हरेक महिना वडा वडामा नि:शुल्क स्वास्थ्य शिविर, चिकित्सकको खर्च भाटभटेनीले ब्यहोर्ने

धनगढी : धनगढी उपमहानगरपालिकाका १९ वटै वडामा हरेक महिना स्वास्थ्य शिविर गर्नका लागि भाटभटेनी सुपर मार्केटसँग सम्झौता भएको छ। धनगढी उपमहानगरपालिकाका मेयर गोपाल हमाल र भाटभटेनी सुपर मार्केटका अध्यक्ष मिनबहादुर गुरुङबीच आगामी पाँच वर्षका लागि बुधबार सम्झौता भएको हो।

धनगढी उपमहानगरपालिकाले आफ्ना १९ वटै वडामा महिनाको एक पटक (एक दिन) स्त्रीरोग विषेशज्ञ र फिजिसियन डाक्टरसहित नगरबासीको नि:शुल्क स्वास्थ्य परिक्षण गर्ने कार्यक्रम ल्याएको हो। यस कार्यक्रम अन्तर्गत हरेक वडामा ईसिज, अल्ट्रासाउन्ड, प्रयोगशाला र अरु उपचारहरु नि:शुल्क हुनेछन।

धनगढी उपमहानगरपालिकाले स्वास्थ्य शिविरको ब्यवस्थापन गरिदिने छ भने भाटभटेनी सुपर मार्केटले पाँच वर्षसम्म दुई जना विषेशज्ञ चिकित्सकको मासिक तलब र भत्ता उपलब्ध गराउने सम्झौता भएको छ। स्वास्थ्य शिविरका लागि मेयरले चढने गाडीलाई पोर्टेबल प्रयोगशाला बनाईने भएको छ।

स्वतन्त्ररुपमा चुनाव जितेका हमालले उपमहानगरबाट कुनैपनि सेवा सुविधा नलिने घोषणा गरेका छन्। त्यसैले पनि उपमहानरपालिकाले उनका लागि तयार पारेको गाडीलाई उनले घुम्ती प्रयोगशाला बनाएर वडा वडामा स्वास्थ्य सेवा दिने बताएका छन्।

भाटभटेनी सुपर मार्केटले यसै जेठ २७ गते धनगढीमा आफ्नो नयाँ शाखा उद्घाटन गर्ने तयारी गरेको छ। अध्यक्ष गुरुङले सुदूरपश्चिममा स्वास्थ्य सेवाको अवस्था कमजोर भएकाले आफूले सामाजिक उत्तरदायीत्व अन्तर्गत यो सहयोग गरेको बताए। गुरुङले दार्चुला र बैतडी जिल्लाका दुई जना जेहेन्दार विद्यार्थीलाई एमबिबिएस पनि पढाई सकेका छन्।

उपमहानगरपालिकाले साउन १ गतेदेखि हरेक वडामा महिनामा एक दिन पालो पर्ने गरि नि:शुल्क स्वास्थ्य परिक्षण कार्यक्रम सञ्चालन गर्ने भएको हो।