भक्तपुर क्यान्सर अस्पतालमा मेडिकल आईसीयू सञ्चालन

भक्तपुर : भक्तपुर क्यान्सर अस्पतालले पाँच शय्याको मेडिकल आईसीयू सञ्चालनमा ल्याएको छ । क्यान्सर उपचारको क्रममा केमो लिएर सघन उपचार गर्नुपर्ने बिरामीहरुलाई लक्षित गरी उक्त आईसीयू सञ्चालनमा ल्याइएको हो ।

अस्पतालका मेडिकल निर्देशक प्रो.डा. ऋषिकेशनारायण श्रेष्ठले क्यान्सर उपचारको उपचारको क्रममा केमो लिएका बिरामी र तिनका परिवारबाट धेरै माग आएपछि उक्त आईसीयू सञ्चालनमा ल्याइएको जानकारी दिए ।

अस्पतालले यसअघि नै सर्जिकल विभाग, हेमाटोलोजी विभाग र पोस्ट अपरेसनतर्फ आईसीयू सञ्चालनमा ल्याइसकेको छ । तर यी विभागका आईसीयूमा केमो लिएका बिरामीहरुको सघन उपचार गर्न सम्भव नभएपछि केमो लिएका बिरामीहरुको लागि छुट्टै मेडिकल आईसीयू सञ्चालनमा ल्याइएको मेडिकल निर्देशक प्रो.डा. श्रेष्ठले बताए ।

‘हामीसँगै पहिल्यै सर्जिकलतर्फ ६ शय्या, पोस्ट अपरेसनतर्फ पाँच र हेमाटोलोजीतर्फ तीन शय्याको आईसीयू सञ्चालनमा छन्’, उनले भने, ‘अहिले पाँच शय्याको मेडिकल आईसीयू सञ्चालनमा ल्याएका छौं । जसअनुसार अस्पतालमा आईसीयूतर्फ १९ शय्या पुगेको छ ।’

अस्पतालमा सञ्चालनमा ल्याइएको मेडिकल आईसीयूको मंगलबार एक कार्यक्रमबीच अस्पताल व्यवस्थापन समितिका अध्यक्ष लोकेन्द्रकुमार श्रेष्ठले उद्घाटन गरेका छन् ।

उक्त अवसरमा अध्यक्ष श्रेष्ठले मेडिकल आईसीयू सञ्चालनमा आएसँग क्यान्सर उपचार गर्न केमो लगाएका बिरामीहरुले अस्पतालमा गुणस्तरीय एवं सहज उपचार सेवा पाउने विश्वास व्यक्त गरे । उनले केमो लगाएका बिरामी र तिनका परिवारहरुको मागअनुसार अस्पतालले उक्त आईसीयू सेवा सुरु गरेको जानकारी दिए ।
अस्पतालका मेडिकल निर्देशक प्रो. डा. श्रेष्ठका अनुसार केमो लिएका धेरैजसो बिरामीहरुलाई संक्रमण हुने गर्छ । जसले गर्दा अस्पतालमै भर्ना गरेर उनीहरुको उपचार गर्नुपर्छ ।

‘केमो लिएर संक्रमण भएका बिरामीहरुलाई साधारण वार्डमा राखेर उपचार सम्भव हुँदैन’, उनले भने, ‘उनीहरुलाई सघन उपचार नै आवश्यक हुन्छ । तर यसअघि हामीकहाँ सघन उपचारको व्यवस्था नहुँदा बिरामीले समस्या भोग्दै आएका थिए । अब छुट्टै आईसीयूको व्यवस्थाले बिरामीले अन्यत्र जानु नपर्ने भएको छ ।’

मेडिकल आईसीयूको व्यवस्थाले अन्य क्यान्सर बिरामीहरुले पनि गुणस्तरीय उपचार पाउने उनको दावी छ ।