कांग्रेस-एमाले गठबन्धनलाई कोइरालाको व्यंग्य : संघ र प्रदेशका मन्त्री छनोटले सुशासनलाई जिस्काइरहेको छ

काठमाडौं : नेपाली कांग्रेसका केन्द्रीय सदस्य डा. शेखर कोइरालाले कांग्रेस-एमालेको गठबन्धनको सुशासन मन्त्री छनोटमा देखिएको भन्दै कटाक्ष गरेका छन्। कांग्रेस केन्द्रीय समिति बैठकलाई सम्बोधन गर्दै डा. कोइरालाले सुशासनको धेरै प्रतिबद्धता गरेपनि संघ र प्रदेशमा मन्त्रीहरु छनौटले जिस्काइरहेको बताएका हुन्। 

उनले भने,‘वर्तमान सरकार गठनको सन्दर्भमा नेपाली काँग्रेस र एमालेले सुशासनको धेरै प्रतिबद्धता गरेका छन । तर व्यवहारमा संघ र प्रदेशमा मन्त्रीहरु छनोटले सुशासनलाई जिस्काइरहेको छ । हामी किन यसरी सुशासनको सन्दर्भमा बारम्बर चुक्दै छौँ ?’

उनले सुशासन केवल शब्द रटान र पार्टीको घोषणापत्रमा लेखिने कुरा मात्र होइन आम नागरिकले अनुभूति गर्ने कुरा भएको उनको भनाई छ । कोइरालाले भने,‘कांग्रेस नवनिर्माणको वाटो, पार्टीमा मूल्य र सिद्धान्तको नवनिर्माण अभियान, सरकारमा गएकाहरुको सुशासनप्रतिको निष्ठा र पार्टीमा आवद्ध साथीहरुको एकतावद्ध प्रयासबाट मात्र कांग्रेस रुपान्तरण सम्भव छ, तसर्थ भविष्यको कांग्रेसको नयाँ राजमार्ग यिनै वाटोवाट मात्र बन्छ भनी विश्वासका साथ हामी अघि बढौं ।’

सरकार छ भन्ने अनुभूति आम नागरिकलाई संकटको समय सबैभन्दा बढी हुने उनको तर्क छ । उनले भने,‘अहिले ती नेपालीहरुका विच सरकार पुग्नुपर्छ जो बाढी, पहिरो, दुर्घटना र प्राकृतिक प्रकोपका अनेकन् समस्याहरुसंग जुध्दै छ । तिनको उद्धार, राहत, उपचार र पुनर्स्थापना सरकारको प्रमुख दायित्य हो । म चाहन्छु हामी संलग्न भएको सरकारले यस मानवीय कार्यलाई एकछिन पनि ढिलो नगरी सम्बोधन गर्ने सक्रियता देखाओस् । ’

सरकारी निकायमा राजनीतिकरण भएर तिनको प्रभावकारिता भुत्ते भएको उनको भनाई छ। उनले भने,‘लोकतन्त्रको जग तब मात्र बलियो हुन्छ, जब संस्थालाई लोकतान्त्रीकरण र पारदर्शी ढंगले चलाइन्छ।’