कोरियामा हरितालिका तीज यसरी मनाइयो

दक्षिण कोरिया : हिन्दु नारीहरुको महान् पर्व हरितालिका तीज कोरियामा रहेका नेपाली चेलीले हर्षोल्लासका साथ मनाएका छन् । कामको व्यस्तता र दुःखलाई थाती राख्दै नेपाली चेलीले आइतबार नाचगान गरेर तीजको भरपुर मनोरञ्जन लिएका हुन् ।

तीज आउन केहि दिन बाँकी रहदा साप्ताहिक बिदाको दिन कोरियाका विभिन्न शहरमा विभिन्न संघसंस्थाले तीज विशेष कार्यक्रमको आयोजना गरेका थिए । राजधानी सउलमा वुमन फर वुमन, सुवन शहरमा गुल्मी सम्पर्क समिति, फेन्तेक शहरमा पुर्कोट घर, थेगु, बुसानमा पनि छुट्टाछुट्टै नेपाली संघसंस्थाले तीज कार्यक्रम राखेका थिए ।

गुल्मी सम्पर्क समितिले सुवन शहरमा आयोजना गरेको तीज कार्यक्रममा नेपाली चेली तथा पुरुषको उल्लेख्य सहभागिता थियो । वर्षेनी आयोजना हुने कार्यक्रममा यस पटक धेरै संख्यामा नेपाली उपस्थित भएर दर खाइ र तीजको गीत गाएर नाचगान गरेका थिए । परदेशमा भएपनि तीजको न्यास्रो मेटाउन सुवन आसपासमा कार्यरत दर्जनौ चेली सुवनमा भेला भएका थिए ।

 हरितालिका तीजको अवसरमा स्वदेशमा दिदिबहिनीसँग नाचगान गरेको झझल्कोलाई यस कार्यक्रमले मेटाएको सहभागी एक चेलीले बताइन् । परदेशमा काम र तनाबलाई पन्छाएर एक दिन भएपनि तीज कार्यक्रममा सहभागी भइ दिल खोलेर नाच्न पाउदाँ आनन्द आएको अर्की चेलीले बताइन् ।
आयोजक समितिका अध्यक्ष गान्दिभ सुवेदीले घरबाट टाढिएर आएका चेलीले एक दिन भएपनि परदेशी भुमिमा मनोरञ्जन प्राप्त गरुन् भनेर तीज कार्यक्रमका आयोजना गरिएको बताइन । त्यसैगरी फेन्तेक, थेगु, बुसान लगायतका शहरमा पनि स्थानिय कलाकारको प्रस्तुतिमा तीज कार्यक्रम गरिएको थियो ।

तीजमा भगवान शिवको आराधना गरिनुका साथै गीत र नाचगान गरेर मनोरञ्जन लिने गरिने भएपनि कोरियामा कार्यरत नेपाली महिलाले नाचगान गरेर मात्र तीज मनाउने गरेका छन् । कोरियामा शिवालय नभएको कारण नेपाली महिला शिवको आराधना गर्न नपाएका हुन् । यद्यपी केही महिलाले निराहार व्रत बसेर भएपनि आफ्ना पति तथा हुनेवाला पतिको स्वास्थ्य तथा शरीरमा कुनै बाधा उत्पन्न नहोस् भन्ने कामना गर्ने गरेका छन् ।
इपिएस, अध्ययन, व्यवसाय लगायत विभिन्न कामको सिलसिलामा कोरिया आएका नेपालीहरुले पछिल्ला वर्षमा मिलेर नेपाली चाँड मनाउने क्रम बढेको छ ।