काठमाडौं : विश्व फुटबलको महाकुम्भ फिफा विश्वकप २०२६ बिहीबार मध्यरातिबाट सुरु हुँदैछ । १०४ खेल, ४८ टोली र १६ आयोजक शहर । जुन ११ मा मेक्सिकोबाट सुरु भएर जुलाई १९ मा न्यूयोर्कमा समापन हुने विश्वकपमा यसपाली केही स्टार खेलाडीहरुलाई फुटबल समर्थकले मिस गर्नेछन् ।
लियोनल मेसीको ‘म्याजिकल फिट’, त्रिस्टियानो रोनाल्डोको ‘एक्रोब्याटिक फिनिसेज’, विंगर लामिन यामलको त्यो जादु र किलियन एम्बाप्पेको त्यो स्पीड ।
यसपालीको विश्वकपमा पनि स्टार खेलाडीको मनोरञ्जनमा कत्ति पनि कमि महसुस हुने छैन । तर, केही चर्चित खेलाडीहरुलाई भने फुटबल प्रेमीले देख्न पाउने छैनन् । यी खेलाडीहरुमा बालोन डी’ओर प्रत्यासी पनि छन् । जस्तै कि पेरिस सेन्ट जर्मनका विंगर क्भिचा भारास्केलिया । उनको टोली जर्जिया स्पेन र टर्की रहेको समूहबाट छनोट हुन असफल भयो । यसैगरी म्यानचेस्टर सिटीका गोलकिपर जियानलुइजी डोनोरुम्मा र उनका इटालियन सहकर्मी निको बरेला पनि विश्वकपमा देखिने छैनन् ।
यी हुन् विश्वकपमा नदेखिने उत्कृष्ट प्लेइङ–११
१) गोलकिपर : जियानलुइजी डोनोरुमा (म्यानचेस्टर सिटी / इटाली)
इङ्लिस क्लब म्यानचेस्टर सिटीका डोनोरुमा मोर्डन फुटबलका स्टार फुटबलर हुन् । युरोपियन च्याम्पियनसिप २०२१ मा इटालीले उपाधि चुम्दा डोनोरुमाले प्रतियोगिताकै सर्वोत्कृष्ट खेलाडीको पुरस्कार जितेका थिए । तर, २७ वर्षीय डोनोरुमाले अहिलेसम्म विश्वकपको अनुभव लिन पाएका छैनन्। उनले २०१६ मा पहिलोपटक इटालीको जर्सी लगाएका थिए ।
इटालीले अन्तिम पटक सन् २०१४ को ब्राजिल विश्वकप खेलेको थियो । त्यसयता पछिल्लो तीन संस्करण इटाली विश्वकपमा छनोट हुन सकेको छैन । क्लब फुटबलमा भएजति सबै उपाधि जितेका डोनोरुमा विश्वकपको अर्को संस्करण ३१ वर्षका हुनेछन् । त्यो विश्वकपमा पनि इटाली छनोट हुन नसके उनको करिअरले पूर्णता पाउनेछैन ।
२. राइट ब्याक : जेरेमी फ्रिमपोङ (लिभरपुल / नेदरल्यान्ड्स)
जतिबेला फ्रिमपोङ बायर लेभरक्युसनबाट लिभरपुल साढे २९ मिलियन पाउन्डमा अनुबन्ध भएका थिए । फ्रिमपोङमाथि सबैले ठूलो अपेक्षा राखेका थिए । राइटब्याक फ्रिमपोङ जाबी ओलन्सोको नेतृत्वमा लेभरक्युसनले २०२३÷२४ मा बुन्डेसलिगा जित्दाका प्रमुख सदस्य थिए ।
तर, फ्रिमपोङले प्रिमियर लिगमा इन्जुरी र लय दुबैमा संघर्ष गर्नुपर्यो । जसका कारण कूल १२ खेलमा मात्र फ्रिमपोङले पहिलो रोजाईबाट खेल्न पाए ।
विश्वकपअघि फिफा विन्डोमा सम्पन्न अन्तर्राष्ट्रिय मैत्रीपूर्ण खेलमा फ्रिमपोङले इक्वेडरविरुद्धको खेलमा वैकल्पिक खेलाडीका रुपमा प्लेइङ मिनेट्स पाएका थिए । तर, उनले मुख्य प्रशिक्षक रोनाल्ड कोमानको मन जित्न सकेनन् । फ्रिमपोङका लिभरपुल सहकर्मीहरु भर्जिल भान डाइक, रायन ग्राभनबर्च र कोडी ग्याक्पोले भने उत्तर अमेरिकामा नेदरल्यान्ड्सको जर्सी लगाउँदैछन् ।
३. सेन्टरब्याक : डीन होइसन (रियाल मड्रिड /स्पेन)
यसपाली स्पेनिस टोलीमा रियाल मड्रिडका खेलाडीको संख्या शून्य छ । सेन्टरब्याक डीन होइसन यसै सिजन मात्र बोर्नमाउथबाट स्पेनिस जायन्ट रियालमा अनुबन्ध भएका थिए । तर, उनी अमेरिका जाने टोलीमा अटाउन सकेनन् ।
अघिल्लो वर्ष मात्र अन्तर्राष्ट्रिय क्याप जितेका होइसनले अहिलेसम्म स्पेनका लागि ७ खेल खेलेका छन् । सिजनका सुरुआती चरणमा प्रशंसनीय प्रदर्शन गरेका २१ वर्षीय होइसनले पछि आफ्नो उत्कृष्ट लयलाई कायम राख्न सकेनन् । जसका कारण मुख्य प्रशिक्षक डी ला फुयन्टेले उनको ठाउँमा बार्सिलोनाका एरिक गार्सियालाई बढी विश्वास गरे ।
४. सेन्टरब्याक : ह्यारी मग्वायर (म्यानचेस्टर युनाइटेड-इङ्ल्यान्ड)
म्यानचेस्टर युनाइटेडका सेन्टरब्याक ह्यारी मग्वायरले इङ्ल्यान्डको अन्तिम टोलीमा स्थान बनाउन सकेनन् । जब मुख्य प्रशिक्षक थोमस टुचेलले अन्तिम नामावली सार्वजनिक गरे, मग्वायरले सामाजिक सञ्जालमार्फत आफ्नो दुखेसो नै पोखे । ६६ अन्तर्राष्ट्रिय क्याप जितेका मग्वायर आफ्नो तेस्रो विश्वकप खेल्ने मुडमा थिए । उनका लागि अमेरिकाको यात्रा पाँचौं अन्तर्राष्ट्रिय इभेन्ट हुँदै थियो । तर, टुचेलको मनमा मग्वायर थिएन । टुचलले मग्वायरको ठाउँमा ज्यारेल क्वान्साह र एज्री कोन्सालाई जिम्मेवार िथिए । विश्वकप २०२६ मा यदि कोही अनुभवी खेलाडी छुटेका छन् भने ती मग्वायर नै हुन् ।
५. लेफ्टब्याक : आल्भारो क्यारेरास (रियाल मड्रिड-स्पेन)
होइसनसँगै क्यारेरासले पनि आफ्नो पहिलो विश्वकप अनुभवका लागि अझै कुर्नुपर्ने भएका छन् । यस सिजन क्यारेरासले लामिन यामाल र मोहम्मद सलाह जस्ता स्टार विंगरहरुलाई ‘इन्डिभिज्योल डुवल्स’मा पाखा लगाएका थिए । तर, २२ वर्षीय क्यारेरास अमेरिका जाने टोलीमा अटाएनन् । डी ला फुयन्टेले बार्सिलोनाका एलेहान्ड्रो बाल्डेलाई पनि टोलीमा समावेश गरेका छैनन् । यी दुईको ठाउँमा चेल्सीका मार्क कुकुरेया र लेभरक्युसनका एलेहान्ड्रो ग्रिमाल्डोलाई मौका दिएका छन् ।
६. सेन्ट्रल मिडफिल्डरः एड्वार्डो कामाभिंगा (रियाल मड्रिड / फ्रान्स)
फ्रान्सका मुख्य प्रशिक्षक डिडियर डेस्च्याम्पले यसपालि केही चर्चित अनुहारलाई टोलीमा राख्न सकेनन् । पिएसजीका गोलकिपर लुकास सेभालिय र लोनमा टोटनहम हटस्पर्शबाट खेलिरहेका फरवार्ड रन्डाल कोला मुवानी अन्तिम २६ सदस्यीय टोलीमा अटाउन सकेनन् ।
यसबीच भर्सटाइल खेलाडीको छवि भएका मिडफिल्डर एड्वार्डो कामाभिंगाले पनि विश्वकप गुमाउँदैछन् । यस सिजन कामाभिंगालाई इन्जुरीले निकै सतायो । जसका कारण उनले हकलाग्दो प्लेइङ मिनेट्स पनि पाउन सकेनन् । एनगोलो कान्टे, औरिलियन चुवामेनी, एड्रिअन राबियोट र वारेन जायर–एमरी डेस्च्याम्पको सेन्ट्रल मिडफिल्ड विकल्प बने ।
७. सेन्ट्रल मिडफिल्डरः म्याटियस फर्नान्डेज (वेस्ट ह्याम /पोर्चुगल)
फर्नान्डेजलाई आँखा लगाइरहेका क्लबहरु धेरै छन् । आगामी सिजनका लागि समर ट्रान्सफर विन्डोमा वेस्ट ह्यामका फर्नान्डेजलाई लिन दौडधूप हुनेछ नै । तर, उनले विश्वकपमा आफ्नो कला भने प्रस्तुत गर्न पाउनेछैनन् ।
इङ्लिस प्रिमियर लिगमा आफ्नो प्रदर्शनका कारण सबैका ध्यान तानेका फर्नान्डेजले रोबोर्टो मार्टिनेजको अन्तिम टोलीमा स्थान बनाउन सकेनन् । यद्यपि २१ वर्षीय फर्नान्डेज एकैपटक मात्र पोर्चुगलको जर्सीमा देखिएका छन् । उनले गत अप्रिलमा अमेरिकाविरुद्ध खेलेका थिए । जतिबेला उनले ब्रुनो फर्नान्डेजलाई प्रतिस्थापन गरेका थिए । वेस्ट ह्यामअघि फर्नान्डेजले साउथह्याम्पटनबाट खेलेका थिए । लगातार दुई सिजन उनी रेलिगेसनमा पर्ने टोलीको सदस्य रहे । त्यसैले पनि उनको विश्वकप सपनामा बाधा उत्पन्न गरेको बुझ्न सकिन्छ ।
८. राइट विंगर : कोल पाल्मर (चेल्सी / इङ्ल्यान्ड)
पछिल्लो साढे दुई वर्ष अट्याकिङ मिडफिल्डर /विंगर कोल पाल्मरले विश्व फुटबलको ध्यान ताने । इङ्ल्यान्डले युरोपियन च्याम्पियनसिप २०२४ मा फाइनलसम्मको यात्रा गरेको थियो । पाल्मर प्रतियोगितामा खुबै छाए । त्यस सिजन पाल्मरले चेल्सीका लागि कूल २५ गोल पनि गरेका थिए ।
सिजन २०२४/ २ ५ मा पनि पाल्मरको लयले निरन्तरता पायो । उनकै प्रेरणादायी प्रदर्शनमा चेल्सीले पिएसजीलाई हराउँदै फिफा क्लब विश्वकपको पनि उपाधि जितेको थियो । तर, सिजन २०२५ /२६ सिजन पाल्मरका लागि खास रहन सकेन । उनको प्रर्दशनले टुचेललाई प्रभावित बनाउन सकेन । यद्यपि इङ्ल्यान्डका समर्थकले उनका बारेमा अझै पनि तर्क गर्न छाडेका छैनन् ।
९. सेन्ट्रल अट्याकिङ मिडफिल्डरः जाओ पेड्रो (चेल्सी-ब्राजिल)
ब्राजिलका मुख्य प्रशिक्षक कार्लो एन्सिलोटीले जाओ पेड्रोको निर्णय एकदमै कठिन भएको स्विकारेका थिए । ब्राजिलियन समर्थकका लागि नेइमारको समावेशीकरण जति उत्साहपूर्ण थियो, पेड्रो टोलीमा नपर्नुको दुःख त्यो भन्दा बढी थियो ।
२४ वर्षीय पेड्रोले एन्सिलोटीको नेतृत्वमा पछिल्ला चारमध्ये तीनमा राष्ट्रिय टोलीको जर्सी लगाएका थिए । यस सिजन चेल्सीका ३२ गोलमा पेड्रोको संलग्नता छ । ६ वर्षयता इङ्लिस फुटबलमा रमाइरहेका पेड्रोले सन् २०२४ को कोपा अमेरिका पनि गुमाएका थिए । उनीसँगै आर्सनलका ग्राब्रियल जेसुस र टोटनहमका रिचार्लिसनले पनि अन्तिम टोलीमा स्थान बनाउन सकेनन् । यी खेलाडीहरुको ठाउँमा एन्सिलोटीले इगोर थियागो, रायन र एन्ड्रिकलाई मौका दिएका छन् ।
१०. लेफ्ट विंगर : फिल फोडेन (म्यानचेस्टर सिटी-इङ्ल्यान्ड)
पाल्मर रियाल मड्रिडका राइटब्याक ट्रेन्ट एलेक्सेन्डर आर्नल्ड इङ्ल्यान्डको टोलीमा समावेश हुन नसकेका स्टार खेलाडी हुन् । यद्यपि यसपाली इङ्ल्यान्डले सबैभन्दा बढी कसैलाई मिस गर्नेछ त ती लेफ्ट विंगर फिल फोडेन हुन् ।
सन् २०२० मा अन्तर्राष्ट्रिय डेब्यू गरेका फोडेनले अन्तर्राष्ट्रिय मञ्चमा आफ्नो प्रभुत्व भने जमाउन सकेका छैनन् । व्यावसायिक फुटबलमा भने उनको लय सानदार रहँदै आएको छ । २०२३ /२४ सिजनमा उनले सबै प्रतियोगितागरि कूल २७ गोल गरे । त्यो सिजन उनले ‘पिएफए प्लेयर अफ दि यर’को पुरस्कार पनि जिते । दुई वर्ष अगाडि फोडेनले आगामी विश्वकपमा स्थान बनाउँदैनन् भन्ने कुरा सायदै कसैले सोचेको हुनुपर्छ ।
११. स्ट्राइकर : करिम अडेमी (बोरुसिया डर्टमन्ड-जर्मनी)
पछिल्ला वर्षहरुमा बोरुसिया डर्टमन्डका फरवार्ड करिम अडेमीले आफूलाई विश्वकै उत्कृष्ट स्ट्राइकरका रुपमा आफूलाई उभ्याएका छन् । दुई वर्षअघि डर्टमन्डको च्याम्पियन्स लिग दौडमा उनले सानदार प्रदर्शन गरेका थिए ।
डर्टमन्ड २०२३ /२४ को च्याम्पियन्स लिगमा उपविजेता बनेको थियो । दुई वर्षको अन्तरालमा अडेमीले आफ्नो लय र फिटनेसमा संघर्ष गर्नुपरेको छ । जसका कारण उनले यसपाली २३ खेलमा मात्र पहिलो रोजाईमा खेल्न पाए । मुख्य प्रशिक्षक युलियन नागेल्सम्यानले उनको ठाउँमा डोर्टमन्डकै म्याक्सिमिलियन बेयरलाई समावेश गरेका छन् । अडेमीले सन् २०२५ मा सात पटक राष्ट्रिय टोलीको जर्सी लगाए । यस वर्ष उनले प्लेइङ मिनेट्स पाएका छैनन् ।
प्रतिक्रिया दिनुहोस !
