एसिडसँगै जल्यो धनी हुने सपना, कतारबाट खाली हात फर्किँदै

कतार: बैदेशिक रोजगारीको सिलसिलामा केही दिनअघि कतार आएका तीनजना नेपाली कामदारलाई नेपाल पत्रकार महासंघको अगुवाई उद्दार गरिएको छ।

अर्घाखाँचीको भूमिकास्थान-७ का तिलबहादुर रायमाझी, नवलपरासीको सुनवल-१ का भीम चौधरी र रौतहटका सन्तोष पण्डितलाई घर फर्काउन लागिएको हो । काठमाडौंस्थित रोयल इन्टरनेसनल ओभरसिज प्रालि मेनपावरबाट ६ अप्रिलमा उनीहरु कतार आएका थिए । 

आफुले माग गरे अनुसारको कामदार नपठाएको भन्दै रोजगारदाताले सामान्य सुविधा समेत नदिँदा उनीहरु विचल्लीमा परेका थिए। 

कम्पनीले गाडीको मर्मत सम्हार तथा पेन्टर भनेर म्यानपावर कम्पनीलाई भिसा दिएको थियो । तर तीनैजना कामदारलाई उक्त काम गर्न नआएको भन्दै रोजगारदाताले यातना दिएर खाने बस्ने सुविधा नदिँदा बिचल्लीमा परेका थिए । 

युएईमा कार्यरत रहँदा चिनजानका साथीलाई पीडितमध्येका तिल बहादुरले सम्पर्क गरेपछि दुबईमा काम गर्ने नेपालीमार्फत कतारमा कार्यरत अर्घाखाँची सेवा समाज कतारका द्वितीय उपाध्यक्ष रामप्रसाद पराजुली र अर्घाखाँची सेवा समाजका महासचिव समेत रहेका पत्रकार टेकराज थापाले पीडितहरुलाई खाद्यान्न र नगद सहयोग गरेका थिए । 

पत्रकार थापाले पीडितहरुबारेमा नेपाल पत्रकार महासंघ कतार शाखाका अध्यक्ष करिम बक्स मियाँलाई जानकारी दिएलगत्तै अध्यक्ष एजेन्टलाई सम्पर्कमा ल्याई पीडितहरुलाई यथाशक्य उद्दार गर्न ताकेता गरेर दुताबासलाई जानकारी गराएका थिए ।

काम गर्ने सिलसिलामा शरीरमा ‘एसिड’ पोखिँदा पीडित तिल बहादुरको आधापाटो शरीर र हात गम्भीर रुपले जलेको छ । ‘भाग्यवश बाँच्न त सफल भएँ, तर कम्पनीले उपचारमा कुनै चासो देखाएन’, उनले दुतावासका श्रम सहचारीलाई आफ्नो जलेको शरीर देखाउँदै भने । मुदिरले खान नदिई शारीरिक यातना दिएर काममा लगाउने गरेको अर्का पीडित चौधरीले बताए ।

पत्रकार मियाँको विशेष पहलमा पीडितलाई नेपालस्थित म्यानपावर द्वारा टिकट उपलब्ध गराई नेपाल पठाउन लागिएको हो । गत बुधबार पीडितहरु र म्यानपावरका कतार एजेन्टलाई दूतावासमार्फत पीडितहरुलाई स्वदेश फर्काउने प्रक्रिया अघि बढेको हो ।

७० हजारदेखि एक लाख २५ हजारसम्म खर्चेर आएका पीडितहरुको समस्या र लागतबारे दुताबासले नेपालस्थित सम्वन्धित विभागलाई जानकारी गराएको छ । 

तीन पीडितमध्येका दुईजना रायमाझी र चौधरी शुक्रबार राति ९ बजेको वातनिया एरलाइन्सबाट नेपाल फर्कँदै छन भने अर्का पीडित सन्तोष पण्डितको फिर्ती प्रक्रिया अघि बढेको छ ।

'श्रमिकलाई पर्लोभनन देखाएर चर्को शुल्क लिई अलपत्र बनाएर ठग्नेहरुलाई छाड्दैनौँ', पत्रकार मियाँले भने, 'यो एकखालको खबरदारी पनि हो । अन्यायविरुद्ध यहाँ कार्यरत सबै पत्रकारहरु आवाज उठाइरहन्छौँ ।'

पत्रकार टेकराज थापाको सहयोगमा