स्मार्टफोनबाट खिचेको भिडियो फूटेज छोटो समयमै विश्वभर भाइरल बनेको थियो । उनको साहसी कामको प्रशंसा गर्दै गत वर्षको पुरस्कार घोषणा गरिएको थियो ।
राजगोपालन र उनका सहयोगीहरुले चिनियाँ हिरासतमा बसेर छुटेका दुई दर्जन मुस्लिम उइघुरको अन्तरवार्ता गर्दै स्याटलाइट इमेजरीको समेत प्रयोग गरेका थिए । पुरस्कार घोषणा भएपछि पत्रकार राजगोपालनले आफूले यस्तो अपेक्षा नगरेको भन्दै आश्चर्य प्रकट गरेकी छन् ।
पहिले चीनबाट रिपोर्टिङ गरेकी राजगोपालन आफ्नो स्टोरीका लागि त्यहाँबाट भागेर छिमेकी देश काजकस्तान पुगेकी थिइन् । त्यहाँ पुगेर उनले चीनको हिरासतबाट भागेका मुस्लिम अल्पसंख्यकहरुसँग अन्तर्वार्ता गरेकी थिइन् ।
आफ्नो रिपोर्टिङ अवधिभर राजगोपालनले चीन सरकारबाट उत्पीडन सहनु परेको बताइएको छ । चीनमा अल्पसंख्यकको मानव अधिकार उल्लंघन भएको घटनालाई स्टोरीको श्रृंखला नै प्रकाशन गरिएको छ । जसका आधारमा अमेरिका र अन्य पश्चिमा अधिकारीहरुले चीनको नरसंहारको रुपमा टिप्पणी गरेका छन् ।
प्रतिक्रिया दिनुहोस !
