पोखरा अन्तर्राष्ट्रिय विमानस्थलमा बुद्ध र यतिले डेमो उडान गर्दै
पुष ७, २०७९ बिहीबार १०:४९:०
पोखरा : निर्माण सम्पन्न भएर सञ्चालनको तयारीमा रहेको पोखरा अन्तराष्ट्रिय विमानस्थलमा आज बुद्ध एयर र यति एयरले प्रदर्शन (डेमो) उडान गर्दै छन् ।
बुद्ध एयरले दिउँसो २ बजे डेमो उडान गर्ने गरी तयारी गरेको बुद्ध एयर पोखराका प्रमुख गौतम बरालले जानकारी दिए । ७० जना क्षमताको जहाज पुरानो विमानस्थलबाट उडेर नयाँ विमानस्थलमा अवतरण गर्ने गरी डेमो उडान गर्ने तयारी रहेको बुद्ध एयरका प्रवक्ता दीपेन्द्र कर्णले बताए ।
यति एयरले पनि उति नै समयमा उडान गर्ने बताएको छ । ७० सिट क्षमताका जहाज पुरानो विमानस्थलबाट नयाँमा अवतरण गर्ने गरी डेमो उडानको तयारी गरिएको यति एयर पोखरा प्रमुख राम लामिछानेले बताए । पोखरा अन्तर्राष्ट्रिय विमानस्थल अंग्रेजी नयाँ वर्ष सन् २०२३ को पहिलो दिन जनवरी १ बाट संचालनको तयारीमा छ ।
विमानस्थल संचालनको तयारीकालागि आवश्यक तयारी भइरहेको पोखरा अन्तर्राष्ट्रिय विमानस्थलका प्रमुख बिक्रम गौतमले बताए । कर्मचारीलाई आवश्यक तालिम दिने देखि अफिस व्यवस्थापनको काम अन्तिम चरणमा पुगेको बताएको छ ।
आयोना बनाउन जग्गा अधिग्रहण गरेको ४६ वर्ष पछि सरकारले सन् २०२१ जुलाई १० भित्र सम्पन्न गर्ने गरी पोखरा अन्तर्राष्ट्रिय विमानस्थलको शिलान्यास २०७३ वैशख १ गते भएको थियो । कोरोनाको कारण सामान आयात प्रभावित र कामदार अभाव भएपछि एक वर्ष म्याद थपिएको थियो ।
विमानस्थल निर्माणको काम सुरु गरेको ५ वर्षमा निर्माण सम्पन्न भएको हो । कोरोना महामारीका कारण २६ असोज २०७८ मा निर्माण सम्पन्न हुनु पर्नेमा ढिला भएको चिनियाँ निर्माण कम्पनीले बताएको थियो ।
विमानस्थल निर्माणका लागि नागरिक उड्डयन प्राधिकरण र चाइना सीएएमसी इन्जिनियरिङबीच ८ जेठ २०७१ मा सम्झौता भएर निर्माण सुरु भएको थियो । २०७८ चैत १२ गते चिनियाँ विदेशमन्त्री वाङ यी नेपाल भ्रमणमा रहदा निर्माण कम्पनीले विमानस्थलका काम बाँकै रहदै नयाँ विमानस्थल नेपाल सरकारलाई हस्तान्तरण गरेको थिए ।
निर्माण सम्पन्न नहुँदै विमानस्थल हस्तान्तरण भएको भन्दै त्यतीबेला आलोचना भएको थियो । चीनको झन्डै २२ अर्ब सहुलियतपूर्ण ऋणमा विमानस्थल निर्माण भएको हो । २०३२ सालमा पहिलो पटक पोखरा अन्तर्राष्ट्रिय विमानस्थल निर्माणकालागि जग्गा अधिग्रहण गर्न सुरु भएको थियो ।
३८ सय ९९ रोपनीमा विमानस्थल रहेको आयोजनाले जनाएको छ । अन्तर्राष्ट्रिय उड्डयन संस्था (आइकाओ) को मापदण्डभित्र रहेर फोरडी मोडलमा विमानस्थल बनेको हो । यस विमानस्थलमा बोइङ ७५७ र एआरबस ३२० सम्मका विमान उडान तथा अवतरण गर्न सक्ने बताइएको छ ।
प्रतिक्रिया दिनुहोस !
