गुलरिया : फागुन २१ गते हुने प्रतिनिधिसभा सदस्यको निर्वाचनका लागि अन्तिम मतदाता नामावली प्रकाशन भइसकेको छ । आयोगले नामावली रुजुसमेत गरिसकेको छ ।
बर्दियाको कुल ४ लाख ५९ हजार ९०० जनसंख्यामध्ये गुलरिया, मधुवन, राजापुर, ठाकुरबाबा, बारबर्दिया र बाँसगढी नगरपालिका तथा गेरुवा र बढैयाताल गाउँपालिकामा १ लाख ६३ हजार ८७३ महिला, १ लाख ५९ हजार ३८७ पुरुष र ६ जना अन्य गरी ३ लाख २३ जार २६६ मतदाता छन् । जसमा महिलाको संख्या बढी रहेको जिल्ला निर्वाचन कार्यालय बर्दियाका जिल्ला निर्वाचन अधिकारी लालबहादुर मल्लले जानकारी दिए । दुईवटा निर्वाचन क्षेत्र रहेको बर्दियामा–१ मा १ लाख ६१ हजार ४७३ जना र क्षेत्र नम्बर २ मा १ लाख ६१ हजार ७९३ जना मतदाता छन् । बर्दिया क्षेत्र नम्बर २ मा ३ सय २० जना मतदाता बढी छन् ।
बर्दिया–१ मा गुलरिया नगरपालिका, बाँसगढी नगरपालिका, बढैयाताल गाउँपालिका र बारबर्दिया नगरपालिकाको ४ देखि ११ सम्मको ८ वटा वडाहरू पर्दछन् । जसअन्तर्गत गुलरिया नगरपालिकामा ४५ हजार ४८२ मतदाता छन् । त्यस्तै बाँसगढी नगरपालिकामा ४६ हजार ६१७ र बढैयाताल गाउँपालिकामा ३८ हजार ४० मतदाता र बारबर्दिया नगरपालिकाका ८ वटा वडामा ३१ हजार ३ सय ३४ गरी १ लाख ६१ हजार ४७३ मतदाता रहेको निर्वाचन अधिकारी मल्लले प्रस्ट्याए ।
बर्दिया–२ मा मधुवन नगरपालिका, राजापुर नगरपालिका, ठाकुरबाबा नगरपालिका, गेरुवा गाउँपालिका र बारबर्दिया नगरपालिकाका १ देखि ३ सम्मका ३ वटा वडाहरू पर्दछन् । जसअन्तर्गत मधुवन नगरपालिकामा ३५ हजार ५५०, राजापुर ४५ हजार ८३५, ठाकुरबाबा ४७ हजार ७५१ र बारबर्दिया नगरपालिकाका ३ वटा वडामा ६ हजार ५६१ गरी १ लाख ६१ हजार ७९३ मतदाता रहेको उनको भनाइ छ । प्रतिनिधि तथा प्रदेससभा सदस्य निर्वाचन २०७९ मा बर्दियामा ३ लाख १५ हजार २८४ मतदाता थिए । प्रतिनिधिसभा सदस्य निर्वाचन ०८२ मा ७ हजार ९८२ मतदाता बढेको निर्वाचन कार्यालयले जनाएको छ ।
मतदाता नामावलीमा वृद्धि भए पनि गाउँ घरमा मतदाता छैनन् । वैदेशिक रोजगारी, अध्ययनलगायत विविध कारणले गर्दा मतदाता देश तथा जिल्लाबाहिर छन् । निर्वाचनकै लागि भनेर वैदेशिक रोजगारीबाट मतदाता फर्किने अवस्था छैन । नजिकका जिल्लामा अध्ययनलगायत रोजगारीका लागि पुगेका केही मतदाता मतदानमा फर्किए पनि अन्य मतदाता फर्किने अवस्थाको यकिन नभएको गुलरिया नगरपालिकाका नगरप्रवक्ता एवं वडा नम्बर ६ का वडाध्यक्ष सुधांशु प्रकाश शर्माले बताए ।
असोज महिनादेखि माघ २५ सम्म जिल्ला प्रशासन कार्यालय बर्दियाबाट राहधानीका लागि ३ हजार ४५२ जनाले आवेदन दिएका छन् । सोही अवधिमा २ हजार ७१२ जनाले पासपोर्ट बनाएर लगिसकेको प्रशासन कार्यालयमा रहेको राहदानी शाखाको तथ्यांक छ । आवेदन दिएका र पासपोर्ट लगिसकेका गरी ६ हजार १६० जना तेस्रो मुलुकको तयारीमा छन् । जिल्ला प्रशासन कार्यालय बर्दियामा दैनिक ३५ देखि ४० जना सम्म पासपोर्ट बनाउन आउने गरेको जिल्ला प्रशासन कार्यालय बर्दियाले जनाएको छ । तथ्यांकबाट पनि मतदाता नामावलीमा नाम भएका सबै मतदानमा सहभागी नहुन सक्छन् ।
प्रतिक्रिया दिनुहोस !
