भारतीय गुरु भन्छन्ः नेपाल हिन्दु राष्ट्र हुनुपर्छ र राजा रहनुपर्छ

काठमाडौंः भारतीय जगद्गुरु शंकराचार्य बासुदेवानन्द सरस्वतीले ९४ प्रतिशत ओमकार परिवार भएको नेपाल हिन्दु राष्ट्र हुनुपर्ने र राजा रहनुपर्ने बताएका छन् । थोरै संख्यामा हिन्दु रहे पनि भारतको संविधानमा धर्म निरपेक्ष शब्द नराखेको उल्लेख गर्दै उनले भने, ‘म त चाहन्छु नेपालमात्र होइन, भारत पनि हिन्दु राष्ट्र होस् ।’ उनले ज्ञानेन्द्रलाई राष्ट्राध्यक्ष बन्नका लागि पशुपतिनाथसँग प्रार्थना गरेको बताए ।

भारतीय लोकसभाका सांसद एवम् विश्व हिन्दु महासंघ भारत एकाईका प्रमुख आदित्यनाथले नेपाल पहिचानका लागि तड्पिरहेको बताए । उनले विश्वलाई प्रजातन्त्रको पाठ सिकाउने बेलायतसँगै जापान, थाइल्याण्ड, स्वीट्जरल्याण्ड, नेदरल्याण्डजस्ता मुलुकमा पनि राजसंस्था रहेको उल्लेख गर्दै नेपालमा राजसंस्था हटाउनु र पूर्वराजालाई वञ्चित गर्नु षडयन्त्र भएको दाबी गरे ।

भारतले सयौं वर्ष अंग्रेज लगायतको गुलामी गर्दा नेपालले आफ्नो शीर सधैं उचो राखेको पनि उनको भनाइ छ । उनले नेपालको संसदमा हिन्दु राष्ट्रबारे सबै मौन रहेको र यो मौन खतरनाक हुने चेतावनी दिए । उनले भने, ‘हिन्दु राष्ट्र हुनु भनेको राष्ट्रिय चेतना जागृत हुनु हो । यो पद र प्रतिष्ठाका लागि होइन, नेपाल बचाउन र पहिचान राख्न हो ।’

भारतबाट आएका जगन्नाथ दास वैष्णवले नेपाल कसैले घोषणा गरेर हिन्दु राष्ट्र नभएको बताउँदै अनादिकालदेखि स्वतस्फूर्त भएको पहिचान मेटाउन नमिल्ने बताए । उनले भने, ‘नेपालमा हिन्दु धर्म नास्न विदेशी पैसा र इसारामा चलखेल भएको छ ।’

नेपाली बाबाले संगठन र एकतामा नै शक्ति रहेकाले अहिले हिन्दू धर्मावलम्बीको संगठन र एकता बढिरहेको बताए । युवासन्त श्रीनिवासले राजनीतिक परिवर्तनको नाममा राजनीतिक दलका नेताहरुले स्वार्थ पुरा गरिरहेको आरोप लगाए । उनले भने, ‘राजसंस्थालाई जनमतबिनै जबर्जस्ती अन्त्य गरियो, धर्म निरपेक्ष भएपछि मठमन्दिर असुरक्षित भएका छन् । देशको प्राणलाई संकटमा पुर्याइएको छ ।’

राजस्थानका महाराज सिरोहीले हिन्दु राष्ट्र भएमात्र नेपालको झण्डा विश्वमा हमेसा उचो हुने बताए । राष्ट्रिय स्वयंसेवक संघ भारतका संगठक रघुनन्दन शर्माले नेपाल धर्म र संस्कृतिका क्षेत्रमा भारतको दाइ भएको बताए ।

उनले भने, ‘श्री ५ जनतासामू आउनु प¥यो, युवामा पुग्नुहोस् तपाईलाई उनीहरु ज्यान दिन तयार हुनेछन् । हिम्मतका साथ अघि बढे राष्ट्रको पहिचान जोगिनेछ ।’ विश्व बौद्ध महासंघका प्रतिनिधि कृष्णकुमार लामाले भिजिलान्तेले देश चलाएकाले जनताले धेरै दुःख पाएको भन्दै राजालाई पूर्वअवस्थामा फकाउनुपर्नेमा जोड दिए । महासम्मेलनका संयोजक भरतकेशर सिंहले राजा धर्म, संस्कृति र एकताका प्रतिक रहँदै आएकाले जनताले उहाँकै नेतृत्व चाहेको प्रष्ट पारे ।

राजधानीमा तीन दिनसम्म चल्ने महासम्मेलनमा थाइल्याण्ड, मलेसिया, बंगलादेश, भारत, पाकिस्तान, मलेसिया, इन्डोनेसिया, श्रीलंका, मौरिसस लगायतका डेढ दर्जन देशको प्रतिनिधित्व रहेको छ । महासम्मेलनले हिन्दु धर्म परिवर्तन गर्नेलाई समायोजन गर्ने, धर्म र संस्कृतिभित्रका विकृति केलाउने, जातीय छुवाछुत लगायतका विषयमा छलफल हुनेछ । महासम्मेलनमा नेपालका तर्फबाट तीनवटा र भारतका तर्फबाट एउटा कार्यपत्र प्रस्तुत हुनेछ ।