वार्ता एक्लाएक्लै, सम्बन्धमा न्यानोपन
ओली–मोदी वार्ता : भेट ‘सौहार्द र फलदायी’
सगरमाथा संवादको निम्तो
चैत २३, २०८१ शनिबार ६:५२:४०
काठमाडौं : हुन्छ कि हुन्न भन्ने संशयलाई तोड्दै प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच शुक्रबार बैंककमा अत्यन्त सौहार्दपूर्ण वार्ता भएको छ । यसले दुई देशको सम्बन्धलाई अझ प्रगाढ बनाएको दुवै प्रधानमन्त्रीले व्यक्त गरेका छन् ।
बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक)को छैटौं शिखर सम्मेलन सकिएपछि भएको साइडलाइन वार्तालगत्तै दुवैले प्रसन्नता जनाउँदै ट्विट गरेका छन् । मोदीसँगको फोटोसहित प्रधानमन्त्री ओलीले ट्विटरमा लेखेका छन्, ‘मित्र भारतीय प्रधानमन्त्री मोदीजीसँग आत्मीय र सौहार्दपूर्ण भेट भयो । हाम्रो वार्ता अत्यन्त सार्थक र सकारात्मक रह्यो । यस आत्मीय भेटवार्ताप्रति म खुसी व्यक्त गर्दछु ।’
भारतीय प्रधानमन्त्री मोदीले पनि दुई देशको सम्बन्ध बलियो भएको विश्वास व्यक्त गरेका छन् । प्रधानमन्त्री मोदीले पनि फोटोसहित सामाजिक सञ्जाल एक्समा पोस्ट गर्दै सकारात्मक परिणामका विषयमा कुरा भएको बताएका छन् । उनले लेखेका छन्, ‘बैंककमा प्रधानमन्त्री केपी शर्मा ओलीसँगको भेटघाट फलदायी रह्यो ।
भारतले नेपालसँगको सम्बन्धलाई ठूलो प्राथमिकता दिएको छ । हामीले भारत–नेपाल मित्रताका विभिन्न पक्षहरू विशेषगरी ऊर्जा, कनेक्टिभिटी, संस्कृति र डिजिटल प्रविधिजस्ता क्षेत्रहरूमा छलफल गर्यौं । हामीले यस वर्षको बिमस्टेक शिखर सम्मेलनबाट प्राप्त केही प्रमुख सकारात्मक परिणामहरू विशेषगरी विपद् व्यवस्थापन र समुद्री यातायातका क्षेत्रहरूमा पनि कुरा गर्र्यौं ।’ प्रधानमन्त्री ओलीले हिन्दी र प्रधानमन्त्री मोदीले नेपाली भाषामा समेत ट्विट गरेका छन् ।
सम्बन्ध ‘थप मजबुत’
भेटवार्तामा नेपाल र भारतबीचको ऐतिहासिक, सांस्कृतिक, धार्मिक र जनस्तरको सम्बन्धमा आधारित पारस्परिक सम्बन्धलाई थप मजबुत बनाउने प्रतिबद्धता गरिएको छ । दुवै नेताबीच व्यापार, सीमापार यातायात, ऊर्जा सहकार्य तथा विकास परियोजनालगायतका द्विपक्षीय सहयोगका विषयमा विस्तृत छलफल भएको परराष्ट्र मन्त्रालयले जानकारी दिएको छ । प्रधानमन्त्री ओलीले भारतका प्रधानमन्त्री नरेन्द्र मोदीसँगको भेटमा सकारात्मक र राम्रो कुराकानी भएको भेटपछि सञ्चारमाध्यमलाई छोटो प्रतिक्रिया दिएका थिए ।
उनले भने, ‘म र भारतीय प्रधानमन्त्री मोदीजीबीच राम्रो र सकारात्मक संवाद भएको छ । अहिलेलाई यत्ति ।’ थाइल्यान्डको बैंककस्थित होटल माडारिन ओरियन्टलमा प्रधानमन्त्री ओलीको भारतीय प्रधानमन्त्री मोदीसँग करिब आधा घण्टा भेटवार्ता भएको थियो । भेटमा भारतीय प्रधानमन्त्री मोदीले नेपालका विकास लक्ष्यप्रति भारतको समर्थन दोहोर्याउँदै जलविद्युत्, पूर्वाधार र पर्यटन क्षेत्रलाई प्राथमिकता दिँदै सहकार्य अझै विस्तार गर्ने कुरामा जोड दिएका थिए । भेटमा प्रधानमन्त्री ओलीले भारतको निरन्तर सहयोगप्रति धन्यवाद ज्ञापन गर्दै आपसी सम्मान र हितमा आधारित सम्बन्धलाई मजबुत राख्नु आवश्यक रहेको बताएका थिए । उनीहरूबीच नेपाल–भारत सरकारद्वारा सञ्चालित विभिन्न साझेदारीका विषयमा पनि समीक्षा गरिएको थियो । भ्रमण दलमा रहेका एक सदस्यका अनुसार भेटको अन्तिममा प्रधानमन्त्री ओलीले भारतीय प्रधानमन्त्री मोदीलाई नेपाल भ्रमणको निमन्त्रणा पनि दिएका छन् ।
प्रधानमन्त्री ओली र मोदीबीच साइडलाइन वार्ताका लागि परराष्ट्रमन्त्री डा. आरजु राणा देउवाले विशेष पहल गरेकी थिइन् । उनले भारतीय समकक्षी एस जयशंकरसँग गरेको बारम्बारको पहलपछि ओली र मोदीबीचको भेट सम्भव भएको थियो ।
सगरमाथा संवादको निम्तो
भेटमा प्रधानमन्त्री ओलीले जेठमा हुने भनिएको ‘सगरमाथा संवाद’ कार्यक्रमको प्रमुख अतिथिका रूपमा आतिथ्यता गरिदिन समकक्षी मोदीलाई निमन्त्रणा गरेका छन् । उनले जलवायु परिवर्तनका सबालमा उक्त कार्यक्रम नेपालका लागि अपरिहार्य रहेको भन्दै त्यसलाई सफल बनाउन मोदीसँग आग्रह गरेको परराष्ट्र स्रोतले जानकारी दिएको छ ।
परराष्ट्रमन्त्री राणाले यसअघि नै प्रधानमन्त्री मोदीलाई सगरमाथा संवादको प्रमुख अतिथिको निमन्त्रणा दिइसकेकी थिइन् । चैतको पहिलो साता नयाँ दिल्ली भ्रमणका क्रममा उनले भारतीय विदेशमन्त्री एस जयशंकरमार्फत उक्त निमन्त्रणा दिएकी हुन् । यद्यपि त्यसबेला भारतीय पक्षले मोदी आउने नआउने विषयमा निधो दिएको थिएन ।
प्रधानमन्त्रीले गरेको निमन्त्रणाका विषयमा पनि भारतीय समकक्षी मोदीले विशेष चासो दिएको भ्रमण दलकै एक सदस्यले बताए । उनले भने, ‘भारतीय प्रधानमन्त्रीले सगरमाथा संवाद कार्यक्रमका विषयमा विशेष चासो लिनुभएको थियो । उहाँले कार्यक्रममा सहभागिताका विषयमा दिल्ली पुगेर यस विषयमा तालिका हेरिने कुरा गर्नुभयो । यति गम्भीर विषयमा नेपालले सगरमाथा शिविरमा गर्न लागेको कार्यक्रमको प्रशंसा गर्दै जलवायु परिवर्तनमा देखिएको प्रभावका विषयमा आफू गम्भीर रहेको बताउनु भएको थियो ।’
प्रधानमन्त्री ओली र भारतीय समकक्षी मोदीबीच यसअघि गत असोज ६ गते न्युयोर्कमा भेटवार्ता भएको थियो । अहिलेको भेट दोस्रो पटक हो । संयुक्त राष्ट्रसंघको ७९औं महासभामा भाग लिग अमेरिका गएका बेला प्रधानमन्त्री ओली र मोदीबीच करिब आधा घण्टा ‘साइडलाइन वार्ता’ भएको थियो । परराष्ट्रमन्त्री राणाको विशेष पहलमै ओली र मोदीबीच न्युयोर्कमा भेटवार्ता हुन सम्भव भएको थियो ।
वार्ता एक्लाएक्लै, सम्बन्धमा न्यानोपन
दुई प्रधानमन्त्रीबीच एक्लाएक्लै वार्ता हुनुलाई उच्च महत्वका रूपमा लिइएको छ । प्रधानमन्त्री ओलीको भ्रमण दलमा रहेका प्रमुख राजनीतिक सल्लाहकार विष्णु रिमालले ओली र मोदीबीच ‘वान अन वान’ वार्ता भएको उल्लेख गरेका छन् । 
रिमालले भेटपछि सामाजिक सञ्जालमा यस्तो लेखेका छन्, ‘प्रधानमन्त्री केपी शर्मा ओली र उहाँका समकक्षी भारतीय प्रधानमन्त्री नरेन्द्र मोदीजीबीच भेटवार्ता सम्पन्न भयो । उहाँहरूबीचको आत्मीय र सौहार्दपूर्ण भेटवार्ता अत्यन्त सार्थक र सकारात्मक रह्यो । दुई प्रधानमन्त्रीको मात्र उपस्थितिमा (वान–अन–वान) भएको यस भेटवार्तालाई प्रधानमन्त्री ओलीले आत्मीय बताउँदै खुसी व्यक्त गर्नुभएको छ ।’
भारतीय विदेश मन्त्रालयका प्रवक्ता रणधीर जैसवालले ओली र मोदीको भेटलाई ‘ऐतिहासिक र सभ्यताको सम्बन्धको बलियो जगमा आधारित मित्रता’ भनेका छन् । नेकपा एमालेका महासचिव शंकर पोखरेलले पनि ओली र मोदीको भेटपछि दुई देशबीचको सम्बन्ध झनै सुधारिएको र मित्रता मजबुत भएको उल्लेख गरेका छन् ।
उनले लेखेका छन्, ‘दृढ र अविचलित हुँदा पनि सम्बन्धलाई सुधार गर्न सकिन्छ र मित्रतालाई थप मजबुत बनाउन सकिन्छ भन्ने दृष्टान्त हो, नेपाल र भारतका प्रधामन्त्रीबीचको संवाद र संवादपछिको दुवै देशका प्रधानमन्त्रीहरूको सकारात्मक र उत्साहप्रद प्रतिक्रिया । छिमेकीहरूबीचको परस्परको विश्वास, समझदारी र सहकार्यका माध्यमबाट क्षेत्रीय शान्ति र त्यसका माध्यमबाट आर्थिक समृद्धि अबको बाटो हो भन्ने कुराले नै भविष्यमा एसिया पुनः विश्व सभ्यताको केन्द्र बन्न सफल हुनेछ । बधाई छ दुवै देशका अनुभवी प्रधानमन्त्रीहरूलाई ।’
भारतका लागि पूर्वराजदूत नीलाम्बर आचार्यले बैंककमा प्रधानमन्त्री ओली र भारतीय समकक्षी मोदीबीचको भेटले सम्बन्धको नयाँ बाटो खुलेको बताए । आचार्यले दुई देशबीच चिसोपना भएता पनि त्यसको संकेत हटेर न्यानोपनाको बाटोमा लैजाने आधार दिएको बताएका हुन् । ‘दुई प्रधानमन्त्रीबीचमा वार्तापछि देखिएको खुसीले पनि केही नयाँ बाटाहरू खोल्दै जानेछ भन्ने बुझिन्छ । दुवै देशबीच चिसोपना हटेर न्यानोपन ल्याउने विश्वास गरिन्छ,’ उनले भनेका छन् ।
यो पनि पढ्नुहोस
 | 'समृद्ध नेपाल, सुखी नेपाली’ बिम्स्टेकका अन्तरवस्तुसँग गहिरोरुपमा प्रतिध्वनित हुन्छ : प्रधानमन्त्री ओली |
प्रतिक्रिया दिनुहोस !
