नेपाली क्रिकेटले नयाँ गति लिँदै गर्दा भविष्य बोकेका युवा खेलाडीको उदय सँगसँगै भइरहेको छ । यही होडमा होमिएका छन्, कपिलवस्तुका रौनक श्रीवास्तव । नेपाली क्रिकेटमा भविष्य खोजेर हिँडिरहेका १६ वर्षीय रौनक नेपाली यू–१९ हुँदै सिनियर टिममा स्थान बनाउन चाहन्छन् ।
विशेषतः गत महिना मलेसियामा सम्पन्न भएको एसीसी यू–१६ इस्ट जोन कपमा शतकसहित सर्वाधिक रनकर्ता र सर्वोत्कृष्ट खेलाडी बनेका रौनक भन्छन्, ‘मलाई यति मेहनतले यहाँसम्म चिनायो । अझै धेरै मेहनत गरेर नेपाल प्रिमियर लिग (एनपीएल), यू– १९ राष्ट्रिय टिम र सिनियर
टिमसम्म आउनु छ ।’
मैले गरेको मेहनतले मेरो र मेरो परिवारको नाम बनेको छ। म यसका लागि धेरै खुसी छु। तर, मेरा बाबा–ममीले यति मेहनतले हुँदैन, अझै मेहनत गर्नुपर्छ भन्नुहुन्छ।
नेपाली सिनियर टिमका खेलाडी बसिर अहमदको बाटो पछ्याउँदै रौनकले क्रिकेट खेल्न थाले । उनैलाई हेरेर क्रिकेटको ब्याट समातेका रौनक भन्छन्, ‘मेरो लागि सबैभन्दा ठूलो आइडल बसिर दाइ नै हो,’ उनले अन्नपूर्ण पोस्ट्सँगको कुराकानीमा भने । बसिरसँगै उनी अन्तर्राष्ट्रिय क्रिकेटमा भने भारतीय स्टार खेलाडी विराट कोहलीको खेल मन पराउँछन् । रौनक बसरको परिपक्व ब्याटिङबाट आफूले पनि स्ट्राइक रोटेट गर्दै बाउन्ड्री हान्न सिकेको बताए । ‘मैले क्रिकेट बसर दाइलाई नै हेरेर सिकेको हो,’ उनले भने ।
११ वर्षको उमेरमा कक्षा ४ मा पढ्दै गर्दा बालापनको हठले क्रिकेट खेल्न थालेका रौनक अब यही क्षेत्रमा भविष्य देख्छन् । श्री बुद्ध पद्म माध्यमिक विद्यालयबाट कक्षा ८ को पढाइ सकेका रौनकले विद्यालय शिक्षालाई बीचमै छोडेर क्रिकेटलाई अगाडि लिएर गइरहेका छन् ।
कपिलवस्तुको कृष्णनगरमा २०६६ साल भदौमा बुवा अशोककुमार र आमा पुनम श्रीवास्तवको काखमा दुई छोरीपश्चात् कान्छो सन्तानको रूपमा रौनकको जन्म भएको थियो । हुर्कंदैै जाँदा अर्काले क्रिकेट खेलेको देख्दा उनलाई पनि यो खेलमा रुचि बढ्यो । सोही रुचिलाई डोर्याउँदै २०७७ सालमा ११ वर्षका रौनक भारत गए । त्यसयता उनी भारतको उत्तर प्रदेशको सिद्धार्थनगरस्थित गौतम बुद्ध क्रिकेट एकेडेमीमा विवेकमणि त्रिपाठी र विपिन त्रिपाठीको प्रशिक्षणमा क्रिकेट खेलिरहेका छन् । उनी भन्छन्, ‘मैले यू–१६ बाट एक्सपोजर पाएँ । अब अन्य एक्सपोजरको लागि मैले थप मेहनत गर्नुपर्छ ।’
हो, एनपीएल टी–२० फम्र्याटको खेल हो। तर, मलाई स्ट्राइक रोटेट गर्दै बाउन्ड्री हानेर खेल्न सहज लाग्छ। टी–२० फम्र्याटमा त डट खेल्न हुँदैन, जसरी पनि हानेरै खेल्नुपर्छ। म यसका लागि पनि तयार छु।
...
यू–१६ मा जति मेहनत गरेको छु। त्योभन्दा डबल मेहनत र प्रदर्शन मैले यू–१९ को राष्ट्रिय टिममा पर्न गर्नुपर्छ। अझ सिनियर टिममा आउन उत्कृष्ट नै हुनुपर्छ।
...
मलाई प्रश्न गर्नेहरू मैले यू–१६ खेलेर आउँदा माला लिएर ताली बजाउन र भेट्न आएका थिए। अहिले मलाई समाजले हेर्ने नजर धेरै परिवर्तन भएको छ....।
...
रौनकको ‘कमब्याक’
सन् २०२३ मा मलेसियामा हुने यू–१६ इस्ट जोन कपको लागि विभिन्न जिल्लामा छनोट भएको थियो । सोही छनोटका क्रममा रूपन्देही जिल्लामा १४ वर्षीय रौनक श्रीवास्तवले आफूलाई परीक्षण गर्न आए । तर, उनी जिल्लाको टिममा समेत छनोट भएनन् । त्यसको दुई वर्षमा रौनकले आफूलाई प्रमाणित गर्न मेहनत गरे । ‘म पहिलो पटक जिल्लाबाट फालिएको थिएँ । तर, मलाई एकपटक जसरी भए पनि यू–१६ खेल्नु छ भन्ने हठ थियो । मैले मेहनत गरें । त्यसको फलस्वरूप मैले अवसर पाएँ,’ उनले आफ्नो विगत सुनाएँ ।
उनले यस वर्षको यू–१६ राष्ट्रिय टिममा मौका बनाउन जिल्लाको छनोट खेलमा दोहोरो शतक प्रहार गरेका थिए । यही प्रतियोगितामा गरेको प्रदर्शनले उनलाई राष्ट्रिय टिममा स्थान बनाउन सहयोग गर्यो ।
उक्त प्रतियोगितामा उनले लुम्बिनी प्रदेशबाट खेलेका थिए । उनको टिमको प्रदर्शन खासै याद गर्न लायक भएन । तर, उनको ब्याटिङले सबैको ध्यान खिच्यो । उनले गण्डकी प्रदेशविरुद्ध रौनक एक्लैले २१७ रनको पारी खेले । त्यसबेला लुम्बिनीको स्कोर ४०३ रन बनेको थियो । रौनकले नेपाली उमेरसमूहको प्रतियोगितामै कीर्तिमानी दोहोरो शतक बनाएका थिए ।
सोही मेहनतको प्रतिफल हो गत महिना मलेसियामा भएको इस्ट जोन कपमा उनले गरेको प्रदर्शन । इन्डोनेसियासँगको खेलमा ८८ रन बनाएका उनले भुटानसँगको खेलमा शतकसहित कीर्तिमानी १६८ रन बनाएका थिए । रौनकले बनाएको १६८ रन कुनै पनि नेपाली खेलाडीले ५० ओभरको प्रतियोगितामा बनाएको उच्च व्यक्तिगत स्कोर हो । उनले ५ खेलमा २९६ रन बनाए । यो नतिजासँगै उनले प्रतियोगिताको सर्वोत्कृष्ट खेलाडीको उपाधि जितेका थिए ।
यू–१६ मा पहिलो पटका राष्ट्रिय टिमको झण्डा छातीमा लिएर खेल्दा रौनकलाई बेग्लै खुसी थियो । त्यसमा पनि सर्वोत्कृष्ट खेलाडी र उच्च रनकर्ताको उपाधि जित्दा रौनकलाई छुट्टै उत्साह मिल्यो ।
‘मलाई एकदमै धेरै खुसी लागेको थियो । अन्तर्राष्ट्रिय प्रतियोगितामा सर्वोत्कृष्ट खेलाडी, उच्च रनकर्ता पाउँदा मेरो आत्मविश्वास बढेको छ । मैले अझ राम्रो गर्न सक्छु भन्ने आश र भरोसा आफूभित्र नै बढेर आएको छ,’ उनले प्रतियोगिताको अनुभव सुनाए ।
रौनकलाई प्रतियोगितापश्चात् क्रिकेट खेलेर के गर्छस् ? भनेर प्रश्न गर्नेहरू समाजमा थुप्रै थिए । उनी भन्छन्, ‘मलाई सुरुमा क्रिकेट खेलेर के गर्छस् भनेर प्रश्न उठाउँथे । अहिले सबैले मेरो प्रशंसा गर्छन् ।’
नेपाली समाजमा खेलाडी बन्छु भन्न सहज छैन । अझै पनि सफलताको शिखरमा पुगेपछि ताली बजाउने हातले संघर्ष गर्दा धर्मराएको हात समाइदिँदैन । यसको ज्वलन्त उदाहरण रौनक हुन् । उनी थप्छन्, ‘मलाई प्रश्न गर्नेहरू मैले यू–१६ खेलेर आउँदा माला लिएर ताली बजाउन र भेट्न आएका थिए । अहिले मलाई समाजले हेर्ने नजर धेरै परिवर्तन भएको छ,’ उनले अन्नपूर्णसँग भने ।
‘मैले गरेको मेहनतले मेरो र मेरो परिवारको नाम बनेको छ । म यसको लागि धेरै खुसी छु । तर, मेरो बाबा–ममीले यति मेहनतले हुँदैन, अझै मेहनत गर्नुपर्छ भन्नु हुन्छ ।’
एनपीएल र राष्ट्रिय टिमसम्म खेल्ने इच्छा
यू–१६ मा उत्कृष्ट प्रदर्शन गरेका रौनक माथिल्लो स्तरसम्म नेपालको जर्सी लगाएर खेल्न चाहन्छन् । उनी भन्छन्, ‘जसरी हाम्रो यू–१६ को कप्तान विपिन शर्माले एनपीएलबाट राम्रो एक्सपोजर पाए । म पनि एनपीएल खेल्न चाहन्छु । त्यसपछि माथिल्लो स्तरसम्म नेपालको जर्सीमा खेल्ने इच्छा छ ।’
उनले दोस्रो सिजनको एनपीएलका लागि आफ्नो नाम दर्ता गराएका छन् । उनी भन्छन्, ‘अब अगस्ट ९ तारिखमा अक्सन छ । मलाई कुनै न कुनै टिमले त लिनुहुन्छ कि भन्ने आशा छ ।’ त्यसो त यू–१६ इस्ट जोन कप एकदिवसीय फम्र्याटको खेल थियो तर, रौनकसँग स्ट्राइक रोटेट गर्दै बाउन्ड्री हान्ने क्षमता छ । उनी आफूले टी–२० फम्र्याटमा पनि राम्रो गर्न सक्ने बताए ।
‘हो, एनपीएल टी–२० फम्र्याटको खेल हो । तर, मलाई स्ट्राइक रोटेट गर्दै बाउन्ड्री हानेर खेल्न सहज लाग्छ । टी–२० फम्र्याटमा त डट खेल्न हुँदैन, जसरी पनि हानेरै खेल्नुपर्छ । म यसको लागि पनि तयार छु ।’
टी–२० फम्र्याटमा खेल्नका लागि उनी हालः भारतमा प्रशिक्षण गरिरहेका छन् । उनी भन्छन्, ‘मैले एनपीएलमा मौका पाएँ भने मैले त्यहाँ राम्रो प्रदर्शन गर्नु छ । एनपीएलमा राम्रो प्रदर्शन गरें भने मेरो लागि अन्य अवसरका ढोकाहरू खुल्नेछन् ।’
१६ वर्षका रौनक उमेरभन्दा धेरै परिपक्क तरिकाले क्रिकेटको बारेमा सोच्छन् । ‘क्रिकेट शारीरिक खेलभन्दा धेरै मानसिक खेल हो । खेल सबै दिमागको खेल हो । मानसिक स्वास्थ्य भएन भने हामीले मैदानमा खेल्न सक्दैनौ,’ उनले भने । युवा रौनक मैदानमा खेल्नुअघि योगा र ध्यान गर्छन् । जसले उनको दिमागलाई स्वस्थ बनाउने र खेलमा ध्यान दिन मद्दत गर्ने उनी सुनाउँछन् ।
उनी राष्ट्रिय टिमसम्म आइपुग्न आफ्नो तर्फबाट मेहनत गरिरहेका छन् । ‘यू–१६ मा जति मेहनत गरेको छु । त्योभन्दा डबल मेहनत र प्रदर्शन मैले यू–१९ को राष्ट्रिय टिममा पर्न गर्नुपर्छ । अझ सिनियर टिममा आउन उत्कृष्ट नै हुनुपर्छ,’ उनले भने । उनी आफ्नो लक्ष्यमा निकै समर्पित छन् । ‘राष्ट्रिय टिममा आउन निकै प्रतिस्पर्धा छ । त्यसकारण मैले मेरो मेहनत छोड्नु हुँदैन,’ रौनकले भने ।
प्रतिक्रिया दिनुहोस !
