चिनियाँ कम्युनिस्ट पार्टीको सय वर्ष: गोप्य कोठे बैठकदेखि वैभवशाली मुलुक (फोटोफिचर)

बेइजिङ: चीनको सत्तारुढ कम्युनिस्ट पार्टीले बिहीबार आफ्नो स्थापनाको १००औं वार्षिकोत्सव मनाइरहेको छ । राजधानी बेइजिङस्थित तियानमेन स्क्वायरमा भव्य समारोहका बीच सत वार्षिकी मनाइएको हो ।

सत वार्षिकी समारोहमा नेता सी ले कडा रुपमा राष्ट्रवादी भाषण गरेका थिए । यस क्रममा उनले चिनियाँ कम्युनिस्ट पार्टीले मात्रै स्थायित्व कायम गर्नसक्ने र कुनै पनि विभाजनकारी विदेशी प्रयासलाई यस पार्टीले मात्रै सहजै विफल पार्नसक्ने दावी गरेका थिए ।

"कम्युनिस्ट पार्टी विना नयाँ चीन सम्भव छैन," नेता सी ले भने । सत वार्षिकी समारोहमा राजधानी बेइजिङमा भव्य रुपमा देशभक्तिपूर्ण गीत संगीत बजाउनुका साथै विभिन्न सरकारी अधिकारीहरुले राष्ट्रवादी भाषण गरेका थिए ।

चिनियाँ कम्युनिस्ट पार्टी १९२१ को जुलाइमा सांघाइस्थित एउटा सानो इटाको फ्रेन्च सुविधा घरमा एक दर्जन जति प्रतिनिधिहरुले गोप्य रुपमा स्थापना गरेका थिए । लामो गृहयुद्धपछि कम्युनिस्ट पार्टी ७२ वर्षअघि सत्तामा पुगेको थियो। त्यसबेला देशमा व्यापक परिवर्तन भए ।

यद्यपि कम्युनिस्ट पार्टीको संस्थापक तथा पूर्व अध्यक्ष माओ त्सेतुङको शासनकालमा चीन ठूलो भोकमरी, गरिबी र राजनीतिक संकटको सामना गरिरहेको थियो । यस क्रममा लाखौँ मान्छे मारिएका थिए । जुन घटनालाई लिएर चीनको आलोचना हुने गरेको छ ।

वर्तमान विश्व समुदायमा चीन दोस्रो ठूलो अर्थतन्त्र भएको देशको रुपमा स्थापित भएको छ । र यसको तिब्र आर्थिक विकासले गर्दा ठूलो अर्थतन्त्र भएको अमेरिकालाई पनि निकट भविष्यमा उछिन्ने विश्लेषण हुने गर्छ ।

पछिल्ला वर्षमा चीनमा कैयौँ ठूलो स्तरका कार्यक्रमहरू हुँदै आएका छन् र हालैका साताहरूमा पार्टीले स्वीकारेको चीनको इतिहासबारे सञ्चारमाध्यममा कार्यक्रमहरूलाई प्राथमिकतासाथ स्थान दिइएको छ।

अमेरिकी सञ्चारमाध्यम सिएनएनले चिनियाँ कम्युनिस्ट पार्टीको सत वार्षिकी समारोहसँग सम्बन्धित र केही ऐतिहासिक तस्बिरको संकलन सम्प्रेषण गरेको छ । केही उत्कृष्ट प्रतिनिधि तस्बिरहरु सिएनएनबाट यहाँ साभार गरिएको छ ।