डडेल्धुरा : सुदूरपश्चिमका पहाडी जिल्लाबाट तरार्ई जाने यात्रुहरूले सास्ती भोग्नुपरेको छ । डडेल्धुराको बागबजारदेखि कैलालीको गोदावरीसम्म जोड्ने भीमदत्त राजमार्गमा भइरहेको हतारको विकास निर्माण कार्यले यात्रु तथा सवारीहरूले सास्ती भोग्नुपरेको हो ।
भीमदत्त राजमार्गको सडकखण्डमा वर्षा लागेसँगै सडक कालोपत्र गर्न पुरानो कालोपत्रे खोलिएको छ । उक्त खोलिएको भागमा सडकमा खाडल र हिलाम्मे भई जोखिम बढेका कारण यात्रुहरूले सास्ती भोग्नुपरेको छ । तरार्ई र पहाडलाई जोड्ने भीमदत्त राजमार्गको कालोपत्रे सडक मर्मत गर्न विभन्न ठाउँहरूमा खाल्डाखुल्डी परिएका कारण राजमार्गको यात्रा जोखिमपूर्ण र कष्टकर भएको हो ।
राजमार्गअन्तर्गत डडेल्धुराको गैरा मेलखर्क–साहुँखर्क, हगुल्टे लेक र कैलालीको बुढीतोला क्षेत्रमा पुरानो सडक खनेर समयमा निर्माण तथा मर्मत नहुँदा समस्या उत्पन्न भएको हो । वर्षातको समयमा मर्मत गर्न पारिएका खाल्डाखुल्डीले यात्रुहरूलाई मात्र नभई सवारीचालक र सवारीसाधनमासमेत क्षति भइरहेको चालकहरूको भोगाइ रहेको छ । हिउँदमा नै गर्नुपर्ने काम वर्षातको समयमा सुरु गर्दा सबैले सास्ती खेप्न परिरहेको राजमार्गका व्यापारीहरूको भनाइ छ । अहिले हिलाम्मे छ, पानी राकिए धोलोको समस्या भोग्नुपर्ने साहुँखर्कका व्यापारीहरूको दुखेसो छ । निर्माण कम्पनीले मर्मत सुरु गरे पनि समयमा काम नसक्दा र सडकमा ग्राभेल नहाल्दा सडक हिलाम्मे र खाल्डाखुल्डी भई हिलाम्मे भएको छ ।
सडकमा पानी जमेर खाल्डाखुल्डी गहिरिँदा सवारी आवतजावत झन् जोखिमपूर्ण बनेको छ । वर्षायाममा हुने विकास निर्माण, हतारको कार्य र निर्माण कम्पनीको लापरबाहीले कष्टकर यात्रा गर्नु परिरहेको यात्रुको दुखेसो छ । वर्षामा भीमदत्त राजमार्गको सडक पार गर्नु भनेको गाडी बिग्रने वा फस्ने जोखिमका साथै दुर्घटनाको जोखिम पनि उत्तिकै रहेको सवारीचालक करन दियाले बताए । सडक खनेर छोडियो, ग्राभेल हालिएको छैन, अहिले झन् हिलो र फोहोरले यात्रु हैरान छन्, सडकपार गर्न र अर्को साइडबाट आएको गाडीलाई साइड दिन नै धौ–धौ हुने गरेको अर्का चालक रमेश अवस्थीको दुखेसो छ । निरन्तरको वर्षा र हिलाम्मे सडकले यात्रु र सवारीचालक तथा सवारीसाधनसमेत मार्कामा परिहरका छन् ।
सडक डिभिजन कार्यालय कुलपाते डोटीअन्तर्गत पर्ने यस सडकखण्डको मर्मत दुईपटक टेन्डर भए पनि निर्माण कम्पनीले समयमै जिम्मेवारी पूरा नगरेको कार्यालयको गुनासो रहेको छ । पटक–पटक गुनासोपछि सडक डिभिजनले केही ठाउँमा ग्राभेल हाल्न लगाएको भए पनि वर्षाले त्यो पनि हिलाम्मे भई झन् सडकको हैसियत नै बिग्रेको छ । साताअघि गृहमन्त्री रमेश लेखकको सुदूरपश्चिम भ्रमणका क्रममा भिमदत्त राजमार्गको हिलाम्मे ठाउँमा ग्राभेल हाल्न निर्देशन दिइए पनि स्थायी समाधान हुन सकेको छैन ।
डडेल्धुराका प्रमुख जिल्ला अधिकारी जनार्दन गौतमका अनुसार सडक डिभिजन कार्यालयलाई पटकपटक ताकेता गरी जनताले भाग्नु परेको समस्या समाधानका लागि छलफल गरिएको जनाएका छन् । निर्माण कम्पनीलाई वर्षातको समयमा नखोल्नु पर्ने सडक खोल्दा यात्रुले सास्ती भोग्नु परेकाले त्यसको समाधानका लागि निरन्तर ठेकेदारहरूलाई निर्देशन गरिएको जनाए । यसका लागि समाधानको उपाय खोजि ग्राभेल गर्नेकार्य भई रहेको तर निरनतर पानि परेकाले हिलाम्मे भएको प्रमुख जिल्ला अधिकारी गौतमको भनाइ छ । यसका साथै उक्त सडक प्रमुख जिल्ला अधिकारी गौतम आउनुपूर्व नै मर्मत गर्नका लागि खोलिएको थियो ।
समस्या समाधानका लागि निर्माण कम्पनी र सडक डिभिजनसँग समन्वय गरी केही ठाउँमा ग्राभेल हाल्ने कार्य पनि भएको तथा मुख्य राजमार्ग भएकाले तत्काल बाँकी काम सम्पन्न गर्न निर्देशन दिएको प्रजिअ गौतमले बताए । राजमार्गको समयमा गुणस्तरीय मर्मत नहुँदा यात्रु र सवारी चालक दुवैले दैनिक सास्ती खेप्न बाध्य रहेका छन् । निर्माण भइरहेको कालोपत्रेको पनि गुणस्तर मापन हुनुपर्ने सरोकारवाला जनाउँछन् ।
प्रतिक्रिया दिनुहोस !
