काठमाडौं : सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति एवं पूर्व गृहमन्त्री रवि लामिछानेलाई बयानका लागि सरकारी वकिलको कार्यालयमा उपस्थित गराइएको छ। जिल्ला सरकारी वकिलको कार्यालयमा उनको बयान जारी छ। सरकारी वकिलको कार्यालयले आइतबार पनि लामिछानेको बयान लिएको थियो।
सहकारी ठगी प्रकरणमा काठमाडौं सरकारी वकिल कार्यालयमा आइतबार लामिछानेको बयान भइरहँदा उनका समर्थकले माइतिघरमा प्रदर्शन गरेका थिए। उनीहरूले राजनीतिक प्रतिशोधका कारण निर्दोश व्यक्तिलाई थुनामा राखेको आरोप लगाएका छन् । प्रदर्शनमा सहभागीले रवि लामिछानेलाई रिहा गर,राजनीतिक प्रतिशोध बन्द गर लगायतका प्लेकार्ड प्रदर्शन गर्दै नारा लगाएका थिए ।
शुक्रबारदेखि लामिछानेको बयान सुरू गरिएको हो। काठमाडौंमा बयान सकिएपछि उनलाई चितवन लैजाने प्रहरीको तयारी छ।
सहकारी ठगी, संगठित अपराध र सम्पत्ति शुद्धीकरण मुद्दाको कसुरमा कास्की प्रहरीको हिरासतमा रहेका लामिछानेलाई बिहीबार बेलुका बयानका लागि काठमाडौं ल्याएको थियो। लामिछानेविरुद्ध काठमाडौंको कालिमाटीस्थित स्वर्णलक्ष्मी सहकारीको बचत अपचलन गरेको अभियोगमा काठमाडौं जिल्ला अदालतबाट पक्राउ पुर्जी जारी भएको थियो।
स्वर्णलक्ष्मीकै बचत हिनामिना गरेको आरोपमा छविलाल जोशी र कुमार रम्तेलसँग काठमाडौंमा बयान लिएर कास्की पठाइसकेको छ। पोखराको सूर्यदर्शन बचत तथा ऋण सहकारी संस्थामा सहकारीको रकम ठगी र सङ्गठित अपराध कसुरमा गत कात्तिक २ गते पक्राउ परेका लामिछानेलाई जिल्ला प्रहरी कार्यालय कास्कीको हिरासतमा राखेर अनुसन्धान भइरहेको छ। उनलाई बयानका लागि यसअघि रुपन्देही लगेर पुनः पोखरा ल्याइएको थियो।
जिल्ला अदालत कास्कीको आदेशबाट पटक-पटक म्याद थप गर्दै प्रहरीले लामिछानेविरुद्ध सहकारीको रकम अपचलनसम्बन्धी कसूरमा अनुसन्धान गरिरहेको छ।
लामिछानेलाई रुपन्देहीको सुप्रिम सहकारी ठगी प्रकरणमा बयान लिएको थियो। यता साहारा चितवन सहकारीको रकम ठगी र संगठित अपराधको कसुरमा उनीविरुद्ध अनुसन्धान गर्न चितवनमा पनि पक्राउ पुर्जी जारी भइसकेको छ।
प्रतिक्रिया दिनुहोस !
