मुसीकोट : रुकुम पश्चिमको त्रिवेणी गाउँपालिकाका जनप्रतिनिधि स्थानीय तहमा सुशासन कायम गर्न प्रतिवद्ध रहेको बताएका छन् । जनप्रतिनिधिले त्रिवेणी गाउँपालिकालाई ‘नमुना’ बनाउने सामुहिक प्रतिवद्धता समेत जनाएका हुन् ।
हरप्लेस नेपाल रुकुमद्वारा सिम्रुतुमा आयोजना गरिएको सुशासन सम्बन्धी समन्वय बैठक तथा छलफलमा उपस्थित भएका त्रिवेणी गाउँपालिकाका अध्यक्ष झक्कुप्रसाद घर्ती, वडाअध्यक्षका साथै स्थानी सरोकारवालाले सुशासन प्रवर्द्धन रणनीति तथा कार्ययोजना-२०७४ मा व्यवस्था भए अनुसार सुशासन समिति गठन गर्ने, गाउँपालिकाका दशवटै वडामा चौमासिकरुपमा नियमित सार्वजनिक सुनुवाई गर्ने निर्णय गरिएको छ ।
त्रिवेणीका सबै वडामा स्थानीय सभा गठन गर्ने निर्णय गरिएको छ । यसअघि वडा नं. ३, ४ र ५ मा उक्त स्थानीय सभा गठन गरिएको थियो । स्थानीय सरकारले नै गठन गरी प्रभावकारी कार्यान्वयन गर्ने र गाउँपालिकामा नागरिकको सहज पहुँच विस्तार गर्न र गुनासोको व्यवस्थापनका लागि हरप्लेसको प्रविधिक सहयोगमा टोल फ्री फोन समेत सुचारु गर्ने निर्णय गरिएको छ ।
त्रिवेणी गाउँपालिका अध्यक्ष घर्तीले सबै क्षेत्रमा सुशासन कायम हुन सकेमात्र नेपालको संविधानले परिकल्पना गरेको समाजवादको लक्ष्यमा पुग्न सकिने बताए । उनले सुशासन कार्यन्वयन र जवाफदेहिता कायम गर्ने कुरामा गाउँपालिकालाई नमुना बनाउन सरोकारवाला सबैबाट आवश्यक सहयोगको समेत अपेक्षा गरेको बताए ।
‘जनताबाट निर्वाचित हामी जनप्रतिनिधिको पहिलो प्राथमिकता भनेकै सुशासन प्रवर्द्धन गर्नु हो ,’उनले भने,‘यसका लागि हामि प्रतिवद्ध भएर लाग्न सक्नुपर्छ । यसकारण सबै क्षेत्रमा सुशासन कायम गर्न हामी अधिकतम प्रयास गरिरहेका छौ । अब निर्णय गरेरै लागू गर्छौँ । त्रिवेणी गाउँपालिका सुशासनको क्षेत्रमा नमुना हुनेछ ।’
उनले सुशासन, पारदर्शिता र जवाफदेहिता प्रवर्द्धनका लागि आवश्यक कानुन, नियम, कार्यविधि निर्देशिका पारित गरेर अगाडि बढ्ने कुरामा बिशेष जोड दिनुपर्ने बताए । उनले सरोकारवाला सबैले त्रिवेणी गाउँपालिकालाई सुशासन र जवाफदेहिताको क्षेत्रमा नुमना बनाउन आ-आफ्नो ठाउँबाट लाग्ने बताएका थिए ।
हरप्लेस रुकुमका जिल्ला कार्यक्रम संयोजक सुरेन्द्र खत्रीले पारस्परिक जवाफदेहिता परियोजना लागु भएको गाउँपालिकामा सुशासन प्रवर्द्धनका लागि जनप्रतिनिधि प्रतिवद्ध हुनु सुखद रहेको बताए । उनले निर्णयको सफल कार्यान्वयन गर्दै अगाडि बढ्न सके सेवाप्रवाहमा प्रभावकारिता बढ्ने बताए ।
प्रतिक्रिया दिनुहोस !
