विराटनगरमा प्रदेश जनस्वास्थ्य प्रयोगशाला सञ्चालन
विराटनगर : मोरङको विराटनगरमा सुविधासम्पन्न प्रदेश जनस्वास्थ्य प्रयोगशाला सञ्चालनमा आएको छ।
विराटनगर–१४ स्थित संक्रामक रोग तथा सघन उपचार केन्द्रसँगै प्रयोगशाला सञ्चालनमा आएको हो। बुधबार प्रयोगशालाको नवनिर्मित भवन उद्घाटन गरिएको छ।
प्रदेश १ सरकारका मुख्यमन्त्री राजेन्द्र कुमार राईले प्रयोगशाला भवनको उद्घाटन गरेका हुन्। भवनको उद्घाटन कार्यक्रममा बोल्दै मुख्यमन्त्री राईले प्रयोगशालाबाट विशिष्टिकृत सेवा प्रवाह हुने बताए।
प्रयोगशालाको नाममा हुने बेथिति, अनियमितता र आम सर्वसाधारणलाई ठग्ने कार्यको नियमन पनि प्रदेश जनस्वास्थ्य प्रयोगशालाले गर्ने उनले जानकारी दिए।
विराटनगरस्थित स्नातकोत्तर कलेजको ८ कठ्ठा १२ धुर जग्गा ३० वर्षका लागि लिजमा लिएर प्रयोगशाला भवन निमार्ण गरिएको बताइएको छ।
प्रयोगशालामा जेनरल ल्याब, नसर्ने रोग, सरुवा रोग र पीसीआर भाईरल कल्चर लगायतका परीक्षण हुने जनाइएको छ।
सेभ द चिल्ड्रेन र ग्लोबल फण्डसँगको सहायतामा प्रयोगशाला निमार्ण भएसँगै विशिष्टिकृत परीक्षणका लागि काठमाडौं र भारतका विभिन्न शहर धाउनुपर्ने बाध्यताको समेत अन्त्य भएको प्रदेश १ सरकारका स्वास्थ्य मन्त्री जयराम यादवले बताए।
प्रदेश अन्तर्गतका अन्य प्रयोगशालाको गुणस्तर मापन, शुल्कको नियमन र अनुगमनको कार्य समेत यही प्रयोगशालाले गर्ने उनले जानकारी दिए।
दातृ निकायको कुल ९ करोड ३१ लाख ८२ हजारको लागतमा निमार्ण सम्पन्न भएको प्रयोगशाला ४ तले संरचनासहितको छ।
प्रयोगशालाले स्थानीय ल्याबको नमुना परीक्षण, नीजि तथा सार्वजनिक प्रयोगशालाहरुको गुणस्तर मापन र अनुसन्धान तथा रोग नियन्त्रण कार्यमा विशेष सहयोग पुर्याउने अपेक्षा गरिएको सेभ द चिल्ड्रेन ग्लोबल फण्डका वरिष्ठ कार्यक्रम व्यवस्थापक हरिबोल बजगाईंले बताए।
२०७७ मंसिर ३० गते प्रदेश १ सरकारका तत्कालिन मुख्यमन्त्री शेरधन राईले प्रदेश जनस्वास्थ्य प्रयोगशाला भवन निर्माणको शिलान्यास गरेका थिए।
शिलान्यास भएको ६ महिनाभित्र भवनको निर्माण कार्य सकेर ८ महिनापछि सेवा सुरु गर्ने योजना थियो। तर, कोभिड महामारी लगायतका विभिन्न प्राविधिक समस्याका कारण केही ढिलाई गरी बुधबार भवनको उद्घाटन गरिएको हो।