मलेसियाः अवैधरुपमा अष्ट्रेलिया र अमेरिका जान लागेका १६ जना नेपाली फिलिपिन्सबाट पक्राउ परेका छन् । पक्राउ परेका्मध्ये सातजनालाई मलेसियास्थित नेपाली दूतावासको सहयोगमा नेपाल फर्काइएको छ ।
९ जना भने घर फर्किन नमानेपछि उद्धार गर्न नसकिएको दूतावासले जनाएको छ ।
उनीहरु फिलिपिन्सदेखि पुर्व प्रशान्तमहासागर क्षेत्रमा अवस्थित टापुहरुको राज्य फेडरेटेड् स्टेट्स् अफ माइक्रोनेसियाको याप राज्यमा पक्राउ परेका थिए । पक्राउ परेकामध्ये सातजनालाई जुन २५ मा उद्धार नेपाल गरी पठाइएको छ ।
दूतावासका अनुसार विदेशी तथा नेपाली मानवतस्कर गिरोहले अमेरिका र अष्ट्रेलिया पठाइदिन्छु भनेर मोटो रकम असुली नेपालबाट मलेसिया र इन्डोनेसिया हुँदै डुंगामा उक्त देशको समुद्रीक्षेत्रमा कागजातविहीन अवस्थामा छोडेका थिए ।
उनीहरुलाई माइक्रोनेसियाका अद्यागमन अधिकारीहरुले पक्राउ गरी घर फिर्ती केन्द्रहरुमा राखेका थिए ।
१६ जनामध्ये केहीले संयुक्त राष्ट्रसंघीय शरणार्थाी उच्चायोगसमक्ष शरणको लागि आवेदन गरेको बुझिएको छ ।
दूतावासको सहयोगमा घर फर्किनेमा वसन्तवहादुर दर्लामी पाल्पा, प्रविन लामा चितवन, सोमबहादुर लामाथिंङ मकवानपुर, सन्जीव राई इलाम, स्याम्युल तामाङ चितवन, अमितकुमार साह धनुषा र जयराम वाइवा, चितवन रहेका छन् ।
उनीहरुमध्ये नेपाल फर्काउन नसकिएकाहरुलाई अहिले युएनएचसिआर र आइओएमको निगरानीमा राखिएको नेपाली दूतावास मलेसियाले जनाएको छ । नेपाली दूतावास मलेसियाले फिलिपिन्सका लागि समेत काम गर्दै आएको छ ।
प्रतिक्रिया दिनुहोस !
