काठमाडौं: रियल स्कुल अफ नेपाल २०१६ को ग्रान्ड फिनाले सम्पन्न भएको छ । शुक्रबार डीएभी सुशील केडिया विश्व भारती स्कुलमा भएको उक्त कार्यक्रममार्फत नारायणघाटको सैनिक आवासीय महाविद्यालय रियल स्कुल अफ नेपाल २०१६ घोषित भएको छ ।
त्यस्तै ललितपुरको जेम्स विद्यालय र पोखराको मदरल्यान्ड उच्च माध्यमिक विद्यालय क्रमशः दोस्रो र तेस्रो विजयी विद्यालय घोषित भएको आयोजकले जनाएको छ । रियल स्कुल अफ नेपालका विजयी विद्यालयले एक लाख नगद पुरस्कार र विजयी विद्यालयका प्रत्येक सहभागी विद्यार्थीले ल्यापटप प्राप्त गरेका छन् ।
दोस्रो र तेस्रो आउने विद्यालयले क्रमशः नगद पुरस्कार ५० हजार र २५ हजार प्राप्त गरेका छन् भने सहभागी विद्यार्थीले क्रमशः पाँच हजार र तीन हजारका दरले नगद पुरस्कार प्राप्त गरेका छन् । त्यस्तै सिनियर समूहका क्रियाकलापअन्तर्गत एक्सटेम्पोरमा अरनिको उच्च माध्यमिक विद्यालयका गुञ्जन अग्रवाल विजयी भएका छन् ।
डान्समा चिल्ड्रेन इन्भारोमेन्ट स्कुलका आनन्द कँडेल र फुटबल जगलिङतर्फ डल्लु आवासीय विद्यालय बिक्की महर्जन विजयी भएका छन् । जुनियर समूहअन्तर्गत पेन्टिङमा मदरल्यान्ड उच्च माध्यमिक विद्यालयका अल्भिना थापा, थ्री मिनेट टु फेममा सैनिक आवासीय महाविद्यालयका शिशिर श्रेष्ठ र स्कोर द रियल गोलमा प्यारामाउन्ट इङलिस बोर्डिङ उच्च माध्यमिक विद्यालयका अंकित रसकोटी विजयी भएको आयोजकले जनाएको छ ।
प्रतिक्रिया दिनुहोस !
