अछाम : साँफेबगर नगरपालिका–१४ पातलकोटको भास्कुन गाउँ करिब ८ घण्टाको पैदलदुरीमा पर्छ । नगरपालिका भनेपछि सामान्यतया विकासका पुर्वाधार पुगेको हुनुपर्छ । तर नगरपालिका भित्र पर्ने भास्कुन गाउँमा अहिलेसम्म बिजुलीसमेत पुग्न सकेको छैन ।
बिजुली मात्रै होइन त्यहाँका स्थानीयहरुको शिक्षा, स्वाथ्यमा पनि सहज पहुँच छैन । वडा कार्यालय, स्वास्थ्य चौकी र विद्यालय पुग्न जंगलको बाटोबाट करिब दुई घण्टा समय लाग्छ । हरेक निर्वाचनमा विकासका सपना देखाएका नेताहरुले भास्कुन गाउँलाई जितिसकेपछि कहिल्यै सम्झेनन् ।
२०७४ मा नेताहरुले बाढेका आश्वाशन अधुरै छ । भास्कुनमा पुगेर स्थानीय तह र संघ, प्रदेशका उम्मेदवारले सडक र बिजुली, रोजगार, स्वास्थ, शिक्षाको आश्वाशन दिएका थिए । बिजुलीको पोल मात्रै गाडेको एक वर्ष भयो । अहिलेसम्म बिजुली बाल्न पाएका छैनन् ।
पातलकोटका एकजना वृद्धालाई भोट हाल्न सिकाउँदै ।
सडक पुगे पनि वर्षायाममा सधैं अवरुद्ध हुन्छ । अहिले फेरि उम्मेदवार विकासका नारा लिएर घरदैलोमा पुगेका छन् । ‘उ बेला दुई दिनमा बिजुली पुर्याउँछौं भन्थे नेताहरु', स्थानीय ७० वर्षीया बिस्ना परियारले भनिन्, ' ५ वर्ष बित्यो बिजुली आएको छैन हाम्रा दुख उस्तै छन् । फेरि नेताहरु भोट माग्न पुगीसके ।’
गाउँमा २०६६ साल असोज २० गते गएको पहिरोले १० जनाको ज्यान गयो । केही घाइते भए । पहिरोपछि केही बसाइसराई गरी कैलालीतिर गए । गाउँ नै पुरै पहिरोको जोखिममा रहेको स्थानीय शिवबहादुर बोहराले बताए । उनले भने,‘वर्षायाममा घरमा बस्न सकिंदैन । नेताहरु भोट माग्ने बेला अहिले नै काम गर्छौं जस्तो गर्छन् । जितेपछि हामी चिन्दैन। हमीलाई त प्रयोग मात्र गर्छन् फाइदा जति सबै आफूले लग्छन् ।’
स्थानीय तहको निर्वाचनका निकै उत्साह र खुशीका साथ भोट हालेका थिए भास्कुन बासीले । घर नजिकको सरकार आएपछि विकास हुने र गाउँघरमै रोजगार पाइने आश स्थानीयहरुले गरेका थिए । विकासको नाममा सडक मात्र पुगेको ललिते ढोलीले बताए । उनले भने,‘वर्षभरी खेती गरेर खान पुग्दैन,भएको जंगली जनावरले खाइदिन्छ। सरकार छ भन्ने महसुस हामीले यो ५ वर्षमा गर्न पाएनौं ।’भास्कुन गाउँमा करिब ९३ घरधुरी छन् ।
प्रतिक्रिया दिनुहोस !
