जिप पल्टिँदा सात घाइते
भोजपुर : आमचोक गाउँपालिकामा गएराति बोलेरो जिप दुर्घटना हुँदा सातजना घाइते भएका छन् । बुधबार राति करिब सवा नौ बजे आमचोक गाउँपालिका–४, बालंखाबाट रानीटार जाँदै गरेको को१ज २३४७ नम्बरको बोलेरो जिप पाङ्चाको राङ्चामा अनियन्त्रित भई पल्टिएको हो ।
दुर्घटनाहुँदा जिपमा सवार चालकबाहेक सातैजना यात्रु घाइते भएको जिल्ला प्रहरी कार्यालय भोजपुरले जनाएको हो । घाइते हुने सातमध्ये पाँच जनालाई धरानस्थित विपी कोइराला स्वास्थ्य विज्ञान प्रतिष्ठान र दुई जनालाई सप्तरीको फत्तेपुरस्थित क्लिनिकमा लगिएको छ ।
घाइते हुनेमा आमचोक गाउँपालिका–९, दुम्मानाका १६ वर्षीया रिना श्रेष्ठ, ३७ वर्षीय छविराज राई, १५ वर्षीया रेविना राई, ३८ वर्षीय योगराज श्रेष्ठ, आमचोक–८ दुम्मानाका १६ वर्षीय नरेश विष्ट र आमचोक–१० पाङ्चाका ५५ वर्षीय नारायण श्रेष्ठ र उदयपुर जिल्ला ठोक्सिलाका ४६ वर्षीय भोला तामाङ रहेका छन् ।
योगराजको बाँया हात भाँचिएको छ । उनको धरानस्थित घोपामा उपचार भइरहेको छ । अन्य ६ जना उपचारपछि डिस्चार्ज भएका छन् । बाँकी तीन जनालाई भने घटनापश्चात् सकुशल घर फर्काइएको जिल्ला प्रहरी कार्यालय भोजपुरका प्रहरी निरीक्षक चरित्रविक्रम कार्कीले जानकारी दिए ।
घटनापछि फरार जिप चालकको खोजी भइरहेको प्रहरीको भनाई छ ।