काठमाडौं : राष्ट्रिय महाधिवेशनमा होमिएको राष्ट्रिय स्वतन्त्र पार्टी (रास्वपा) को जिल्ला अधिवेशन शनिबारबाट देशभर सुरु भएको छ । पार्टीको केन्द्रीय समितिको निर्णय अनुसार शनिबार ३७ जिल्लामा अधिवेशन भएको छ भने आइतबार थप २९ जिल्लामा अधिवेशन हुने रास्वपाले जनाएको छ ।
त्यस्तै बारा जिल्ला अधिवेशन भने यही जेठ २६ गते हुने बताइएको छ । यसै क्रममा काठमाडौं जिल्लाको अधिवेशन उद्घाटनका क्रममा महामन्त्री कविन्द्र बुर्लाकोटीले पार्टीको प्रथम राष्ट्रिय महाधिवेशन अगावै ७७ मध्ये ६७ जिल्लामा अधिवेशन सम्पन्न गर्ने जानकारी दिए । बाँकी जिल्लाको अधिवेशन राष्ट्रिय महाधिवेशनपछि हुने उनले बताए । महामन्त्री बुर्लाकोटीले पछिल्लो समय पार्टीको नयाँ सदस्यता संख्या निकै बृद्धि भएको जानकारी दिए ।
उनले पार्टीभित्र नातावाद, कृपावाद र परिवारवाद स्वीकार्य नहुने विधानमा नै स्पष्ट रहेकाले अधिवेशनको दिन झुक्काएर र भ्रममा पारेर संगठनलाई अलपत्र पार्न नपाइने बताए । बुर्लाकोटीले देशको भविष्यको लागि आफूहरु राजनीतिमा जोडिएकाले भविष्यको लागि पद खोज्दै हिँड्ने जानेलाई पार्टीभित्र कुनै ठाँउ नरहेको उल्लेख गरे ।
पार्टीको बिभिन्न तहमा पदाधिकारी रहेर सोहि तहमा पुनः निर्वाचनमा सहभागी नहुनेहरुलाई एक तहमाथिको अधिवेशनमा सहभागी हुन पाउने गरी खुल्ला गरिएको उनले जानकारी दिए । साथै उनले भारतमा पार्टी सभापतिलाई गरिएको सम्मान नागरिकको जनमतको कदर भएको धारणा राखे । जेठ २६ गतेदेखि सात प्रदेशको अधिवेशनको तयारी भइरहेको रास्वपाले जनाएको छ । रास्वपाको प्रथम राष्ट्रिय महाधिवेशन आगामी असार ७ देखि ९ गतेसम्म चितवनमा गर्ने यसअघि नै निर्णय भइसकेको छ ।
प्रतिक्रिया दिनुहोस !
