कैलालीमा आरजु राणा र लेखराज भट्टसहित सबै उम्मेदवारको मनोनयन

धनगढी : दोस्रो चरणको निर्वाचनका लागि प्रदेश नम्बर ७ का पाँच वटा जिल्लामा मनोनयन दर्ता शान्तिपूर्ण रुपमा सम्पन्न भएको छ। कैलालीमा पनि शान्तिपूर्ण रुपमा मनोनयन दर्ता भएको छ। प्रधानमन्त्री पत्नी आरजु राणा देउवाले कैलाली निर्वाचन क्षेत्र नम्बर ५ बाट प्रतिनिधिसभा सदस्यका लागि मनोनयन दर्ता गराएकी छिन्। पूर्वसांसद प्यारेलाल राना प्रस्ताव र पार्टी सभापति नरनारायण शाह मनुको समर्थनमा राणाले मनोनयन दर्ता गराएकी हुन्। कांग्रेसबाटै निर्वाचन क्षेत्र नम्बर ५ को ख बाट डिल्लीराज पन्त र क बाट जीवन रानाको उमेदवारी परेको छ।

आरजुसँगै वाम गठबन्धनका नारदमुनी रानाको उम्मेदवारी परेको छ। रानाको प्रस्तावकमा पार्टी सचिव रणबहादुर चन्द प्रस्तावक र दीपक देवकोटा समर्थक रहनु भएको छ। वाम गठबन्धनबाट क्षेत्र नम्बर क बाट एमालेका नेपालु चौधरी र ख बाट माओवादी केन्द्रका रमेश धामीले उम्मेदवारी दिएका छन। यस्तै विवेकशील साझा पार्टीले पनि कैलाली ५ मा कैलाली क्षेत्र नम्बर क बाट नारायण चौधरी र ख बाट प्रकाश चन्द्र भट्टलाई उमेदवार बनाएको छ।

कैलाली क्षेत्र नम्बर ४ मा वाम गठबन्धनबाट लेखराज भट्ट, प्रदेशसभा क मा एमाले पार्टी अध्यक्ष दीर्घ सोडारी र ख मा एमालेकै कृष्ण सुवेदीले मनोनयन दर्ता गरेका छन्। कांग्रेसले पनि क्षेत्र नम्बर ४ बाट शुनीलकुमार भण्डारीलाई प्रतिनिधिसभामा उठाएको छ। त्यहाँबाट प्रदेश सभा क मा यज्ञराज चौधरी र ख मा हिरादत्त भट्टले मनोनयन दर्ता गराएका छन्।

क्षेत्र नम्बर ४ मा विवेकशील साझा पार्टीबाट प्रतिनिधि सभाका लागि विप्लव मल्ल, प्रदेश सभा क क्षेत्रमा धनबहादुर बोगटी (धिरेन) र ख निर्वाचन क्षेत्रका लागि यज्ञराज हमाल (योगेन्द्र)ले मनोनयन दर्ता गराएका छन्।

कैलाली निर्वाचन क्षेत्र नम्बर ३ मा वाम गठबन्धनका गौरीशंकर चौधरीको उम्मेदवारी परेको छ भने प्रदेश सभा क मा माओवादी केन्द्रका नेता वीरमान चौधरी र ख मा एमाले नेता अमर साउदले मनोनयन दर्ता गरेका छन्। यस्तै नेपाली कांग्रेसले प्रतिनिधि सभाका लागि रामजनम चौधरीको मनोनयन दर्ता गराएको छ भने प्रदेशसभा क बाट पुरन चौधरी र ख बाट लक्ष्मण शाहीको मनोनयन दर्ता गराएको छ।

कैलाली निर्वाचन क्षेत्र नम्बर २ मा एमाले छोडेर कांग्रेस प्रवेश गरेका मोहनसिह राठौरले प्रतिनिधि सभाका लागि मनोनयन दर्ता गराएका छन भने प्रदेश सभा क का लागि हिम रावल र ख मा अरुण चौधरीले मनोनयन दर्ता गरेका छन्। वाम गठबन्धनबाट भने एमालेका केन्द्रीय सदस्य झपट रावलले प्रतिनिधिसभाका लागि मनोनयन दर्ता गराएका छन्। प्रदेश सभाका लागि वाम गठबन्धनले क्षेत्र नम्बर क बाट रतन थापा र ख बाट नन्दराम साउदको मनोनयन दर्ता गराएको छ।

कैलाली निर्वाचन क्षेत्र नम्बर १ बाट भने कांग्रेसबाट ईश्वरी न्यौपाने र वाम गठबन्धनकी मदनकुमारी शाह (गरिमा शाह) को मनोनयन दर्ता भएको छ। वाम गठबन्धनले क्षेत्र नम्बर १ को प्रदेश क मा एमालेका लालबीर चौधरी र ख बाट माओवादी केन्द्रका नेपबहादुर चौधरीलाई उमेदवार बनाएको छ। कांग्रेसले क्षेत्र नम्बर १ क बाट जनकराज चौधरी र ख बाट रणबहादुर रावललाई प्रदेश सभाका लागि उमेदवार बनाएको छ।