सिरहा : सिरहामा ४ प्रतिनिधिसभा र ८ प्रदेशसभा निर्वाचन क्षेत्र छन् । नेपाली कांग्रेसले सत्ता गठबन्धनको तर्फबाट क्षेत्र-१ र २ मा प्रतिनिधिसभा तथा क्षेत्र-१ (क), क्षेत्र-३ (क) र (ख)मा प्रदेशसभा सदस्यमा उम्मेदवारी दिएको थियो। नेकपा (माओवादी केन्द्र) ले क्षेत्र–३ मा प्रतिनिधिसभा र क्षेत्र–२ (क), क्षेत्र–४ (क)मा प्रदेशसभामा उम्मेदवारी दिएको थियो । तर सत्तागठबन्धनले कतै जित हात पार्न सकेन। अन्तत: सिरहामा कांग्रेस र माओवादी शून्यमा सिमित भएको छ।
सिरहामा दुई प्रतिनिधिसभा र तीन प्रदेशसभामा निर्वाचित भएका एमाले पहिलो दल भएको छ । भने दुई प्रतिनिधिसभा र एक प्रदेशसभा जितेर जसपा दोस्रो दल भएको छ । जनमत पार्टी दुई प्रदेशसभा, एकीकृत समाजवादी र लोसपाले एक/एक प्रदेशसभामा निर्वाचित भएको छ ।
सत्ता गठबन्धनका क्षेत्र–३ (ख) प्रदेशसभामा नेकपा (एकीकृत समाजवादी)का प्रमोद यादव र क्षेत्र–४ (ख)मा लोकतान्त्रिक समाजवादी पार्टी(लोसपा)का रामबाबु यादव मात्रै निर्वाचित भएका छन् । जनमत पार्टीबाट क्षेत्र–२ (क)मा संजयकुमार यादव र क्षेत्र–४ (क)मा त्रिभुवन साह निर्वाचित भएका हुन्।
एमाले–जसपा गठबन्धनले ४ वटै प्रतिनिधिसभा क्षेत्रमा जित हासिल गरेको छ। क्षेत्र–१ मा एमालेका रामशंकर यादव कांग्रेस पूर्वमन्त्री केन्द्रीय सदस्य पदम नारायण चौधरीलाई २०८३ मतान्तरले हराउँदै निर्वाचित भए । यादवले २९४६२ र चौधरीले २७३७९ मत प्राप्त गरेका छन् ।
क्षेत्र–२ मा जसपाका पूर्वमन्त्री राजकिशोर यादवले कांग्रेसकी केन्द्रीय सदस्य तथा पूर्वमन्त्री चित्रलेखा यादवलाई ११५० मतान्तरले हराउँदै जित हासिल गरे। राजकिशोरले २४१७८ र चित्रलेखाले २३०२८ मत प्राप्त गरिन्।
क्षेत्र–३ मा एमालेका प्रभावशाली नेता पूर्वमन्त्री लिलानाथ श्रेष्ठले माओवादी केन्द्र विश्वनाथ साहलाई ११८२ मतान्तरले पराजित गरे । श्रेष्ठले २८०६४ मत पाउँदा साहले २६८८२ मत पाए।
क्षेत्र– ४ मा उद्योगपति जसपाका डा.विरेन्द्र महतोले जनमत पार्टीका विरेन्द्र साहलाई ७८०८ मतान्तरले हराउँदै विजयी भए । महतोले २४१०२ र साहले १६२९४ मत प्राप्त गरे। यहाँ एकीकृत समाजवादीका पूर्वमन्त्री धर्मनाथ साह १४६५३ मत ल्याएर तेस्रो स्थानमा रहे।
प्रदेशसभामा पनि एमाले क्षेत्र–१ (क)मा राजेन्द्र चौधरी, क्षेत्र–२ (ख)मा सत्रुधन प्रसाद सिंह र क्षेत्र–३ (क)मा मनोजकुमार सिंह निर्वाचित भएका छन् ।
पूर्वमन्त्री, पत्रकार र कलाकारको जमानत जफत
पूर्वमन्त्री सरिता गिरिले सिरहा–१ बाट प्रतिनिधिसभामा स्वतन्त्र उम्मेदवारी दिएका थिए । उनले जमानत पनि बचाउन सकेनन् । सदर मतको १० प्रतिशत मत नपाएपछि उनको जमानत जफत भएको हो । उनले जम्मा ५०२ मत पाएका थिए।
गिरि ०६४ को संविधानसभा निर्वाचनमा सदभावना पार्टीबाट समानुपातिक सांसद भएकी थिइन् । ०६९ मा डा. बाबुराम भट्टराईको पालामा मन्त्री बनेकी थिइन् । त्यसपछि पार्टी परिवर्तन गरेर ०७४ को निर्वाचनपछि जसपाबाट समानुपातिक सांसद बनिन् । विवाद वक्त्वय दिएपछि सांसद पद गुमाएकी थिइन् ।
यसैगरी अर्का पूर्वमन्त्री राजलाल यादव सिरहा–२ (क)बाट प्रदेशसभा सदस्यमा हाम्रो नेपाली पार्टीको लौरौ चुनाव चिन्हमा उम्मेदवारी दिएका थिए । उनले जमानत बचाउन सकेनन् । उनले २३७ मत प्राप्त गरे। उनी ०६४ मा तत्लकालिन मधेसी जनअधिकार फोरमबाट सिरहा–१ मा निर्वाचित भएका थिए । पछि फोरमबाट फुटेर फोरम गणतान्त्रिक पार्टी बनाएर विनाविभाग्य मन्त्री भएका थिए ।
सिरहा–२ मा तीनजना पत्रकार स्वतन्त्र र एकजना कलाकारले राप्रपाबाट प्रतिनिधिसभामा उम्मेदवारी दिएका थिए । उनीहरु सबैको जमानत जफत भएको छ । पत्रकारमा रामरिझन यादव, देवकुमार यादव र सुरेश कार्की र कलाकार मुरलीधर मिझारको जमानत बचेन।
रामरिझनले २८४, सुरेश कार्कीले ३१२ र देवकुमारले ३२ मत पाए । उनीहरु कसैले सदर मतको १० प्रतिशत ल्याउन सकेनन् । रामरिझन डा. बाबुराम भट्टराई प्रधानमन्त्री हुँदा उनको प्रेस सल्लाहाकार थिए । दर्जनौं पुस्तक पनि लेखेका छन् । कार्की रेडियो नेपालको कार्यकारी निर्देशक भएका थिए । देवकुमार पत्रकार महासंघका केन्द्रीय सदस्य हुन्।
कलाकार मुरलीधरले राष्ट्रिय प्रजातन्त्र पार्टी (राप्रपा)बाट उम्मेदवार बनेका थिए । उनले ७८२ मत मात्रै ल्याउन सके । उनको प्रचारमा राजेन्द्र लिङदेन हेलिकोप्टर चढेर खटिएका थिए।
प्रतिक्रिया दिनुहोस !
