सिन्धुलीमा निर्वाचन अवधिभरि मदिरा बिक्री वितरणमा रोक, उल्लंघन गरे कारबाही

सिन्धुली : फागुन २१ गते हुने प्रतिनिधि सभा सदस्य निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न सिन्धुली जिल्लाभर मदिरा बिक्री वितरण तथा सेवनमा पूर्ण प्रतिबन्ध लगाइएको छ।

जिल्ला प्रशासन कार्यालय सिन्धुलीले एक सूचना जारी गर्दै निर्वाचन अवधिभर सार्वजनिक शान्ति र सुरक्षा कायम राख्न यस्तो निर्णय गरेको हो।

सहायक प्रमुख जिल्ला अधिकारी दिपेन्द्र पौडेलद्वारा हस्ताक्षरित सूचनामा  मतदान हुने दिनभन्दा ७ दिन अगाडि अर्थात् २०८२ फागुन १४ गतेदेखि निर्वाचनको अन्तिम मत परिणाम सार्वजनिक नभएसम्मका लागि मदिरा निषेध गरिएको छ। स्थानीय प्रशासनको निर्देशन उल्लंघन गरेमा होटल व्यवसायी तथा सेवन गर्नेहरुलाई प्रचलित कानुन अनुसार कडा कारबाही गरिने चेतावनी दिइएको छ । 

प्रशासनले निर्वाचनलाई सभ्य र सुव्यवस्थित बनाउने यस कदममा जिल्लास्थित राजनीतिक दल, होटल व्यवसायी, नागरिक समाज र आम सर्वसाधारणसँग पूर्ण सहयोगको अपेक्षा गरेको छ।

जिल्लामा मदिरा बिक्री वितरण एवं सेवन निषेधको निर्णयलाई कडाईका साथ कार्यान्वयन गर्न प्रहरी तथा सुरक्षाकर्मी समेत परिचालन गरिएको छ ।निर्वाचनको समयमा हुन सक्ने सम्भावित झै-झगडा र अशान्तिलाई न्यूनीकरण गर्न मदिरा नियन्त्रण प्रभावकारी हुने विश्वास लिइएको छ।