पेरिस : साविक विजेता राफेल नाडललाई पराजित गर्दै सर्बियन स्टार नोभाक जोकोभिक फ्रेन्च ओपन टेनिसको फाइनलमा पुगेका छन् । शनिबार राति भएको प्रतिस्पर्धात्मक सेमिफाइनलमा स्पेनिस स्टार नाडाललाई स्तब्ध बनाउँदै जोकोभिचले फाइनलमा स्थान बनाएका हुन् ।
विश्व नम्बर एक जोकोभिचले नाडाललाई ३–६, ६–३, ७–६(७–४) ६–२ ले पराजित गरेका हुन् । विश्व नम्बर तीन नाडाल फ्रेन्च ओपनमा पराजित भएको यो तेस्रो पटक हो । कीर्तिमानी १३ पटकको फ्रेन्च ओपन विजेता नाडल यसअघि सन् २००९ मा रोविन सोडरलिङ र २०१५ मा जोकोभिचसँग पराजित भएका थिए । नाडललाई फ्रेन्च ओपनमा दुई पटक हराउने जोकोभिच पहिलो खेलाडीसमेत बनेका छन् ।
यस हारसँगै नाडलको कीर्तिमानी १४ पटक फ्रेन्च ओपन र २१औं ग्रान्डस्लाम जित्ने लक्ष्यमा पनि धक्का लागेको छ । फ्रेन्च ओपनमा नाडल १०८ खेल खेल्दा तेस्रो पटक मात्र पराजित भएका हुन् । जोकोभिचले भने अघिल्लो वर्ष नाडालसँग भोगेको हारको बदलासमेत लिएका छन् । अघिल्लो वर्ष जोकोभिचलाई ६–०, ६–२, ७–५ ले पराजित गर्दै नाडालले फ्रेन्च ओपनको उपाधि जितेका थिए । जोकोचिभ र नाडाल ५८औं पटक आमनेसामने भएका हुन् । जसमा जोकोभिचले ३० खेलमा जित निकाल्न सफल भएका छन् । जोकोभिच छैटौं पटक फ्रेन्च ओपनको फाइनलमा पुग्न सफल भएका हुन् । उनले सन् २०१६ मा एन्डी मुर्रेलाई पराजित गर्दै उपाधि जितेका थिए । जोकोभिच सन् २०१२, २०१४, २०१५, २०१६ र २०२० मा फाइनलमा पुगेका थिए ।
३४ वर्षीय जोकोभिचले जितपछि फ्रेन्च ओपनमा यो आफ्नो अहिलेसम्मकै उत्कृष्ट खेल भएको बताएका छन् । ‘क्लो कोर्टमा जित्न उत्कृष्ट प्रदर्शन गर्नुपर्छ’, उनले भने, ‘मैले निकै मेहनत गरेको थिएँ । त्यसकै प्रतिफल पनि पाएँ । यो मेरो जीवनकै उत्कृष्ट खेल हो ।’
कोरोना भाइरसको महामारीका कारण फ्रान्समा राति ११ बजेदेखि कफ्र्यु लगाइँदै आएको छ । यस्तो आपत्कालीन अवस्थामा पनि पाँच हजारभन्दा बढी दर्शक जोकोभिच र नाडालको खेल हेर्न उपस्थित भएका थिए ।
जोकोभिचले अब उपाधिका लागि ग्रिकका पाँचौं वरीयताका स्टेफानोस सिट्सिपाससँग प्रतिस्पर्धा गर्नेछन् । स्टेफानोसले जर्मनीका एलेक्जेन्डर जुरेभलाई पराजित गर्दै उपाधि नजिक पुगेका थिए । २२ वर्षीय स्टेफानोस पहिलो पटक ग्रान्डस्लामको फाइनलमा पुगेका हुन् ।
महिलातर्फको उपाधि भने चेक गणतन्त्रकी बारबोरा क्रेचिकोभाले उपाधि जितेकी छन् । शनिबार राति भएको खेलमा रुसकी अनास्तासिया पाब्लुचेन्कोभालाई पराजित गर्दै बारबोराले उपाधि जितेकी हुन् । एकपक्षीय खेलमा बारबोराले ६–१, २–६, ६–४ को जित निकालिन् ।
प्रतिक्रिया दिनुहोस !
