भद्रपुर झापा गोल्डकप : लिग च्याम्पियन चर्च ब्वाइज बाहिरियो, झापा ११ सेमिफाइनलमा

झापा : ‘बी’ डिभिजन लिगको तयारी गरिरहेका झापा ११ फुटबल क्लबले ‘ए’ डिभिजन लिग च्याम्पियन चर्च ब्वाइज युनाइटेड क्लबलाई हराउँदै भद्रपुर झापा गोल्डकपको सेमिफाइनलमा प्रवेश गरेको छ। मेची रंगशाला भद्रपुरमा शनिबार भएको दोस्रो क्वार्टर फाइनल खेलमा झापा ११ ले चर्च ब्वाइजलाई २-१ गोल अन्तरले हराउँदै सेमिफाइलनमा स्थान सुरक्षित गरेको हो । झापाले यसअघि पहिलो चरणमा मछिन्द्र एफसीलाई हराएको थियो।
 
झापा अब सेमिफाइनलमा सशस्त्रको एपीएफ र ट्रान्सापोर्ट युनाइटेड भुटानबीच हुने विजेता टिमसँग खेल्नेछ। आज खचाखच दर्शक भएको रंगशालामा पहिलो हाफ १-१ गोलको बराबरीमा टुङ्गिएको थियो। खेलको १४औँ मिनेटमा झापाका एरोन थापाले गोल गर्दै टिमलाई अग्रता दिलाए। चर्च ब्वाइजका किपर कृसल मोक्तान अगाडि बढेको अवस्थामा थापाले मैदानको मध्य भागबाट लगेको बललाई जाली चुमाए।

खेलको ४१औँ मिनेटमा चर्च ब्वाइजका विक्रम धिमालले गोल गर्दै खेललाई बराबरीमा ल्याए। झापाका प्रदीप बुढाथोकीले चर्चका सुजन डङ्गोललाई फाउल गरे। त्यसपछि एरिक विष्टको फ्रिकिक प्रहारलाई सदुपयोग गरी धिमालले गोल गरेका थिए। खेलको ७९औँ मिनेटमा झापाका कप्तान पेमा तामाङले टिमका लागि थप एक गोल गरे। चर्चका गोलकिपर मोक्तानले पञ्च गरेको बल क्लियर नहुँदा तामाङले टिमलाई २-१ को अवस्थामा ल्याए। 

घरेलु दर्शकको समर्थन रहेको झापाले गोल गर्ने केही अवसरहरू गुमाएको थियो। खेलको २४औं मिनेटमा प्रदीप बुढाथोकीको पेनाल्टी एरियाको हेडर चर्चका किपर मोक्तानले नियन्त्रणमा लिए। खेलको ३२औँ मिनेटमा एरोन थापाले पेनाल्टी एरिया नजिकैबाट गरेको प्रहार किपर मोक्तान रोके। पहिलो हाफको अतिरिक्त समयमा एरोनको कर्नर किकमा सुमन मगरको हेडेर क्रस बार माथिबाट बाहिरियो।

खेलको ३७औँ मिनेटमा चर्चका प्रशान्त लक्समले पेनाल्टी एरियाबाट गरेको प्रहार झापाका गोलकिपर सन्दीप लिम्बूले रोके। खेलको ३१औँ मिनेटमा उमेश राईको प्रहार गोलकिपर लिम्बूले बचाउ गरे। खेलको प्लेयर अफ द म्याच झापा ११ का पेमा तामाङ भए। उनले नगद २१ हजार र ट्रफी पाए।

खेलपछि भएको पोस्ट म्याच कन्फ्रेन्समा झापाका प्रशिक्षक अङ्गुर कुमार खड्गीले पछिल्लो समय एउटै टिमवर्कका कारण ए डिभिजन टिमहरूसँग प्रतिस्पर्धा गर्न सहज भएको बताए। खेलाडीको उत्कृष्ट प्रदर्शनले लगातार दुई खेलमा जित हात पारेको बताउँदै उनले भने, ‘खेलमा तलमाथि हुन्छ, रेफ्रीले पनि सोहीबमोजिम सही डिसिजन दिनुपर्छ।’ 

त्यस्तै चर्च ब्वाइजका व्यवस्थापक सविन डाँगीले मोफसलमा प्रतियोगिता जुधेर समस्या आएको बताए। उनले क्लबको मुख्य टिम अहिले हेटौँडामा रहेकाले सबै खेलाडी यहाँ ल्याउन नसक्दा हार व्यहोर्नु परेको बताए। आइतबार हुने तेस्रो क्वार्टर फाइनल खेल न्यु रोड टिम (एनआरटी) र बंगलादेशको काउरन बाजार प्रगति संघबीच हुने गोल्डकपका अध्यक्ष दीपेश ढकालले जानकारी दिए। गोल्डकपको विजेताले नगद १३ लाख, आकर्षक ट्रफी र मेडल र उपविजेताले नगद ७ लाख, ट्रफी र मेडल प्राप्त गर्ने उनले बताए।