कुश्मा : पर्वत सदरमुकाम कुस्मादेखि बागलुङ जिल्लाको बलेवा जोड्ने कुस्मा-बलेवा यान्त्रिक पुलले यस वर्ष सेयर धनीलाई १८ प्रतिशत मुनाफा वितरण गर्ने भएको छ । यान्त्रिक पुल लिमिटेड आर्थिक वर्ष २०७३/०७४ मा कुल लगानीको १८ प्रतिशत आम्दानी गर्न सफल भएको छ । आर्थिक वर्ष २०७३/०७४ मा ९० लाख ४७ हजार तीन सय ९४ रुपैयाँ मुना आम्दानी गरेको र सोही रकम सेयर धनीलाई वितरण गर्न लागिएको कम्पनीले जनाएको छ।
लिमिटेडको शनिबार सम्पन्न छैंटौ साधारणसभाले यस वर्ष १८ प्रतिशत मुनाफा वितरण गर्न स्वीकृत दिएको हो । साधारणसभाले स्वीकृत दिएपछि ९० करोड ४७ हजार मुनाफा वितरण गर्ने लिमिटेडका अध्यक्ष होमनारायण श्रेष्ठले जानकारी दिए । ‘यस वर्ष लगानीकर्तालाई १८ प्रतिशत मुनाफा वितरण गर्न साधारणसभाबाट स्वीकृत गरिएको छ', उनले भने । यान्त्रिकपुलमा मुलुकका प्रतिष्ठित व्यावसायीदेखि कुस्मा र बलेवा क्षेत्रका चार सय ६२ सर्वसाधारणले लगानी गरेका छन् । गत वर्ष २० प्रतिशत मुनाफा वितरण गरेको थियो ।
यान्त्रिक पुल निर्माणसँगै छिमेकी जिल्ला बागलुङको बलेवा क्षेत्रका साविकका १६ गाविसका बासिन्दासँग कुश्माबजारको व्यावसायिक सम्बन्ध गाँसिनुका साथै सदरमुकाम कुश्माबजारको व्यापारिक र पर्यटन विकासमा सहयोग पुगेको छ । पुलबाट दैनिकजसो पाँच सय सर्वसाधरणले ओहोरदोहोर गर्दै आएका छन् । पुल निर्माणबाट बृद्ध, सुत्केरी र अपांगता भएका व्यक्तिले सबैभन्दा बढी फाइदा लिएको सचिव केदानरनाथ शर्माले जानकारी दिए ।
पुलमा यात्रा गर्ने बलेवा क्षेत्रका बासिन्दाले एकतर्फी यात्राको ८५ रुपैयाँ तिर्नुपर्ने भएको छ भने अन्यत्र क्षेत्रका यात्रु बलेवा जान एक सय १४ रुपैयाँ भुक्तानी गर्नुपर्ने हुन्छ । उक्त यान्त्रिकपुलको छैटौं साधारणसभामा बोल्ने वक्ताले सर्वसाधरणले लगानी गरेर सार्वजनिक रूपमा सेवा दिएको यान्त्रिक पुल मुलुककै नमुना बनेको चर्चा गरेका थिए ।
यान्त्रिक पुल लिमिटेडका अध्यक्ष होमनारायण श्रेष्ठको अध्यक्षतामा भएको साधारणसभामा निमिक्त प्रमुख जिल्ला अधिकारी ऋषि आचार्य, नेपाल उद्योग वाणिज्य महासंघ प्रदेश नं ४ का अध्यक्ष सञ्जिवबहादुर कोइराला, प्रहरी नायब उपरीक्षक दिलीप घिमिरे, कम्पनीका इलेक्ट्रिकल इन्जिनियर अच्युत खतिवडालगायत सहभागी थिए ।
प्रतिक्रिया दिनुहोस !
