शान्ता बुढा बनिन् रास्वपाको पहिलो निर्वाचित महिला जिल्ला सभापति

गुलरिया : राष्ट्रिय स्वतन्त्र पार्टी (रास्वपा) बर्दियाको सभापति पदमा शान्ता वुढाक्षेत्री निर्वाचित भएकी छिन् । उनी रास्वपाको पहिलो निर्वाचित महिला जिल्ला सभापति बनेकी छिन् । शनिवार सम्पन्न प्रथम जिल्ला अधिवेशनको निर्वाचनले ११ सदस्यीय जिल्ला कार्य समिति चयन गरेको छ ।     प्रतिद्वन्दी उदयबहादुर खत्रीलाई ११२ मतले पराजित गरेकी बुढाक्षेत्रीले १५८ मत प्राप्त गरेकी छिन् । खत्रीले ४६ मत प्राप्त गरेका छन् ।

उपसभापति पदमा दुर्गाप्रसाद थारुले १५२ मत प्राप्त गरी निर्वाचित भएका हुन् । उनका प्रतिद्वन्दी मुकेशकुमार थारुले ३५ मत प्राप्त गरे । सचिव पदमा दिपकबहादुर बिसी ले १४७ मत प्राप्त गरी विजयी भएका छन् । सचिव पदका प्रतिद्वन्दी लक्ष्मीप्रसाद न्यौपाने ५३ मतमा समेटिए । त्यस्तै सहसचिव पदमा शरषचन्द्र तिवारीले १३१ मत प्राप्त गरी प्रतिद्वन्दी रविन्द्र उपाध्यायलाई पराजित गरेको नवनिर्वाचित सचिव दिपकबहादुर बिसीले जानकारी दिए । उपाध्यायले ६३ मत प्राप्त गरे ।

खुला सदस्यतर्फ अर्जुन भण्डारी (१३३), लिला पनेरु (१२८) र गीता खड्का १०७ मत प्राप्त गरी विजयी भएका छन् । खुला सदस्यतर्फ ३ वटा पदको लागि ८ जनाको उम्मेदवारी परेको थियो । समावेशी सदस्यतर्फ दुई वटा पदमध्ये एउटा पदमा गीता परियार निर्विरोध चयन भएकी छिन् । एउटा पदमा कुनै उम्मेदवारी नपरेको सचिव बिसीले जानकारी दिए ।

त्यस्तै बर्दिया निर्वाचन क्षेत्र नम्बर १ बाट सुशिल बस्याल र २ बाट दिपनारायण श्रेष्ठ क्षेत्रीय संयोजक हुने गरी सदस्य पदमा निर्विरोध चयन भएका छन् । जिल्ला कार्यसमितिमा ८ पालिका सभापति पदेन सदस्य रहने र २ जना सदस्य जिल्ला सभापतिले मनोनित गर्ने ब्यवस्था रहेको बताइएको छ । रास्वपा बर्दियाको जिल्ला कार्यसमिति २१ जनाको हुनेछ । कुल ३०१ जना मतदाता सदस्य रहेको निर्वाचनमा २३१ मत खसेको र १५ मत बदर भएको उनको भनाई छ ।