जेनजी आन्दोलन घटनामा गण्डक सम्पर्क अधिकृतसहित तीन जना धरौटीमा छुटे
जेठ १४, २०८३ बिहीबार १०:६:१९
परासी : गत भदौ २३ र २४ गते भएको जेनजी आन्दोलनका क्रममा नवलपरासीका विभिन्न ठाउँमा भएको घटनामा संलग्न भएको अभियोगमा गण्डक भूआर्जन तथा जनसम्पर्क कार्यालय भैंसालोटनका सम्पर्क अधिकृत शोभित हलुवाईसहित तीन जना घरौटीमा छुटेका छन् । उनीहरुले अदालतमा छुट्टाछुट्टै १८ लाख ५० हजार धरौटी बुझाएर छुटेका हुन् ।
सुनवल र प्रतापपुरमा भएको आगजनी, लुटपाट तथा तोडफोड गरेको अभियोगमा उनीहरुमाथि जिल्ला अदालतमा मुद्दा दर्ता गरिएको छ । जिल्लाका विभिन्न ठाउँमा भएको आन्दोलनका क्रममा संलग्न भएको अभियोगमा प्रहरीले १०५ जनामाथि आपराधिक उपद्रव(आगो लगाएको), संगठित र अन्य कसुरमा मुद्दा चलाइएको छ ।
उनीहरुमाथि अदालतमा सुनुवाई भइरहेको जिल्ला अदालतका शाखा अधिकृत सूचना अधिकारी भोजराज खनालले जानकारी दिए । घटनामा संलग्न भएको अभियोगमा केहीलाई पक्राउ पुर्जी जारी गरिएको छ भने केही अदालतको सम्पर्कमा आएको शाखा अधिकृत खनालले बताए ।
मुद्दामाथि पुर्पक्षका लागि सुनुवाई हुँदा जिल्ला न्यायाधीश धर्मराज पौडेलको इजलासले गण्डक भूआर्जन सम्पर्क अधिकृत ‘गोलु ’भनिने शोभित हलुवाईलाई सात लाख धरौटीमा छाड्ने आदेश दिएको हो । उनीमाथि दुई वटा घटनामा संलग्न भएको अभियोगमा चार लाख ६४ हजार र दुई लाख ३६ हजार माग गरिएको थियो । शोभित हलुवाईसहितका व्यक्तिले प्रतापपुर गाउँपालिकाका अध्यक्ष उमेशचन्द्र यादवलगायतका व्यक्तिको घरमा आगजनी तथा तोडफोड गरेको अभियोग छ ।
त्यसैगरी सुनवल नगरपालिकाका मेयर विमला अर्याल, थानप्रसाद गैरे, रेशम शर्मालगायतका घरमा आगजनी र तोडफोड गरेको अभियोगमा दुई जनालाई समेत धरौटीमा छाडिएको छ । घटनामा संलग्न भएको अभियोगमा सुनवल नगरपालिका–४ का विस्नु रायमाझी तीन वटा मुद्दा दर्ता छ । उनी छ लाख ५० हजार धरौटीमा छुटेका छन् । जिल्ला न्यायाधीश डाक्टर राजेन्द्रकुमार आचार्यको इजलासले रायमाझीलाई एक लाख ५० हजार, तीन लाख र दुई लाख धरौटीमा छाड्ने आदेश दिएको हो ।
सुनवलकै घटनामा संलग्न भएको अभियोगमा सुनवल नगरपालिका–२ का सुमन कामु मगर पाँच लाख धरौटीमा छुटेका छन् । जिल्ला न्यायाधीश खेमराज भट्टको इजलासले कामुलाई एक लाख, दुई लाख ५० हजार र एक लाख ५० हजार धरौटीमा छाड्ने आदेश दिएको जिल्ला अदालतले जनाएको छ । प्रदर्शनका क्रममा जिल्लामा सरकारी, निजीसहित ६३ भन्दा बढी आगजनी र तोडफोडका घटना भएका थिए ।
तोडफोड र आगजनीबाट कुल २७ करोड बढीको क्षति भएको छ । जसमा १६ करोड बढी व्यक्तिका निजी सम्पत्ति ध्वस्त भएका छन् । राजनीतिक दलसहित संघ संस्थाको ५२ लाख बढीको क्षति भएको छ भने १० करोड बढीको सरकारी सम्पत्ति ध्वस्त भएको तथ्याङ्क छ । सबैभन्दा बढी क्षेत्र नम्बर १ का जनप्रतिनिधि र नेताका निजी सम्पत्तिमा आगजनी गरिएको थियो । यसैबीच घटनामा संलग्न भएको अभियोगमा मुद्दा दर्ता भइ फरार रहेका व्यक्तिहरुको खोजी कार्य भइरहेको जिल्ला प्रहरी कार्यालयले जनाएको छ ।
प्रतिक्रिया दिनुहोस !
