मकवानपुरमा एनसेलले विद्युत महशुल नतिरेपछि ६ वटा टावरको लाइन काटियो

हेटौंडा : मकवानपुरको थाहा नगरपालिका स्थित नेपाल विद्युत प्राधिकरण पालुङ वितरण केन्द्रले वक्यौता विद्युत महशुल नतिरेका कारण एनसेलको ६ वटा टावरको लाइन काटेको छ। लामो समयसम्म महशुल नतिरिएको कारण विद्युत लाइन काटिएको पालुङ प्राधिकरणले जनाएको हो।

पालुङ प्राधिकरणको अनुसार बढी वक्यौता भएका सिमभन्ज्याङ्ग, कुलेखानी देउराली र सल्ले, फाखेल, मार्ख तथा कुन्छालमा रहेका ६ वटा टावरहरुको लाइन काटिएको हो।

उत्तरी मकवानपुरका विभिन्न स्थानमा रहेका टावरहरुमा जडित विद्युत लाइनको वक्यौता लगातार ५ महिनादेखिको महशुल नबुझाएको कारण एनसेलका टावरहरुको प्राधिकरणले लाइन काटेको हो। पालुङ वितरण केन्द्र अन्तर्गत थाहा नगरपालिका र इन्द्रसरोवर गाँउपालिकाका विभिन्न स्थानमा एनसेलका १३ वटा टावर जडित छन्। 

उक्त टावरहरुको ७ लाख ५३ हजार वक्यौता बुझाउन बाँकी रहेको कारण बढी वक्यौता भएका ६ वटा टावरको लाइन काटिएको पालुङ वितरण केन्द्रका प्रमुख माधव न्यौपानेले बताए।

एनसेललाई पनि वक्यौता बुझाउन पटक-पटक भनिएको भए पनि वक्यौता महशुल नबुझाएकोले लाइन काटिएको र सबै टावरको महशुल नबुझाए क्रमशः सबै टावरको लाइन काटिने पनि प्रमुख न्यौपानेको भनाइ छ।

वक्यौता महशुल उठाउन विगत ३ महिनामा मात्रै पालुङ प्राधिकरणले २ सयभन्दा बढी ग्राहकको लाइन काटेको छ भने लाइन काटिएका ग्राहकहरुबाट ९० लाखभन्दा बढी बक्यौता रकम उठाइसकेको छ।