कास्कीमा प्रतिनिधिसभामा एमालेको क्लिन स्वीप, प्रदेशमा एमाले ४ र कांग्रेस २ मा विजयी

पोखरा : आम निर्वाचन २०७९ अन्तर्गत प्रतिनिधिसभा र प्रदेशसभा निर्वाचनमा कास्की जिल्लामा प्रतिनिधिसभामा नेकपा एमालेले तीनवटै निर्वाचन क्षेत्रमा सत्ता गठबन्धनका नेताहरुलाई पराजित गर्दै क्लिन स्वीप गरेको छ । प्रदेशसभामा भने नेकपा एमालेले ४ र नेपाली कांग्रेसले २ स्थानमा जित निकालेका छन् । 

प्रतिनिधिसभा सदस्यका लागि भएको निर्वाचनमा कास्की क्षेत्र नम्बर १ मा नेकपा एमालेका मनबहादुर गुरुङ निर्वाचित भएका छन् । सत्तारुढ गठबन्धनका साझा उम्मेदवार नेपाली कांग्रेसका किशोरदत्त बराललाई २ हजार ५१९ मतान्तरले पराजित गर्दै गुरुङ विजयी भएका हुन् । नेकपा एमाले कास्कीका अध्यक्ष समेत रहेका गुरुङले २५ हजार ७०८ मत ल्याउँदा नेपाली कांग्रेस कास्कीका सभापति बरालले २३ हजार १८९ मत पाएका छन् । 

राष्ट्रिय स्वतन्त्र पार्टीका राजु राईले १० हजार ९४१ म्त ल्याएका छन् । राष्ट्रिय प्रजातन्त्र पार्टीका सूर्यबहादुर गुरुङले ३ हजार ८ मत ल्याएका छन् । गुरुङ अघिल्लो निर्वाचनमा गण्डकी प्रदेशसभा सदस्यमा निर्वाचित भएका थिए । बराल पहिलो पटक निर्वाचनमा होमिएका थिए । 

यसैगरी कास्की निर्वाचन क्षेत्र नम्बर २ प्रतिनिधिसभा सदस्यमा नेकपा एमालेकी विद्या भट्टराई विजयी भएकी छन् । निकटम प्रतिद्वन्द्वी राष्ट्रिय स्वतन्त्र पार्टीका उम्मेदवार माधवप्रसाद कँडेललाई ४ हजार ५०३ मतान्तरले पराजित गर्दै भट्टराईले दोस्रो पटक संसद भवनको यात्रा तय गरेकी हुन् ।  

भट्टराईले १६ हजार ९ सय ९८ मत पाउँदा प्रतिद्वन्द्वी स्वतन्त्र पार्टीका कँडेलले १२ हजार ४ सय ९५ मत पाएका छन् । सत्तारुढ गठबन्धनका उम्मेदवारसँग प्रतिस्पर्धा हुने ठानिए पनि स्वतन्त्र पार्टीले उछिन्दै धेरै मत ल्याएपछि गठबन्धनका साझा उम्मेदवार बनेका नेकपा एकीकृत समाजवादीका श्रीनाथ बराल ९ हजार ६ सय ५९ मतसहित तेस्रो स्थानमा रहे । 

विद्यार्थी राजनीति गर्दा अनेरास्ववियु महिला विभाग प्रमुख, केन्द्रीय सचिव र पार्टीको विभिन्न जिम्मेवारीमा समेत रहेकी भट्टराई तत्कालीन पर्यटनमन्त्री रवीन्द्र अधिकारीकी पत्नी हुन् । अधिकारीको निधनपछि २०७६ मा भएको प्रतिनिधिसभा सदस्यको उपनिर्वाचनमा प्राध्यापन पेसा छाडेर एमालेबाट प्रतिनिधिसभा सदस्यको उम्मेदवार भएर  निर्वाचित भएकी थिइन् । 

कास्की निर्वाचन क्षेत्र नम्बर ३ प्रतिनिधिसभा सदस्यमा भएको निर्वाचनमा पनि नेकपा एमालेका उम्मेदवार विजयी भएका छन् । सत्ता गठबन्धनका साझा उम्मेदवार नेकपा माओवादीका राजमी बराल जिवनलाई ५ हजार ४४५ मतान्तरले पराजित गर्दै नेकपा एमालेका उम्मेदवार दामोदर पौडेल बैरागीले पहिलो पटक प्रतिनिधिसभाको यात्रा तय गरेका हुन् । 

पौडेलले २२ हजार ९८० मत ल्याउँदा गण्डकी प्रदेशका अर्थ मन्त्री समेत रहेका माओवादीका बरालले १७ हजार ५३५ मत पाए । राष्ट्रिय स्वतन्त्र पार्टीका उम्मेदवार योगराज पौडेलले १२ हजार १८० मत ल्याएर तेस्रो भए । राष्ट्रिय प्रजातन्त्र पार्टीका जगत प्रसाद सुवेदीले २ हजार ४४२ मत ल्याएका छन् । 

गण्डकी प्रदेशसभा सदस्यमा एमालेका ४ र कांग्रेसका २ विजयी 

कास्की जिल्लामा गण्डकी प्रदेशसभाका लागि भएको निर्वाचनमा नेकपा एमालेले ४ सिट र सत्तागठबन्धनका उम्मेदवार नेपाली कांग्रेसले २ सिटमा जित निकालेका छन् । सत्तागठबन्धनकै नेकपा माओवादी उम्मेदवारहरुले भने जित निकाल्न सकेनन् । 

प्रदेशसभा निर्वाचनअन्तर्गत कास्की क्षेत्र नम्बर १ क बाट नेकपा एमालेमा उम्मेदवार खगराज अधिकारी विजयी भएका छन् । सत्ता गठबन्धनका साझा उम्मेदवार नेकपा माओवादीका दिपक कोइरालाई ३ हजार ९९६ मतले पराजित गर्दै अधिकारी निर्वाचित भएका हुन् । 

संघीय सरकारका पूर्व गृहमन्त्री समेत रहेका अधिकारीले १५ हजार ६२३ मत ल्याउँदा माओदीका उम्मेदवार कोइरालाले ११ हजार ६२७ मत ल्याएका छन् । एमालेका अधिकारी आप्नो पार्टीबाट गण्डकी प्रदेशका मुख्यमन्त्रीका दाबेदार हुन् । कोइराला पूर्व गण्डकी प्रदेश सांसद हुन् ।

हाम्रो नेपाल पार्टीका उम्मेदवार मदन बहादुर केसीले ३ हजार ६२९ मत ल्याएका छन् । यसै गरी राष्ट्रिय प्रजातन्त्र पार्टीका बाबुराम थापाले ३ हजार ५३४ मत ल्याएर चौथो स्थानमा रहेका छन् । 

कास्की १ (ख) प्रदेशसभा सदस्यकालागि भएको निर्वाचनमा पनि नेकपा एमालेकै वेदबहादुर गुरुङ श्याम विजयी भइसकेका छन् । गुरुङले सत्ता गठबन्धनका उम्मेवार नेपाली कांग्रेसका दिपक गुरुङलाई ८ सय ६७ मतले पराजित गर्दै पहिलो पटक प्रदेश सांसदको यात्रा तय गरे । उनी यसअघि मादी गाउँपालिकाका अध्यक्ष हुन् । 

बेदबहादुरले १२ हजार ६६१ मत ल्याउँदा नेपाली कांग्रेसका गुरुङले ११ हजार ७९४ मत पाए । राष्ट्रिय प्रजातन्त्र पार्टीका महेन्द्र बहादुर थापाले ३ हजार ६५६ मत पाउँदा हाम्रो नेपाली पार्टीका उम्मेदवार महेश श्रेष्ठले १ हजार ५ सय ४९ मत पाएका छन् । 

यसै गरी कास्कीको निर्वाचन क्षेत्र नम्बर २ को प्रदेश सभा सदस्यका लागि भएको निर्वाचनमा नेकपा एमाले र नेपाली कांग्रेसका उम्मेदवारले १ /१ सिट जितेका छन् । कास्कीको निर्वाचन क्षेत्र नम्बर २ (क) मा प्रदेश सभा सदस्यमा नेकपा एमालेका भिमबहादुर कार्की विजयी भएका छन् । निकटम प्रतिद्धन्दी राप्रपाका विजयबाबु भण्डारीलाई ४ हजार ६ सय ३८ मतले पछि पार्दै कार्की नयाँ अनुहारको रुपमा पहिलो पटक प्रदेश सभा प्रवेश गर्ने भएका हुन् । 

कार्कीले १० हजार ५ सय ३१ मत प्राप्त गर्दा भण्डारीले ५ हजार ८ सय ९३ मत प्राप्त गरेका छन् । सत्ता गठबन्धन तर्फका नेकपा माओवादका विश्वप्रकाश लामिछानेले ५ हजार ५ सय ४० मत प्राप्त गरे । 

कास्की निर्वाचन क्षेत्र नम्बर २ (ख) मा नेपाली कांग्रेसका उम्मेदवार विन्दुकुमार थापा विजयी भएका छन् । निकटम प्रतिद्धोन्द्धी नेकपा एमालेकी मिना गुरुङलाई १ हजार ३ सय ९ मतले पछि पार्दै गण्डकी प्रदेशका कानुनमन्त्री समेत रहेका थापा दोस्रो पटक गण्डकी प्रदेशसभाको यात्रा तय गरेका हुन् ।

थापाले ९ हजार २ सय ८० मत प्राप्त गर्दा नेकपा एमालेकी मिनार गुरुङले ७ हजार ९ सय ७१ मत प्राप्त गरिन्। राप्रपाका अरुण गिरीले ३ हजार ९ सय ३ मत प्राप्त गरे । कास्की निर्वाचन क्षेत्र नम्बर ३ मा पनि नेकपा एमाले र नेपाली कांग्रेसका उम्मेदवारले एक एक निर्वाचन क्षेत्रमा जित निकालेका छन् ।

कास्की निर्वाचन क्षेत्र नम्बर ३ (क) बाट नेकपा एमालेका गणेशमान गुरुङ विजयी भएका छन् । सत्ता गठबन्धन नेकपा माओवादीका उमेदवार दुर्गादत्त भण्डारीलाई ४ हजार ८ सय ११ मतको अन्तरले पछि पार्दै उनि विजयी भएका हुन् । गुरुङले १४ हजार ४ सय ७३ मत ल्याउँदा सत्ता गठबन्धन नेकपा माओवादीका उम्मेदवार भण्डारीले ९ हजार ६ सय ६२ मत प्राप्त गरेका छन् । राप्रपाका उमेदवार केदारनाथ पौडेलले ३ हजार ६ सय ९७ मत प्राप्त गरे । 

विद्यार्थीदेखि नै राजनीतिमा सक्रिय गुरुङ २०६९ सालमा एमाले छाडेर संघीय समाजवादीमा लागेका थिए । पहिचानको राजनीतिका लागि समाजवादीमा गएका गुरुङ गत फागुनमा एमालेमा फर्केका थिए । यसैगरी कास्की निर्वाचन क्षेत्र नम्बर ३ (ख) बाट नेपाली कांग्रेसका प्रकाश बराल विजयी भएका छन् । बरालले नेकपा एमालेका उम्मेदवार राजीव पहारीलाई ४ सय ६५ मत अन्तरले पराजीत गरेका हुन् । 

कांग्रेसका उम्मेदवार बरालले १२ हजार ३६७ मत ल्याउँदा पहारीले ११ हजार ९०२ मत ल्याएका छन् । यसैगरी राष्ट्रिय प्रजातन्त्र पार्टीका उम्मेदावर हरिराम भण्डारीले २ हजार ५६० मत पाएका छन् ।