छानबिन समितिले २० वटा समस्याग्रस्त सहकारीको अत्यावश्यक कागजात मगाउने

काठमाडौं : सहकारी संस्था बचत रकम दुरुपयोग संसदीय छानबिन विशेष समितिले २० वटा समस्याग्रस्त सहकारीको अत्यावश्यक कागजात माग गर्ने निर्णय गरेको छ ।

सिंहदरबारमा आइतबार बसेको समिति बैठकले कार्यादेशको अनुसूची १ मा रहेको २० वटा समस्याग्रस्त सहकारीको बचत परिचालनको स्थीति,लेखा परिक्षण प्रतिवेदनलगायतका विवरण पठाउनका लागि पत्रचार गर्ने निर्णय गरेको समिति संयोजक सूर्य थापाले जानकारी दिए । 

उक्त सहकारीको सबै विवरण आएपछि अध्ययन गर्ने र अनुसन्धान सुरु गर्ने उनले बताए। त्यस्तै समितिले समस्याग्रस्त सहकारीको छानविनका लागि यसअघि भएका अनुभवनका बारेमा विभिन्न आयोग, समितिका संयोजकहरूसँग छलफल गरेको छ । 

समितिले २०४७ सालमा सहकारी सन्दर्भमा अन्तरिम सरकारले गठन गरेको कार्यदलका संयोजक राधाकृष्ण मैनाली, तत्कालिन समस्याग्रस्त सहकारी सम्बन्धमा जाँचबुझ आयोगका अध्यक्ष गौरिबहादुर कार्की लगायतसँग यसअघिका अध्ययन अनुसन्धानका बारेमा छलफल गरेको समिति संयोजक थापाले बताए।

पुराना अनुभवका आधारमा समितिले वस्तुनिष्ठ अध्ययन गरि निचोडमा पुग्न मद्दत पुराउने उनको भनाइ छ । गत जेठ १५ गते सहकारीको बचत रकम अपचलनसम्बन्धी छानबिन गर्न संसदीय छानबिन समिति गठन भएको थियो । 

सहकारीको रकम अपचलन प्रकरणमा उपप्रधान एवं गृहमन्त्री रवि लामिछानको नाम मुछिएपछि उनीमाथि छानविन गर्न प्रमुख प्रतिपक्ष दल नेपाली कांग्रेसले लामो समय संसद अवरोध गरेपछि सरकारले समिति गठन गरेको हो।

नेकपा एमालेका नेता थापाको नेतृत्वमा संसदीय छानबिन समिति गठन भएको छ।