महेन्द्रनगर : पूर्वपश्चिम राजमार्गको महेन्द्रनगर–गड्डाचौकी सडकखण्डमा बसको ठक्करबाट एकजनाको ज्यान गएको छ । बुधधार राति दिल्लीबाट काठमाण्डौका लागि आइरहेको बा ४ ख २३८९ नम्बरको बसको ठक्करबाट एक जनाको ज्यान गएको हो । महाकाली नगरपालिका ३ दार्चुला घर भई महेन्द्रनगर आफन्तको घरमा आएका ५० वर्षीय बिरसिंह महराको ज्यान गएको प्रहरीले जनाएको छ ।
भीमदत्त नगरपालिका ५ वनखेतस्थित बालजागृती कलेज नजिकै बाटो काट्ने क्रममा बसले ठक्कर दिएको जिल्ला प्रहरी कार्यालयको सञ्चार कक्षले जानकारी दिएको छ । बसको ठक्करबाट महराको घट्नास्थलमै ज्यान गएको हो । उनको शव पोष्टमार्टमका लागि महाकाली अञ्चल अस्पतालमा राखिएको छ ।
प्रहरीले ठक्कर दिने बस र चालकलाई नियन्त्रणमा लिएको छ । दिल्लीबाट काठमाण्डौ जान हिडेका यात्रुहरुलाई भने अर्का सवारी साधनको व्यवस्था गरेर पठाइएको प्रहरीले जनाएको छ ।
महेन्द्रनगर–गड्डाचौकी सडकखण्डमा सर्वसाधारण र सवारी साधनको समेत आवागमन धेरै हुने भएकाले यो सडकखण्डमा धेरै दुर्घटना हुने गरेका छन् । केही साता अघि समेत एक भारतीय नम्बरको जिपको ठक्करबाट एक स्थानीयको समेत ज्यान गएको थियो ।
प्रतिक्रिया दिनुहोस !
